Read Hatam MBEN ISRAEL IMBUT-MBUT NYEN 25 Bible Online

MBEN ISRAEL IMBUT-MBUT NYEN 25 - Hatam bible

MBEN ISRAEL IMBUT-MBUT NYEN 25

¹Tirigi mben Israel ingat rin ei Mbang Briep Sitim lene pinai nya ikinyon ei niyem njita tut sop mben Moab nya di ibong ei sirima.

²Sop dima yok icigit yok ndam ide pesta di ibon kep mun di ikuk yok bak nya. Mpe dima ne mben Israel cem igyem mikwau di ibui bak kwar di mben Moab nya ikuk yok bak.

³Lene TUHAN gga mben Israel drek dip gi ikuk yok bak kwar Baal-Peor. Gima rino Noni pai bak Musa,

⁴“Akat nibou mben Israel yahagom ba, akes hukum nimai ei yok dip ei ide limwa nya yahagom yoho bei dem igbit dicuk nati. Tug hon nisinati dima lene midikes hon ba, digga yok bu bi.”

⁵Lene Musa pai bak nikei mben Israel “Suar bikwop je di nikei nya jingig jiyai kep jide keret nya ba, tungwagom-gom kes hukum nimai ei yo di ikuk yok bak Baal-Peor dima yahagom dip sindam.”

⁶Mpe di gom tirigi Musa kin limwa mben Israel yahagom ipim ba, ibikiek-kiek nyen kui dimbou ei TUHAN De Prang Meng nuhui lene ingat lo, limwa mben Israel gom buwak sop Midian gom ug ei nide prak meng nsi.

⁷Tirigi Imam Harun nignyon Pinehas di Eleazar nipmot ngat yo cin dima lene kiju bidor leu nimpung di idem yam ei dima buug yai micim gom,

⁸leu api buhuk bram pinai kin sop pima ug ei prak meng nsi leu api ba micim dima bidat cin dima kin yam. Tug hon nisinati dima lene nsuwer ajar di sindi hwen mben Israel dima kes hon.

⁹Noro nsuwer ajar dima bindei ba, ibou sribu ningot can bitai imai su.

¹⁰Lene TUHAN pai bak Musa,

¹¹“Imam Harun nignyon Pinehas di Eleazar nipmot brim ningkek ba, nyohou dinyeng di jei bibor ei mben Israel ikieti. Apino Ditde nigga yo dima biborti kes hon tu ba, dibindei sar yok bi.

¹²Gima rino ma apai bak Pinehas bipia dipreu ei mem noni tug hon neheng di jo ninghig-niker ei siri.

¹³Dikos tut noni kin nide nintun him yamti di ibram yam nya bipia inok imam bijo ninno bijo kikau lewo noni brim ningkek mem nide Allah binyohou dinyeng di jei bibor lene bindei ba, mben Israel igyai gi kos ser ide sisar.”

¹⁴Pinai Israel gom po yem njita tut sop Midian ba, Pinehas yai nimai bak pima ninyeng Zimri di Salu nipmot ba, Salu ne nibou ig bei gom di ntun keret Simeon him ri.

¹⁵Ba, sop pima ninyeng Kozbi di Zur nipmisop ba, Zur ne nibou Midian nide bat nya nimpung gom.

¹⁶Lene TUHAN cuk Musa,

¹⁷“Ma ahwen yo di Midian ba, abindei sar yok,

¹⁸drek dip gi ibon mun kinei sut jeni tirigi iris je ei Peor pima cem drek dip nibou Midian nide bat nya gom nipmisop Kozbi di tug ndei nimai ei mpe di nsuwer ajar hwen jeni ei Peor pima cem.”