Read Hatam MBEN ISRAEL IMBUT-MBUT NYEN 3 Bible Online

MBEN ISRAEL IMBUT-MBUT NYEN 3 - Hatam bible

MBEN ISRAEL IMBUT-MBUT NYEN 3

¹Mpe di TUHAN mbrap bit Musa ei Nungug Sinai lene Harun kin Musa igya tut ide ig bei nsi nya di inyeng rinok gini.

² Harun de munggwom nipinai nya ibou bitai ba, mighumbou ninyeng rino Nadab ba, Nadab bon nikinjoi bat nya di inyeng rino Abihu kin Eleazar kin Itamar.

³Musa ta yoni nok imam nya nipou su tug hon nibon midut niba mini biprok ibou nggram him.

⁴ Noro Nadab kin Abihu itug ndei nimai ei iggum ndigsi Sinai tirigi po ittei hum di kwes-kwau bi bigya tut ei TUHAN Noho bei pima. Yo cin dima ibon imunggwom bat nya hi bi. Gima rino Eleazar kin Itamar igyai midyai nok imam bit Harun mem nijam di icig no niyaisi jo yo.

⁵Lene TUHAN pai bak Musa,

⁶“Ma acuk limwa keret Lewi nya ba, ikwei ya ei aho bei leu api ata yok nok yo di impu Harun.

⁷Suar iba midyai di igyai ei Ditde Prak Meng nsi bahati tut Harun kin imam nindigsi bitut mben Israel yahagom cem.

⁸Suar yoni inyohou dimig Ditde Prak Meng bitut nimbumbati nya hagom. Iba midyai di igyai ei Ditde Prak Meng nsi dima bigya luei mben Israel nindigsi nya.

⁹Dindo midyai dima bak limwa keret Lewi yongkom ba, igyai kikau.

¹⁰Noro suar ata Harun kin nipmot bat nya mem gima ibindei mbut midyai di imam nya ide. Ter leu yoni lene tungwa tou rino bingon biyai midyai dima mitug ndei hukum nimai drek dip.”

¹¹Lene TUHAN binut bu bipai bak Musa,

¹² “Nogindini dimbus yo di intun keret Lewi him bigya luei munggwom pinai mighumbou mben Israel yahagom. Keret Lewi nya ne Ditde nya ri.

¹³Mpe di diyai nimai bak mben Mesir imunggwom bat mighumbou nya yahagom lene didimig mben Israel ipmot bat mighumbou nya kin ide mindhe-ndhe nihyen kep nipmot bou nya hagom pijum ei mem Danti. Ditde gima yok hagom. Dani ne TUHAN ri.”

¹⁴Tirigi mben Israel ingat rin ei iggum ndigsi Sinai lene TUHAN cuk Musa,

¹⁵bipas kep yo di intun Lewi him inyeng bibit leu yo di ndigpoi nya igwam-gwam yam dip tut yok nya bikwop ide bat nya kin ide ig bei nsi nya cem sindam. Gini bitut munggwom pinai di ide njap ug ei bed gom bikui cem ba, suar ipas inyenga.

¹⁶Lene Musa yai igbit TUHAN nicukti dima.

¹⁷Lewi yai nipmot bat nya ibou ningai di inyeng rino Gerson kin Kehat kin Merari. Bikwop yoni inok pung di ide bat nya kin ide ig bei nsi nya intun him ba, igyai inyeng bibit leu munggwom dima inyenga.

¹⁸Gerson yai nipmot bat nya ibou can di inyeng rino Libni kin Simei.

¹⁹Kehat yai nipmot bat nya ibou bitai di inyeng rino Amram kin Yizhar kin Hebron kin Uziel.

²⁰Merari yai nipmot bat nya ibou can di inyeng rino Mahli kin Musi.

²¹Gerson nide bat nya rino Libni kin Simei bitut ide ig bei nsi nya.

²²Pinai di ide njap ug ei bed gom bikui di imbier kim Gerson imangti ibou sribu muhwindacan ba, sratus muhwi.

²³Lene Gerson nya yohok ide prak meng nya ei nite bei mpia nicutti hammi TUHAN De Prak Meng ninghim.

²⁴Elyasaf di Lael nipmot ne nibou mem Gerson nide bat nya ri.

²⁵Gerson nya inyohou dimig minyahas mem TUHAN De Prak Meng di jo bei ninsi kin minyahas di ibinggai kep kin minyahas di ipindur ser dimbou tausi ei Ninsi Di Kwes,

²⁶kin sar minyahas di bikrop ttai Prak Meng ningat kin nimbar hum dok kin minyahas di ipindur ser dimbou di itu ei sar him cem. Yoni yahati tut midyai di bitut ndigban dima yok hagom.

²⁷Kehat nide bat nya rino Amram Yizhar Hebron Uziel yoni bitut ide ig bei nsi nya.

²⁸Pinai di ide njap ug ei bed gom bikui di imbier kim Kehat imangti ibou sribu muhwindaningai ba, sratus muhwindagom. Yoni inyohou dimig ndigban ei Ninsi Di Kwes.

²⁹Lene Kehat nya yohok ide prak meng nya ei nite bei mpia nibiho hammi TUHAN De Prak Meng ninghim.

³⁰Elisafan di Uziel nipmot rinok nibou mem Kehat nide bat nya.

³¹Kehat nya inyohou dimig Brua Gi Preu kin meja kin mini njeng nidihim kin nimbar nya kin mun di imam nya ibiyai midyai ei Ninsi Di Kwes nya kin minyahas di bikkin Ninsi Di Kwes nya. Yoni yahati tut midyai di bitut ndigban dima yok hagom.

³²Harun nipmot Eleazar nok nibou mem keret Lewi nide bat nya di intun yam him. Noni ne mindor mem imam nya di igyai midyai ei Ninsi Di Kwes ri.

³³Merari nide bat nya rino Mahli kin Musi bitut ide ig bei nsi nya.

³⁴Pinai di ide njap ug ei bed gom bikui di imbier kim Merari imangti ibou sribu muhwindagom ba, sratus can.

³⁵Zuriel di Abihail nipmot rinok nibou mem Merari nide bat nya. Merari nya yohok ide prak meng nya ei nite bei mpia nijjai hammi TUHAN De Prak Meng ninghim.

³⁶Merari nya inyohou dimig TUHAN De Prak Meng ninggilai bitut biei njiti nya kin cou nya kin cou nitriti di iprion mem nya kin nimbumbati nya hagom. Yoni yahati tut midyai di bitut ndigban dima yok hagom.

³⁷Lene inyohou dimig cou nya kin cou nitriti di iprion nya kin keu di sren nya kin kuk nya mem sar di bikrop ttai TUHAN De Prak Meng dima cem.

³⁸Lene suar Musa kin Harun bitut ipmot bat nya yohok ide prak meng ei mben Israel ide prak meng yati hammi TUHAN De Prak Meng nuhui nite bei mpia nipriti. Yoni yahati tut midyai di bitut nibon midut nikuk yok bak TUHAN nyati mem mben Israel ei Ninsi Di Kwes. Ter leu yoni lene tungwa tou rino bingon biyai midyai dima mitug ndei hukum nimai drek dip.

³⁹Musa bit TUHAN nicuk noti ba, pas kep pinai nya leu Lewi ninsi de di intun yam him di ide njap ug ei bed gom bikui inyeng bit leu hi ninsi de hi ninsi de bikwop hagom ba, imangti ibou sribu ningot can bican.

⁴⁰TUHAN pai bak Musa “Ma apas kep mben Israel ide munggwom pinai mighumbou nya di ide njap ug ei bed gom bikui yahagom inyenga.

⁴¹Yo dima ne Ditde ri. Lene ma keret Lewi yahagom igya luei munggwom pinai mighumbou dima yok. Lene ma Lewi nya ide mindhe-ndhe di ighyen kep nya hagom igya luei mben Israel ide mindhe-ndhe nipmot bou di bep ei ide mindhe-ndhe di ighyen kep nya ikieti nya hagom. Dani ne TUHAN ri!”

⁴²Lene Musa bon mun igbit TUHAN nicuk noti. Noni pas kep munggwom pinai mighumbou,

⁴³di ide njap ug ei bed gom bikui yahagom inyeng ba, yahagom imangti ibou sribu ningot can bican ba, sratus can ningot muhwindacan ningai.

⁴⁴Lene TUHAN pai bak Musa,

⁴⁵“Ma adimig keret Lewi pijum ei mem Dani ba, igya luei mben Israel ide munggwom pinai mighumbou yahagom. Lene adimig Lewi nya ide mindhe-ndhe di ighyen kep nya bigya luei mben Israel ide mindhe-ndhe nipmot bou di bep ei ikieti di ighyen kep nya.

⁴⁶Mben Israel ide munggwom pinai mighumbou nya imangti ibou sratus can ningot muhwindacan ba, ningai bidor njiriek leu Lewi nya imangti apino suar jiba mitiei bikum luei nimangti di dor njiriek dima yohoti hanyen bak TUHAN.

⁴⁷Suar jiba mitiei perak nitig muhwi bikum luei munggwom dima yok gom-gom yohoti hanyen bit leu nok nibok di jikrau kep ei Ditde Prak Meng nsi.

⁴⁸Lene ayai mitiei dima bak Harun kin nipmot bat nya.”

⁴⁹Lene Musa yai hagom bit leu TUHAN nicuk noti ba,

⁵⁰ug mbus mitiei perak nitig sribu gom sratus ningai ba, ningot muhwindagom muhwi,

⁵¹lene yai mitiei dima bak Harun kin nipmot bat nya.