Read Hatam MBEN ISRAEL IMBUT-MBUT NYEN 32 Bible Online

MBEN ISRAEL IMBUT-MBUT NYEN 32 - Hatam bible

MBEN ISRAEL IMBUT-MBUT NYEN 32

¹Lene keret Ruben kin Gad ibon ide mindhe-ndhe di ighyen kep nya mang bibor. Tirigi ingat lo, minu Yaezer kin Gilead bon nikeisi mem ide mindhe-ndhe nya,

²lene yuug ngat Musa kin Imam Eleazar kin nibou mben Israel nindigsi nya bipai biyok,

³“Minu dini bitut minu ndig di Atarot kin Dibon kin Yaezer kin Nimra kin Hesybon kin Eleale kin Sebam kin Nebo kin Beon,

⁴di mben Israel igyai bigyati tug hon TUHAN nimpu nyeti dini bon nikeisi mem mindhe-ndhe nihyen kep nya. Ba, nyende mindhe-ndhe mang bibor.

⁵Gima rino nahara leu binhyepo jikwas dihyei dini tut nyeni binibong timiei eisi. Ma jiyok ngon mem gima nipri ug ei Minyei Yordan nite dima ug ba, nibong timiei ei sirima au.”

⁶Lene Musa buhup biyok “Nggon rino mijibong timiei ei minu dini lo, jisut bat tentara Israel nindigsi nya yuug kon pran i?

⁷Nggon rima jibindei mben Israel ingon kiek ba, isigon Minyei Yordan biyuug dihip ei nite dima ug bicoi ug ei minu di TUHAN yai biyok bi i?

⁸ Lewo jicig bat nya cem igyai nok gima mpe di ingat rin ei Kades-Barnea bidicuk yok mem gima igyok itta kep minu dima.

⁹Yoni yuug yok itta kep minu dima lo, ingkwei hon Mbang Briep Eskol. Mpe di ikwei krau hanyen lene ibindei mben Israel ingon kiek ser nhyema icoi ug ei minu di TUHAN yai bak yoni bi.

¹⁰ Apino TUHAN gga yok bipai,

¹¹‘Yo dini iba ingon di gom bibit Da bi. Gima rino deheng tut bipia bikwop yo di ide njap ug ei ari bingwam nyatungwagom bikui mpe di po yehei leu minu Mesir pima lene hi dima micoi ug ei minu di dipreu ei bak Abraham Ishak Yakub yoni pima bi.’

¹²Midikes hukum ei yo dima yahagom dip noro bitut Kaleb di Yefune di nimbier kim keret Kenas kin Yosua di Nun nipmot bi. Midikes hukum ei yo cin dima dip bi lewo ingon gom tut Dani.

¹³TUHAN gga mben Israel apino sindui sut yok ba, imbut-mbut wai ei iggum ndigsi kikau mem nijam ari bingwam ningot bitai bibou nimpung di indig sur yam ei nijam dima di ikiek imig jou tut TUHAN pima imai bingwig leu ug e.

¹⁴Lene nogindini jeni cem jingkek nddok nok jicig bat nya! Jeni ne nimpung nibon sisar rin ba, jibinduk TUHAN nigga biborti kep mben Israel hanyen bu!

¹⁵Gino jikiek je bijiba jinghim bak TUHAN lene Noni misindui sut limwa dini yahagom ei iggum ndigsi bijo ninno hanyen bu apino mijibiang isar hanyenti nibuhunti!”

¹⁶Lene keret Ruben kin Gad dima idideu Musa bipai bak “Nna ba niwin sar di ngkiem ser nyende domba nya ba, niwin minu ndig di bon tentara nibousi di igya coi cem mem nimunggwom bat kin nitnem bat nya nipou ug e,

¹⁷leu api haninyai minitin ei mem ninjei bit nisut bat nya leu binhyepo nikon pran bit siceu nya. Minittei nibou tut yok ba, nikon pran dima leu binhyepo limwa mben Israel micoi ei minu dima bibong timiei eisi. Noro nyeni nimunggwom bat kin nitnem bat nya mibong nyahan mem nijam dima ei sirini ei minu ndig di bon tentara nibousi di igya coi ba, bit bon timiei minu dini ihwen yok kan bi.

¹⁸Miningkwei hanyen kwei ei nyende ig bei bi bibou mben Israel yahagom ima ide dihyei mem ide mun ninda rom nya ug e.

¹⁹Miniyai dihyei hanjop nsi poi mien bit yok ei Minyei Yordan nite dima ug bi lewo nima nyende dihyei nok mun di ninda rom nya ei Minyei Yordan nite bei mpia nipriti tu.”

²⁰Lene Musa buhup “Gino ningat ne jipai nijit tu lene ma jitin ei bou TUHAN niyai him mem jikon pran ba,

²¹jide tentara injei siceu ba, isigon Minyei Yordan leu api ihwen siceu nya. TUHAN mibie tut yok kikau bibou Noni bindei timek siceu nya bingwig ug e ba,

²²ninyeng tak kep minu dima hagom. Gima ngwig leu lene ma jingkwei hanyen lewo jibit TUHAN nicuk jeti dima tu ba, nikon pran mem jisut bat nyati pima ngot jeni bu bi. Gima leu lene TUHAN miyai dihyei ei Minyei Yordan nite bei mpia nipriti dini bijeni nok jide.

²³Noro ma jiyok ngon kep bipia gino jiyai bipek kep mun di jipreu ei pima bi lene jibon sisar tut TUHAN ba, mijitug ndei hukum drek dip.

²⁴Ma juug win jide minu ndig nya kin ig kandan mem jide mindhe-ndhe hak ug noro ma jibbwe ser jihyet nghwak po jipreu ei pima au. Ma jiyai bipek kep!”

²⁵Lene keret Gad kin Ruben ipai bak “Andigpoi e, miniyai bipek kep mun di na di Andigpoi acuk nye tut nya hagom.

²⁶Minikes nimunggwom bat kin nitnem bat nya kin sapi kin domba di nihyen kep nya hak ei sirini ei minu ndig nya di niwin ei Gilead.

²⁷Noro nye dini ne nitin ei ba, TUHAN mibie tut nye leu api minisigon Minyei Yordan ba, nuug dihip ei nite dima ug ba, nikon pran bit leu nok na di Andigpoi acuk nyeti pima.”

²⁸ Leu api Musa cuk Imam Eleazar kin Yosua kin nibou mben Israel nindigsi bipai,

²⁹“Gino keret Gad kin Ruben ibit TUHAN Nihyet ba, isigon Minyei Yordan ba, yuug dihip ei nite dima ug mem gima ikon pran ba, impu je bijicoi ug ei minu dima bijibong timiei eisi cem lene ma jikwas dihyei di Gilead tut yok ba, ibong timiei eisi hak ug.

³⁰Noro gino yoni isigon Minyei Yordan ba, ikon pran bit je bi lene suar igyai dihyei ninda rom bit jeni ei minu Kanaan noyam kin jeni.”

³¹Lene keret Gad kin Ruben ibuhup bak “Andigpoi e, nyeni miniyai mun di TUHAN cuk nye tut.

³²Minisigon Minyei Yordan ba, nuug dihip ei minu Kanaan lene TUHAN mibie tut nye leu binhyepo nikon pran. Tug hon nisinati dima lene nyeni ninyeng mitak kep dihyei di jo Minyei Yordan nite bei mpia nipriti dini kikau.”

³³Leu api Musa kes Sihon di nibou ndig mben Amori de hanjop nsi kin Og di nibou ndig Basan de hanjop nsi bitut minu ndig nya kin dihyei di jo ttai nya titut yam bak keret Gad kin Ruben kin Manasye niken.

³⁴Lene keret Gad iwin minu ndig di Dibon kin Atarot kin Aroer,

³⁵kin Atarot-Sofan kin Yaezer kin Yogbeha,

³⁶kin Bet-Nimra kin Bet-Haran hanyen binok minu ndig di bon tentara nibousi di igya coi lene binok mpia di ig kandan joti cem.

³⁷Ba, keret Ruben iwin minu ndig nya di Hesybon kin Eleale kin Kiryataim,

³⁸kin Nebo kin Baal-Meon kin Sebam hanyen. Noro iluei minu ndig di iwin hanyen dima hagom ninyeng hanyen.

³⁹Mpe dima ne Makhir di Manasye nipmot nide bat nya injei bihwen minu Gilead leu api igyai bigyati lene ijji mben Amori leu dihyei dima.

⁴⁰Gima rino Musa yai dihyei Gilead dima bak Makhir nide bat nya ba, ibong timiei eisi.

⁴¹Mpe dima cem Yair di ntun Manasye him njei ba, hwen minu mien gom-gom leu api yai biyati lene jem minu mien dima ninyeng “Minu Mien Di Yair De.”

⁴²Mpe dima cem Nobah njei ba, hwen minu ndig Kenat bitut minu mien di gahai nya ba, yai biyati. Leu api jem minu dima ninyeng Nobah noyam kin nonti ninyenga.