Read Hatam MBEN ISRAEL IMBUT-MBUT NYEN 28 Bible Online

MBEN ISRAEL IMBUT-MBUT NYEN 28 - Hatam bible

MBEN ISRAEL IMBUT-MBUT NYEN 28

¹Lene TUHAN cuk Musa,

²bipai bak mben Israel bipia suar ikwas munkwas tut TUHAN mem nibon midut njita nibipai sigyo bak Allahti dem igbit nituti di Noni ndo ei su leu binhyepo ibiyai ningon kei. Lene suar igyok ngon kep nicukti dini mungkun kei.

³Gini ne munkwas mem nibon midut nindig mindhe titut kep hum di ibui mem ibikuk yok bak TUHAN bikwop njap-njap ri. Domba pmot nikre ningut can di bok-ba bi di ide njap dem ari bingwam gom.

⁴Iba ningut gom bibon midut mem njap bigyokti lene iba ningut gom kin bu bibon midut mem mmunti.

⁵Nimangti nok gini. Tepun di kei bibor kilo gom di iba mini zaitun liter gom bisrigsi ba, ibikrau kin domba pmot pima gom-gom.

⁶Gima ne nibon midut nindig mindhe titut kep hum bikwop njap-njap bit leu nok ibikuk yok bak TUHAN ei Nungug Sinai nimbie him ngat ri. TUHAN joi sut ninghap di ngge kei dima.

⁷Suar ittei ba anggur ngei liter gom mem nibon midut niprok nimbar hum dokti ba, ibikrau kin domba pmot gi nigom pima.

⁸Suar ibui domba pmot gi nican pima mem nibon midut nindig mindhe titut kep humti mem mmunti noyam kin gi hi di ibui mem njap bigyokti ba, ibikrau kin ba anggur ngei cem. Lene TUHAN joi sut mindhe di indig kep hum dima cem ninghap di ngge kei dima cem.

⁹ Ei Njap Nigwam Kep Ninghuisi lene suar ibui domba pmot nikre ningut can di bok-ba bi di ide njap dem ari bingwam gom mem nibon midut nindig mindhe titut kep humti ba, ibikrau kin tepun kilo can di iba mini zaitun liter can bisrigsi mem nibon midut njita nibipai sigyo bak Allahti kin nibon midut ba anggur ngei cem.

¹⁰Suar ibon midut nindig mindhe titut kep humti dima bikwop Njap Nigwam Kep Ninghuisi ba, ibikrau kin nibon midut di ibon bikwop njap-njap bitut nibon midut ba anggur ngei pima.

¹¹Bikwop bed jep nimbie him lene suar ibui sapi pmot nikre ningut can kin domba nikre ningut gom kin domba pmot nikre di ide njap ug ei ari bingwam gom ningut muhwindacan mem nibon midut nindig mindhe titut kep humti ba, bikwop mindhe-ndhe dima hagom bok-ba bi.

¹²Lene suar ittei tepun di iba mini zaitun bisrigsi mem nibon midut njita nibipai sigyo bak Allahti. Tepun kilo ningai mem bikwop sapi nikre ningut gom-gom lene tepun kilo can mem domba nikre,

¹³lene tepun kilo gom mem bikwop domba pmot nikre ningut gom-gom lene nok. Nibon midut nindig mindhe titut kep humti dini noyam kin nibon midut njita nibipai sigyo bak Allahti ba, TUHAN mijoi sut ninghap di ngge kei dima.

¹⁴Suar ittei ba anggur ngei mem nibon midut niprok nimbar hum dokti tirigi ibon midut nindig mindhe titut kep humti. Nimangti nok gini. Liter can mem bikwop sapi nikre ningut gom-gom lene liter gom biniken mem domba nikre lene liter gom ngat mem bikwop domba pmot ningut gom-gom. Gima ne nicukti tut nibon midut nindig mindhe titut kep humti ei njap ngon bou gi nigom bikwop bed mem ari bingwam hagom ri.

¹⁵Lene suar ikwas kambir nikre ningut gom mem nibon midut nibiyai nikos ser sisarti nok nibikum ei nibon midut nindig mindhe titut kep humti kin nibon midut ba anggur ngei pima.

¹⁶ Nituti mem TUHAN de Njap Ndig Paskah dima ne njap ngon bou gi nisimnaibrimigtai ei bed gi nigom ri.

¹⁷ Njap gi bram bu nok njap ngon bou gi nisimnaimuhwidip lene suar ikinyon ei Njap Ndig Roti Dwoi Biti. Ba, ei ninsi njap muhwindacan dima lene ma igyem roti di iba roti ninjep bibon au.

¹⁸Njap gi nigom tirigi idem yam bikuk yok bak TUHAN lene harin dima igyai midyai di buhun a.

¹⁹Suar ibui sapi pmot nikre ningut can kin domba nikre ningut gom kin domba pmot nikre di ide njap dem ari bingwam gom ningut muhwindacan mem nibon midut nindig mindhe titut kep humti ba, bikwop mindhe-ndhe dima hagom bok-ba bi.

²⁰Lene suar ittei tepun di iba mini zaitun bisrigsi mem nibon midut njita nibipai sigyo bak Allahti. Tepun kilo ningai mem bikwop sapi nikre ningut gom-gom lene tepun kilo can mem domba nikre,

²¹lene tepun kilo gom mem bikwop domba pmot nikre ningut gom-gom lene nok.

²²Ma iba kambir nikre ningut gom bibon midut nibiyai nikos ser sisarti. Tug hon nisinati dima lene ibindei ba, TUHAN midip tut limwa Israel ide sisar.

²³Suar ibon midut nindig mindhe titut kep humti dima yok nok nibikum ei midut di jibon bikwop njap-njap pimati.

²⁴Suar ibon midut nindig mindhe titut kep humti dima kikau ei ninsi njap muhwindacan tug hon nisinati dima. Lene midut dima mikum ei nibon midut nindig mindhe titut kep humti kin nibon midut ba anggur ngei pima di ibon bikwop njap-njap. Ba, TUHAN mijoi sut ninghap di ngge kei dima.

²⁵Tirigi idem yam ei mem njap gi nimuhwindacan lene harin dima igyai midyai di buhun a.

²⁶ Tirigi ikinyon ei Njap Ndig Nike Gandumti ba, ittei ide gandum nimbie him mem nibon midut njita nibipai sigyo bak Allahti kwei lene suar idem yam ei mem njap gi nigom. Harin dima igyai midyai di buhun mem njap dima a.

²⁷Suar ibui sapi pmot nikre ningut can kin domba nikre ningut gom kin domba pmot nikre di ide njap dem ari bingwam gom ningut muhwindacan mem nibon midut nindig mindhe titut kep humti ba, bikwop mindhe-ndhe dima hagom bok-ba bi. Lene TUHAN mijoi sut ninghap di ngge kei dima.

²⁸Lene suar ittei tepun di iba mini zaitun bisrigsi mem nibon midut njita nibipai sigyo bak Allahti. Tepun kilo ningai mem bikwop sapi nikre ningut gom-gom lene tepun kilo can mem domba nikre,

²⁹lene tepun kilo gom mem bikwop domba pmot nikre ningut gom-gom lene nok.

³⁰Ma iba kambir nikre ningut gom bibon midut nibiyai nikos ser sisarti. Tug hon nisinati dima lene ibindei ba, TUHAN midip tut limwa mben Israel ide sisar.

³¹Lene midut dima bitut nibon midut ba anggur ngei mikum ei nibon midut nindig mindhe titut kep humti kin nibon midut njita nibipai sigyo bak Allahti di jibon bikwop njap-njap.