Read Hatam MBEN ISRAEL IMBUT-MBUT NYEN 24 Bible Online

MBEN ISRAEL IMBUT-MBUT NYEN 24 - Hatam bible

MBEN ISRAEL IMBUT-MBUT NYEN 24

¹Hon kep nituti dima ne jo nibreisi mem Bileam bipia Allah joi sut gima noni ngat nadi tindei mun di kei mem mben Israel. Gima rino noni ug nggok mun di bindo nya bit leu nok gi nipou pima bi. Lene noni cap hammi iggum ndigsi.

²Lene ngat lo, mben Israel inyohou hok ide prak meng nya sindam bit leu nok ide keret inyenga. Lene Allah Ninnei sindem tut noni.

³Lene noni tri tut Allah ningon kanti bipai, “Gini ne Bileam di Beor nipmot nipaisi ba, dani ne no di ngat mun di hagom brei bou niyai him ri.

⁴Allah nihyet tibim ei ditingou nsi ba, dimian huk ningat-hi-ngat di Allah Di Sindem Bibor ndo bida tirigi diyai piga hak.

⁵Je di mben Yakub e, diyai ngakei jide prak meng nya. Je di mben Israel e, diyai ngakei jide prak meng nya niyati.

⁶Lewo jide prak meng nya dem kep nok dui njem nya di bon nipuig sren kin njita kioi di jo simiak minyei nyai kin biei gaharu di TUHAN Nonti ta kin buom njem di hei simiak minyeisi.

⁷Mpia mibut nok gi dem mem mben Israel apino yoni mindim njita ngan ei ninnumti. Ide nibou ndig ninyeng jei dor njiriek nibou ndig Agag ba, ninyeng tak kepti mikieng kep dihyei nisurti-nipekti cem.

⁸Allah buwak yok kwei leu minu Mesir tu ba, Noni hwen ide siceu nya dem kep nok sapi banteng di bit bon tungwatu nya ipijuk kan bi. Yoni ihwen ide siceu nya yahagom bingwig ba, ikinam injum ba, idahat ide hampiap cem.

⁹ Mben Israel dem kep nok mindhe singa nikre kin niwek di bong mai kep ninghuisi. Tou ribrim ningkek biwin noni i? Tungwa tou rino ngat nadi tindei mun di kei mem yok miyai mun di kei hanyen leu Allah. Tungwa tou rino mbriom yok mitug ndei nimbriomti hanyen leu Allah.”

¹⁰Lene Balak gga nindig bibor bikimut ninda bicug Bileam lene pai binoni “Dihig na kwei leu binhyepo ambriom ditde siceu nya noro angat nadi tindei mun di kei mem yok mbiningai su.

¹¹Aug leu da ba, angkwei hanyen ug ei atimieisi hak ug. Dipreu ei mem na tut mitiei noro TUHAN bindei ba, amuhup sar tu.”

¹²Lene Bileam buhup “Bit leu nok gi di pai bak yo po acuk yok mem ibuwak da kwei pima.

¹³Mbro nok gino ayai ade perak kin ade mas di jo ei ade ig nibou ndig hagom bida lo, bit bon disrep tut TUHAN nicuk dati bidibit leu danti dingon kanti kan bi. Bit bon dipai mun nyeng hi njiriek TUHAN nicuk dati kan bi.”

¹⁴Lene Bileam pai bak Balak “Nogindini dingkwei hanyen ug ei ditimieisi ug ri. Noro tirigi dimbut bigyo lene midipai nisinati bina tut notou mben Israel mibibon nani kin ade limwa nya ei nidipti bu ug e.”

¹⁵Lene noni tri tut Allah ningon kanti gom kin bu bipai, “Gini ne Bileam di Beor nipmot nipaisi rin ba, dani ne no di ngat hagom brei bou niyai him ri.

¹⁶Allah nihyet tibim ei ditingou nsi. No Di Ninyeng Jei Bibor ndo ningon kanti brei bida ba, diba diyai di piga hak bingat ningat-hi-ngat di Allah Di Sindem Bibor ndo bida.

¹⁷Tirigi dingat mun di jo ei nidipti bu lene dingat mben Israel. Nibou ndig mintun timiei mben Israel him rin ba, Noni mittau kwei dem kep nok ham mpia-bbed him di piga kei ri. Leu api noni mitam mben Moab ba, mihwen mben Set nya yahagom bingwig.

¹⁸Nide siceu nya igyai minu Edom bigyati noro mben Israel misindem mem gima ihwen yok.

¹⁹No di sindem bibor mintun Yakub him leu api Noni mihwen Nide siceu nya bingwig hak ug.”

²⁰Nok lene Bileam ngat-hi-ngat bingat mben Amalek leu api tri tut Allah ningon kanti gom kin bu bipai, “Mben Amalek isindem bibor dor njiriek keret nindigsi nya yahagom nipou su noro yahagom imai bingwig hon bijo ninno bijo kikau.”

²¹Lene noni ngat-hi-ngat bu bingat yo di intun Kain him leu api tri tut Allah ningon kanti gom kin bu bipai, “Jibong ser jide ig kin jide minu di nddong bibor dem kep nok ha ham di jo nai ei hak dip.

²²Je di mben Keni e, jei bi ne tentara Asyur mikwei hwen je bipos je ug ei itimieisi apino mijimai bijingwig hak ug.”

²³Lene Bileam tri tut Allah ningon kanti gom kin bu bipai “Buhun bibor! Gino Allah yai nibou tut yok nok gima lene tou rima ningwes ngun i?

²⁴Noro yo di imbuk nya mibri kibar minyei kwei leu Mios Siprus bihwen mben Asyur kin mben Heber bingwig. Leu api yo di imbuk pima yok cem mimai bitimek bingwig bu sindam bijo ninno bijo kikau.”

²⁵Lene Bileam kin Balak ikwas yam ba, Bileam ngkwei hanyen ug ei nitimieisi leu api Balak ngkwei hanyen ug ei nide ig bei.