Read Hatam MBEN ISRAEL IMBUT-MBUT NYEN 9 Bible Online

MBEN ISRAEL IMBUT-MBUT NYEN 9 - Hatam bible

MBEN ISRAEL IMBUT-MBUT NYEN 9

¹ Bed gi nigom ei ari bingwam gi nican niabiati mben Israel ijo leu minu Mesir lene TUHAN mbrap bit Musa ei iggum ndigsi Sinai bipai,

²“Ma acuk mben Israel mem gima ibon midut Njap Ndig Paskah bit leu tto bou di dindo ei su.

³Tto bou dima ne bed dini ei njap ngon bou gi nisimnaibrimigtai mem mpia himmunti ri. Suar mben Israel ibon midut Njap Ndig Paskah dima bit leu nicukti nya hagom.”

⁴Lene Musa cuk mben Israel mem gima ibon midut Njap Ndig Paskah.

⁵Yoni ibon midut dima ei iggum ndigsi Sinai mem mpia hi mmunti ei njap ngon bou gi nisimnaibrimigtai mem bed gi nigom. Igyai mun nyeng hagom dem igbit TUHAN nicuk Musati.

⁶Noro map kui ibou poi ei mben Israel ikieti drek dip gi ingget nimai ngut. Apino bit bon icoi bit yo di ibon midut Njap Ndig Paskah ei njap dima kan bi. Gima rino yo dima yuug ngat Musa kin Harun,

⁷bipai biyok “Map kui nyeti drek dip gi ningget nimai ngut. Noro nggon rino jikuk nye leu dino nicoi bit nibon midut nibui mindhe mem nibikuk nye bak TUHAN bit mben Israel nindigsi nya kan bi i?”

⁸Lene Musa buhup “Joom jingon bibou dinggok tut Allah ningon kanti ug e.”

⁹Lene TUHAN cuk Musa,

¹⁰bipai bak mben Israel “Gino bihi leu jikieti kin jide nintun him yamti di bram yam nya di map kui jeti drek dip gi jingget nimai ngut cem gi jingat rin kak puig sinon di ting bibor cem lo, suar jeni cem jibon midut Njap Ndig Paskah mem Dani.

¹¹Noro suar jibon midut dima ei bed gom gi nidipti bu. Ba, jibon gima mem mmun ei njap ngon bou gi nisimnaibrimigtai ei bed gi nican. Ma jibon midut ei njap ngon bou dima ba, jiyem domba Paskah kin roti di dwoi bi kin simeng di mpo.

¹² Ma jibet njita dima niken hi ei bipek njap tekti au. Lene ma jidahat mindhe di jibui mem jibikuk je bak Dani dima ninjum gom cem au. Ma jibon midut Njap Ndig Paskah dima bit leu nicukti nya hagom.

¹³Noro tut no di map kui no bi kin no di ningat rin ei puig sinon cem bi lo, nghen bibon midut Njap Ndig Paskah dini bi lene dibibon no dima nok no di nggre kin Ditde limwa nya bu bi. Lewo noni kwas mun hi mem nibon midut Njap Ndig Paskah dima bikuk no bak Dani dem igbit tto bou pima bi. Suar no dima biang nide sisar nibuhunti.

¹⁴Gino ngkiai gom di bong timiei ei jikieti joi sut bon midut Njap Ndig Paskah lene ma jisindui sut ba, noni bon lo, bibit leu nicukti kin nikrau kepti hagom di jo tu. Dikos tutti dini mbut mem tungwatu nya yahagom bitut je di timiei mben Israel kin ngkiai pima yok cem.”

¹⁵Lene hammi tirigi imam nya yohok TUHAN De Prak Meng biput tu rino bumbuhui ttou juk kwei bijo nai Prak Meng dima dip.

¹⁶Bumbuhui ttou dima jo nai Prak Meng dima dip mem mpia njap kikau ug bipek mmun leu api luei nitta hanyen bipiga kei dem kep nok cou hum kikau binjap kep.

¹⁷Bikwop mpe dino bumbuhui ttou kui bijo anai leu TUHAN De Prak Meng dip lene mben Israel ilet ide prak meng nya hagom bimbut tut kikau bibou bumbuhui ttou juk hanyen bijo nijoti ug e. Leu api yohok ide prak meng nya ei mpia ttou nsi dima bu.

¹⁸Tirigi TUHAN cuk yok lene yoni ilet ide prak meng nya leu api imbut ba, yohok prak meng nya hanyen bu tirigi TUHAN cuk yok bu. Gino bumbuhui ttou jo nijoti nai TUHAN De Prak Meng bikui bi lene yahagom ibong nyahan ei ide prak meng yati.

¹⁹Gino bumbuhui ttou jo nijoti mem nijam di jei bibor lene mben Israel ibit.

²⁰Mpe hi ne bumbuhui ttou jo nijoti nai TUHAN De Prak Meng mem njap poi he. Mbro nok gima lo, yoni ibong ser ide prak meng behei ba, imbut tut ide prak meng nya cem bit leu TUHAN nicuk yokti.

²¹Mpe hi ne bumbuhui ttou jo nijoti mem mmunti bikui hanyen mem njap bigyokti. Noro itin ei mem imbut hammi tirigi ingat bumbuhui ttou kui hanyen bijo anai.

²²Nok gima cem mem mmun-njap can kin bed nitindur gom kin ari bingwam nitindur gom kin nijam di jei bu ba, gino bumbuhui ttou jo nijoti nai TUHAN De Prak Meng lene yoni imbut bi. Noro tirigi ingat lo, bumbuhui ttou kui su lene imbut.

²³Yohok ide prak meng nya ba, ilet ide prak meng nya cem bit leu TUHAN nicuk yokti di Noni sok ei Musa dip bak yoni.