Read Hatam MBEN ISRAEL IMBUT-MBUT NYEN 8 Bible Online

MBEN ISRAEL IMBUT-MBUT NYEN 8 - Hatam bible

MBEN ISRAEL IMBUT-MBUT NYEN 8

¹ TUHAN pai bak Musa,

²“Ma apai bak Harun bipia mpe di noni tin ei mini njeng ningat muhwindacan dima ei nidihimti lene suar ma tin nok gi igbit leu binhyepo piga digai bei nidihim nohobei.

³Lene Harun yai igbit mun di TUHAN pai dima ba, tin mini dima yok leu binhyepo ninjeng piga digai bei nidihim dima noho.

⁴Iba mas di itug su bibon mini njeng nitriti bikui bipek kin nide mitou nibimau nya ba, ibibit leu bindo di TUHAN ndo bak Musa pima.”

⁵Lene TUHAN pai bak Musa,

⁶“Adimig Lewi nya leu mben Israel nindigsi nya ikieti ba, abon midut nibindei kwes yok mem yoni,

⁷tug hon nisinati dini. Ma aba minyei bigimahap yoni mem nibon midut nibindei ningon kwes. Lene acuk yok ba, ikak ingkek dip titut yam bitot ide sinsun nya cem. Tug hon nisinati dima lene yoni mipwoi-pwau.

⁸Leu api acuk yok ba, ijem sapi nikre di nipmot bo ningut gom kwei bigyai njita nibipai sigyoti di iba tepun kin mini bibon di ibikuk yok bak TUHAN cem kwei. Leu api aug jem sapi nikre ningut gom kin bu kwei mem nibon midut nibiyai nikos ser sisarti.

⁹Gima leu api anduk limwa mben Israel yahagom ba, idem yam lene acuk Lewi nya ba, idem yam bigya kui dimbou ei Ditde Prak Meng nuhui a.

¹⁰Suar limwa nya ikes inda bijo ei Lewi nya ibou dip,

¹¹leu api Harun ta Lewi nya noyam kin munkwas di mben Israel idimig pijum ei mem Dani leu binhyepo Lewi nya igyai kep Ditde midyai di dindo biyok.

¹²Leu api suar Lewi nya ikes inda bijo ei sapi nikre ningut can dima ibou dip bibui sapi dima ningut gom mem nibon midut nibiyai nikos ser sisarti lene ibui ningut gom bu mem nibon midut nindig mindhe titut kep hum. Tug hon nibon midut dima lene abindei kwes Lewi nya.

¹³Ma acuk Lewi nya biyuug ya kui Ditde nimbar hum dok ei Harun kin nipmot bat nya yoho bei leu api Harun nya midimig Lewi nya pijum ei mem Dani.

¹⁴Aba nisinati dima bidimig Lewi nya leu mben Israel nindigsi nya ikieti leu binhyepo dima yok bou Da nok Ditde.

¹⁵Niabiati abon midut nidimig Lewi nya pijum ei mem Dani tu lene dem mem gima yoni igyai midyai ei Ditde Prak Meng nsi.

¹⁶Dibindei ba, yoni igya luei munggwom pinai mighumbou mben Israel yahagom yohoti bidima yok bou Da nok Ditde tu.

¹⁷ Mpe di diyai nimai bak mben Mesir imunggwom bat mighumbou nya yahagom lene didimig mben Israel ipmot bat mighumbou nya kin ide mindhe-ndhe nihyen kep nipmot bou nya hagom pijum ei mem Danti. Diyai gima bou Da nok Ditde.

¹⁸Nogindini diyai Lewi nya ba, igya luei munggwom mighumbou mben Israel hagom.

¹⁹Lene dikes Lewi nya yahagom bak Harun kin nipmot bat nya leu binhyepo igyai midyai mem mben Israel ei Ditde Prak Meng nsi lene yahara ser nhyema dikos ser mben Israel ide sisar di idideu Prak Meng di kwes-kwau dima kin gi ibisinggre bi ba, dikes nsuwer ajar ei yok dip bi cem.”

²⁰Lene Musa kin Harun kin mben Israel yahagom ikes Lewi nya hak bak TUHAN dem igbit nicuk Musati.

²¹Lewi nya iba minyei bigimahap yonti mem nibon midut nibiyai ningon kwes kin Allahti ba, itot ide sinsun cem leu api Harun ba nibon midut nibiyai nikos ser sisarti bidimig yok ei nok munkwas di idimig pijum ei mem TUHAN.

²²Mben Israel igyai kep mun nyeng di bitut Lewi nya di TUHAN cuk yok tut hagom. Tug hon nisinati dima lene Lewi nya idem mem gima igyai midyai ei TUHAN De Prak Meng nsi ba, Harun kin nipmot bat nya ibie tut yok.

²³Lene TUHAN pai bak Musa,

²⁴“Bikwop no di Lewi di nide njap dem ari bingwam ningot can ba, muhwi bikui lene suar yai midyai ei Ditde Prak Meng nsi.

²⁵Lo, tirigi nide njap dem ari bingwam ningot muhwi lene ma kes midyai dima ei ba, gwam hak.

²⁶Gima leu su lene ma asindui sut ba, noni mpu Lewi nindigsi nya ei Ditde Prak Meng nsi. Noro ninyeng tak kep midyai di yai kikep hi bu bi. Ma anyohou dimig Lewi nya ide midyai tug hon nisinati dima.”