Read Hatam MBEN ISRAEL IMBUT-MBUT NYEN 36 Bible Online

MBEN ISRAEL IMBUT-MBUT NYEN 36 - Hatam bible

MBEN ISRAEL IMBUT-MBUT NYEN 36

¹Mpe dima ne nibou ig bei nsi nya leu Gilead di Makhir nipmot di bon nignyon Manasye di Yusuf nipmot nide bat nya yuug ngat Musa kin nibou nindigsi nya ba,

² ipai biyok “TUHAN cuk je bijikwas dihyei dima tut mben Israel tug hon niko nibinggok tut ba, Noni cuk jeni leu binhyepo jiyai dihyei ninda rom di nyende adig-ajoi Zelafehad de bak nipmisop bat nya cem.

³Noro suar jiyok ngon kep bipia gino sop dima yok iwak pinai di intun keret hiter nya him lene ide dihyei ninda rom dima cem cut ei keret dima nindati. Gi nok gima lene dihyei dima di jikos tut binok nyende hanjop nsi pima nite hi mipror leu dihyei ninda rom di nyende keret ima bou yok.

⁴Lene tirigi nyeni icoi ei Ari Bingwam Ningkwei Hanyenti lene tungwatu nya ingkwei dihyei di ipek di ima bou yok nya hagom bak niceu di nipou ngig-ngat hanyen lene Zelafehad nipmisop bat nya ijjep bat nya miba yo kep itnem bat nya ide dihyei nok dihyei ninda rom bijo kikau. Apino dihyei dima mipror leu dihyei ninda rom di nyende keret ima bou yok.”

⁵Leu api Musa tri tut TUHAN nicuk yokti bak mben Israel “Mun di yo di intun Yusuf him ipai dima ne igbit ri.

⁶Gima rino TUHAN ce tut bipia Zelafehad nipmisop bat nya igyati kwes ba, iwak pinai bit leu ingon kanti lo, ma iwak pinai nya di intun yonti ide keret him he.

⁷Suar bikwop mben Israel ide keret nya he rino inyeng tak kep ide dihyei ninda rom.

⁸Suar bikwop sop di ninyeng tak kep dihyei ninda rom ei keret mben Israel gom de hanjop nsi dima wak pinai di ntun keret dima him cem. Tug hon nisinati dima lene bikwop keret mben Israel inyeng mitak kep dihyei ninda rom di idigup bat-idigai bat ide.

⁹Apino dihyei ninda rom dima mipri-pri nyen leu keret gom ninda nsi ug ei keret hiter ninda nsi bi. Bikwop keret mben Israel inyeng mitak kep yonti ide dihyei ninda rom kikau.”

¹⁰Gima rino Zelafehad nipmisop bat nya ibit leu TUHAN nicuk Musati ba,

¹¹Mahla Tirza Hogla Milka Noa yoni pima iwak ide adig-ajoi di imbier kim bei icigya.

¹²Iwak pinai nya di intun idigup gom him tug hon Manasye di nicig Yusuf. Tug hon nisinati dima lene ide dihyei ninda rom jo mem icig nide keret kikau.

¹³Gima ne nicukti nya kin nikos tutti nya di TUHAN yai bak mben Israel tug hon Musa ei mpe di mben Israel ingat rin ei briep bou him Moab di birok kik Yerikho ei Minyei Yordan nite dima ug ri.