Read Hatam MBEN ISRAEL IMBUT-MBUT NYEN 5 Bible Online

MBEN ISRAEL IMBUT-MBUT NYEN 5 - Hatam bible

MBEN ISRAEL IMBUT-MBUT NYEN 5

¹TUHAN pai bak Musa,

²“Ayai nicukti dini bak mben Israel. Suar yoni ibindei hei yo di icut ei nikineiti tug hon bras mbrei di yem yok kin ninggwen nikei bisi kin ningget nimai ngut cem yahagom leu ide prak meng yati.

³Suar icuk yo di map kui yokti dini yahagom biyuug ei nisai leu binhyepo ibindei ba, map kui prak meng yati dima bi. Lewo dingat rin bit Ditde limwa nya ei mpia ttou nsi dima.”

⁴Lene mben Israel ibit nicuk yokti dima ba, ibindei hei yo di map kui yokti dima leu ide prak meng yati.

⁵ TUHAN yai nicukti dini yok bak Musa mem mben Israel. Gino tungwa hi ningon gom tut TUHAN bi ba, yai mun tunggwei sut nindigsi nya,

⁷lene suar no dima pai jit nide sisar leu api go nibuhup hanyen bak hiter di noni yai mun tunggwei sut pima lene ba mitiei nitig can leu ningot gom lene nok bikum eisi bu.

⁸Noro gino hiter di noni yai mun tunggwei sut pima mai leu ba, bon nide bat hi bi lene ma noni yai mitiei nigo nibuhupti dima bak TUHAN ba, imam nya ima bou yok. Ma no di yai mun tunggwei pima ba mitiei nigo nibuhupti dima bikum ei domba nikre di suar noni kwas pijum ei mem nide nibon midut nibiyai nikos ser sisarti.

⁹Lene imam di ya hacan mem no dima nongkom ma mitiei nigo nibuhupti dima bou no nok nide. Gima ne nicukti tut mun di mben Israel ikwas pijum ei di ter leu nibon midut niyai kepti nya ri.

¹⁰Mun di tungwagom-gom ttei bikwas pijum ei tut TUHAN lene mem no dima nonti. Noro mitiei nigo nibuhupti pima di kes bak imam lene imam dima ma bou no nok nide.

¹¹TUHAN cuk Musa,

¹²biyai nicukti nya dini bak mben Israel. Gino sop gom bon mun tunggwei sut nijjep ba, ningon gom tut noni bu bi,

¹³ba, yem njita tut pinai wak cam hiter niku lo, nijjep krau mungkun bi lewo hi ngat yok bou niyai him ba, tau kep yok hammi tirigi igyem njita tut yam cem bi ba,

¹⁴gino nijjep bou dut ser nitnem lene ba ningon ko nitnem di bon mun hi tu cem ba ningon biko nitnem di bon mun hi bi ugwai-gwai cem,

¹⁵lene suar no dima buwak nitnem ug ei imam noho bei bipwoi tepun kilo gom bit leu nok nicukti tut munkwas dima. Lene ma imam dima hug mini zaitun kin biei nggrai di ui-gwang kei bibahap tepun dimati au. Lewo gima ne munkwas di leu nijjep di ba ningon ko nitnem pima rin ba, noni ba nibon midut dima binggok tut nitnem ningon ngunti kin ningon muisi.

¹⁶Suar imam cuk misop dima buug ya kui nimbar hum dok ei TUHAN Noho bei a.

¹⁷Leu api imam yai mok igtuyap ningat gom bisiber minyei kwes-kwau poi mien eisi. Gima leu api kam dihyei ndung poi mien leu ig jou ei TUHAN De Prak Meng nsi bikes ei minyei dimati.

¹⁸Leu api kwek minyahas di nggai kep sop dima nibou nta leu lene kes tepun nikwas nibindat niba ningon ko pima ei nindati ba, imam nonti krau minyei mpo-mpam di bindei nisigion sop dima ei nindati.

¹⁹Gima leu api suar imam ndat kep neheng lene cuk sop dima bice kep neheng dima nok gini “Gino ayem njita tut pinai wak cam hiter bi lene nisigionti di tug hon minyei mpo-mpam dini micut igkep na bi.

²⁰Lo, gino ayem njita tut pinai wak cam hiter tu,

²¹lene handei kon ba, TUHAN bindei ba, mben Israel yahagom imbriom anyeng bijo ninno bijo kikau. Handei kon ba, Noni bindei ba, akei bisi njui-jua lene anghop dwoi mai kei.

²²Minyei nisigionti dima mipijuk anghopti bibindei ba, anghop dwoi mai kei lene akei bisi njui-jua.” Lene suar sop dima buhup “Dani dice tut bidisindui sut TUHAN yai nok gima.”

²³Lene suar imam pas nisigionti dima ei srat kijumti lene ba minyei mpo-mpam dima bidip leu binhyepo silip bibiyam ug ei mok igtuyap pimati.

²⁴Nipou tirigi imam cuk misop dima bidut minyei mpo-mpam di sindem mem gima bindei ba, yai nidut nindig bibor binoni drek dip bigyo,

²⁵lene suar noni ug yai tepun nikwas leu misop dima nindati ba, su ninda tut kui ei Dani Doho bei leu api ttei ba, kes ei nimbar hum dokti.

²⁶Leu api suar noni kam tepun dima ndrim hi ei ninda bia bei gom nok bindo bipia noni kwas tepun dima hagom tu. Leu api indig tepun dima ndrim hi kep hum ei nimbar hum dokti. Gima hagom nok leu api yai minyei dima bak sop dima bidut.

²⁷Gino sop dima yem njita tut pinai wak cam hiter tu lene minyei dima mibindei ba, noni um nidut nindig bibor. Ninghop dwoi mai kei lene nikei bisi njui-jua. Lene mben Israel yahagom mimbriom ninyeng bijo ninno bijo kikau.

²⁸Noro gino noni bon mun tunggwei bi lene mitug ndei nisigion noti dima bi ba, miyai munggwom yo.

²⁹Gima ne nicukti tut sop di bon mun tunggwei sut nijjep tug hon niyem njita tut pinai wak cam hiter apino map kui noti bibindei nijjep nibou dut tut noni drek dip.

³⁰Kin nicukti tut pinai wak cam gom di nibou dut lene ba ningon ko nitnem di bon mun hi bi cem. Suar pinai wak cam dima buwak nitnem ei TUHAN Noho bei leu binhyepo imam bindei mbut nibon midut dima gau noni.

³¹Pinai wak cam dima ningwes ngun lewo bon mun di tunggwei hi bi noro nitnem biang nibuhunti gino ningat ne bon mun tunggwei sut nijjep tu.