Read Hatam MBEN ISRAEL IMBUT-MBUT NYEN 31 Bible Online

MBEN ISRAEL IMBUT-MBUT NYEN 31 - Hatam bible

MBEN ISRAEL IMBUT-MBUT NYEN 31

²“Ma jibuhup hanyen bijikon pran bit mben Midian drek dip mun po ibon bak je di mben Israel pima. Gima ngwig leu lene amai ug ri.”

³Leu api Musa pai bak mben Israel “Ma jitin ei mem jikon pran bit mben Midian leu binhyepo TUHAN ba jeni bikes Nide hukum ei yok dip.

⁴Suar bikwop keret mben Israel hi gom hi gom kes tentara nya ibou sribu gom mem gima injei siceu ba, ikon pran a.”

⁵Gima rino bikwop keret mben Israel imbus ibou sribu gom ba, yahagom sok yam ibou sribu simnaibrimigcan ba, yahagom itin ei mem gima ikon pran.

⁶Musa cuk yok ba, injei bit Pinehas di Imam Eleazar nipmot mem gima ikon pran. Pinehas pwoi nimbumbati di kwes-kwau nya kin pun mbrei leu binhyepo miep bitto yok.

⁷Lene tentara pima yok injei siceu bit leu TUHAN nicuk Musati ba, ikon pran bit mben Midian leu api igyai nimai bak pinai nya yahagom,

⁸bitut nibou ndig Midian ibou muhwi di inyeng rino Ewi kin Rekem kin Zur kin Hur kin Reba ba, igyai nimai bak Bileam di Beor nipmot cem.

⁹Tentara Israel ikat sop Midian nya kin munggwom di ide nya lene ipos ide mindhe-ndhe di nindig nya kin ide domba kambir nya kin ndigban di inyeng tut nya hagom ba,

¹⁰indig minu ndig kin prak meng yati di ide nya cem.

¹¹Gima leu api tentara pima yok ittei mun di ipos pima yok hagom bibuwak tungwatu di ikat yok nya bijem mindhe-ndhe di ipos nya,

¹²bingkwei sut hagom ndam Musa kin Imam Eleazar kin limwa Israel yahagom. Mpe dima mben Israel ingat rin ei ide prak meng yati nya ei briep bou him Moab di birok kik minu ndig Yerikho ei Minyei Yordan nite dima ug.

¹³Leu api Musa kin Imam Eleazar kin nibou mben Israel nindigsi nya yehei leu prak meng yati biyuug um tentara nya.

¹⁴Noro hammi tirigi yuum yam rino Musa gga nibou ndig tentara nya kin nibou nimpung nya,

¹⁵bipai biyok “Nggon rino jisindui sut sop dima yok di igyaijo i?

¹⁶ Jikan kep bipia sop dima yok rino ibit Bileam nipingok yokti bihwen limwa mben Israel ingonti leu binhyepo iba inghim bak TUHAN ei Peor pima bi e? Ba, igyai munti dima bindei di nsuwer ajar pima cut igkep TUHAN de limwa nya!

¹⁷Gima rino ma jiyai nimai bak bikwop munggwom pinai nya kin sop di ibon mun tu nya yahagom nogindini hak ug.

¹⁸Noro ma jenti jikwas sop gwam nitta pilei nya tut ba, jima yok bou je nok jide.

¹⁹Lene suar je di jiyai nimai bak tungwatu nya kin je di jingget nimai ngut jahagom jigwam ei prak meng yati nisai kikau ug ei njap muhwindacan. Suar jibon midut nipiap jenti kin sop gwam nitta pilei pima yok bipwoi ei njap gi niningai kin njap gi nimuhwindacan.

²⁰Suar jibindei kwes bikwop jide sinsun kin mun di jiba mindhe ngkek kin kambir nta kin biei bibon nipou ug e.”

²¹Leu api Eleazar pai bak yo di sindi ingkwei hanyen leu nikon pranti dima “TUHAN yai nicukti dini bak Musa,

²²yuug yai ide mun di iba mas kin perak kin ngkimom-tembaga kin ngkimom nitu kin ngkimom-jep nitiei kin nimmun cem bibon,

²³bitut mun nyeng hagom di bit bon hum yem kan bi nindigsi nya lene suar ibindei kwes tug hon hum a. Lene suar iba minyei nibon midut nipiap bipwoi pima bipiap ndigban nindigsi di bon hum yem nya leu binhyepo map kuisi bu bi.

²⁴Lene suar itot ide sinsun ei njap gi nimuhwindacan leu api map kui yokti bu bi ba, ingkwei hanyen kwei ei prak meng yati.”

²⁵Lene TUHAN pai bak Musa,

²⁶“Suar aya tut Eleazar kin nibou mben Israel nindigsi nya ba, jikwop mun di tentara ipos nya hagom bitut tungwatu di ikat yok nya kin mindhe-ndhe nya cem.

²⁷Lene jikwas mun pos dima canti ba, nimangti dem yam. Ba, nite hi mem tentara di yuug kon pran nya lene nite hi mem limwa nindigsi nya.

²⁸Tut mun di tentara nya ima bou yok pima lene suar ikwas ningat gom leu nimangti sratus muhwi pijum ei tut Da di TUHAN bitut tungwatu di ikat yok kwei kin sapi nya kin keledai nya kin domba nya kin kambir nya di ipos kwei cem.

²⁹Ayai gima hagom bak Imam Eleazar tereu nok munkwas di jikwas pijum ei tut Da di TUHAN.

³⁰Tut mun di limwa mben Israel nindigsi nya ima bou yok pima lene suar jikwas tungwagom leu ibou ningot muhwi di tentara ikat yok kwei bitut sapi nya kin keledai nya kin domba nya kin kambir nya tut Lewi nya di yahati tut Ditde Prak Meng.”

³¹Lene Musa kin Imam Eleazar igyai hagom bit leu nok TUHAN nicuk yokti.

³²Mun pos nikenti di tentara igyai nimai bak bi nya pima ne domba kin kambir nimangti ningut sribu sratus muhwindagom ningot muhwindacan muhwi kin sapi ningut sribu ningot muhwindacan can kin keledai ningut sribu ningot muhwindagom gom kin sop gwam nitta pilei di ibon mun bigyo nya ibou sribu ningot ningai can.

³³

³⁴

³⁵

³⁶Bihi leu nimangti dima di igyai bak tentara nya pima nimangti ug ei domba kin kambir ningut sribu sratus ningai ningot ningai muhwindacan ba, sratus muhwi,

³⁷lene ikwas ningut sratus muhwindagom muhwindacan ba, muhwi leu nimangti dima pijum ei bak TUHAN,

³⁸kin sapi ningut sribu ningot ningai muhwindagom ba, ikwas ningut ningot muhwindacan ba, can leu nimangti dima pijum bak TUHAN,

³⁹kin keledai ningut sribu ningot ningai sratus muhwi ba, ikwas ningut ningot muhwindagom ba, gom leu nimangti dima pijum bak TUHAN,

⁴⁰kin sop gwam nitta pilei di ibon mun bigyo nya ibou sribu simnaimuhwidip brimigtehigom ba, ikwas ibou ningot ningai ba, can leu nimangti dima pijum ei bak TUHAN.

⁴¹Leu api Musa kes tentara ide munkwas pijum ei dima bak Imam Eleazar tereu nok ibikuk yok bak TUHAN bit leu nok TUHAN nicuk noti.

⁴²Bihi leu nimangti dima di igyai bak limwa nya pima noyam kin tentara nya ide ba,

⁴³domba kin kambir nimangti ningut sribu sratus ningai ningot ningai muhwindacan ba, sratus muhwi kin sapi ningut sribu ningot ningai muhwindagom kin keledai ningut sribu ningot ningai ba, sratus muhwi kin sop gwam nitta pilei di ibon mun bigyo nya ibou sribu simnaimuhwidip brimigtehigom.

⁴⁴

⁴⁵

⁴⁶

⁴⁷Leu mun di limwa Israel nindigsi nya ima bou yok dima lene Musa kwas tungwagom leu ibou ningot muhwi kin bibikwop mindhe-ndhe ningut gom leu ningut ningot muhwi pima cem tut Lewi nya di yahati tut TUHAN De Prak Meng bit leu nok TUHAN nicuk noti.

⁴⁸Lene nibou tentara nya ikwei ngat Musa,

⁴⁹bipai bak “Andigpoi e, nikwop tentara di nyeni ninyeng tak kep yok nya lo, yahagom ingat rin ba, hi yai nimai bipror leu nye bi.

⁵⁰Gima rino nittei mimau nya di iba mas bibon hagom nok srak ninda kin srak nimig kin srak nindapijum kin mitingou him kin mbrawin di indei ei ikimam hagom di nye di tentara nipos nya kwei. Nikwas hagom pijum bak TUHAN nok mun di nibikuk nye bak leu binhyepo Noni nyohou nyeni kikau.”

⁵¹Leu api Musa kin Imam Eleazar igyai mimau di tungwatu iba mas bibon dima hagom leu tentara nya ba,

⁵²hagom sok yam nibuhunti kilo sratus can.

⁵³Noro ikwop mas di nibou tentara ide limwa di tentara ipos mem yonti nya bi.

⁵⁴Lene Musa kin Imam Eleazar ikon mas dima ug ei TUHAN De Prak Meng nsi leu binhyepo TUHAN nyohou mben Israel.