Read Hatam MIKHA 1 Bible Online

MIKHA 1 - Hatam bible

MIKHA 1

¹ Nabi Mikha nitimieisi leu minu mien di ninyeng Moresyet. Tirigi Nibou Ndig Yotam kin Ahas kin Hizkia inyeng tak kep mben Yehuda bram-bram yam ne TUHAN mbot kep tut ningon kanti bak Mikha tut mben Israel ide minu ndig pmem cin di Samaria kin Yerusalem.

²Je di ngkiai nya ei dihyeisi dini hagom e, ma jingig jitingou mem dihyet! Je di jibong ei dihyei dini nisurti-nipekti e, ma jimiap kep dihyet! TUHAN Di Ninyeng Jei Bibor mikwei nok no di ngat mun nyeng hagom bou niyai him bipai kep jahagom! Ma jimiap kep nihyet di tibim kwei leu Nide Ig di kwes-kwau ei gwamti.

³Noni juk kwei leu nigwam kepti di kwes kei leu api mbut-mbut nyen ei nungug dip nya ei dihyeisi dini.

⁴Noni bindei ba, nungug nya jet bingwig noyam kin lilin di jet ei humti ei nimig jou. Nungug dima jet ba, kau dop kak bisunggung ug ei mbang briepti nya noyam kin minyei di biam leu mbigdip nya kikau ug ei nimig nya.

⁵Mun dini yok hagom micut igkep mben Israel drek dip sisar di ibon kikep kin ide naham nimbuk kep Allahti cem. Tou ribindei dino mben Israel ibon sisar i? Gima ne ide minu ndig pmem di Samaria rin bi e? Tou ribindei dino mben Yehuda ikuk yok bak kwar nya i? Gima ne ide minu ndig pmem di Yerusalem rin bi e?

⁶Gima rino TUHAN pai “Midibindei ba, minu ndig Samaria timek bingwig leu api nigkumti minok ha ngunti leu api tungwatu nya mita ba anggur ei mpia dima. Midinjei tig di jo-jo yam dip ei minu dima hagom ug ei mbang briepti bidinggek nikiou nya.

⁷Midibindei ba, ide kwar di nibok kak bibor nya timek bingwig leu api hum yem ndigban di tungwatu nya ikwas tut sop di ibou sibui nya di mben Samaria icut tut nya ei kwar dima nibousi hagom. Ide kwar nindigsi nya hagom mitimek bingwig. Mben Samaria itug ndei ndigban dima yok hagom tug hon gi ikuk yok bak kwar bikan bipia kwar dima bindei ba, njita beisi nnum kei. Noro tini bu ne ide siceu nya mipos mun dima yok hagom bimbut tut leu binhyepo ibikuk yok bak ide kwar nya.”

⁸Gima rino mun dima yok bindei ba, da di Mikha dingon buhun bibor bidingon ngguk bibor cem. Midikwek srop leu dimig jou bidikui mai he leu api diya-ya nyen nok mun di bindo bipia dingon buhun bibor. Midiyau-yau nyen noyam kin nsien bigbehei ba, dihyet noyam kin ha unta niyausi.

⁹Lewo bit bon mben Samaria nya ibokti jut hanyen kan bi. Ba, mun di buhun bibor dima micut igkep mben Yehuda cem lewo gima ug krau dimbou pmem ei minu ndig Yerusalem di nok dide bat nya itimieisi.

¹⁰Ma jimbot kep mun di buhun di micut igkep nye bak ide siceu nya ei minu ndig Gat au. Ma jisindui sut ba, yo dima ingat jiyai nggwei di kibor au. Je di timiei hanjop Bet-Le-Afra[1] e, ma jirim bijibong ei dihyei ndungti nok mun di bindo bipia jingon cut leu su.

¹¹Je di timiei minu mien Safir e, ma jiba jingat ngu kin jimmai sut jenti bimbut bihigom ug ei jingkiaisi. Timiei minu mien Zaanan ibrim ingkek mem gima yehei leu ide minu bi. Tirigi jimiap tut timiei minu mien Bet-Haezel di ipim kui jei sut nimai ne mijo nibreisi mem je bipia bit bon jigwam coi minu dima hanyen bu kan bi.

¹²Mun di buhun di TUHAN bindei ba, cut igkep timiei minu ndig Yerusalem kwei krau ide dimbou pmem tu! Gima rino bit bon timiei minu mien Marot igyok ingon mem hiter di mikwei mpu yok kan bi.

¹³Je di timiei minu ndig Lakhis e, ma jiba kuda bikri jide kroba pran nya. Timiei minu ndig Yerusalem ingig igyai kep jiyai munti di kinei bibor leu api igyai bram jiyaisi dima. Tug hon nisinati dima ne jibindei ba, icut ei sisarti.

¹⁴Je di mben Yehuda e, ma jikes timiei minu mien Moresyet-Gat ei bijiba jingon com yok bu au. Timiei minu mien Akhzib mimpu nibou ndig Israel bu bi.

¹⁵Je di timiei minu ndig Maresya e, TUHAN mikes je ei jide siceu nya indati tirigi yoni ikwei kon pran bit je. Mpe dima lene yo di inyeng jei nya di ibie tut mben Israel minang biku yok ei hak mihyeti Adulam.

¹⁶Je di mben Yehuda e, ma jikos jibou nta nok mun di bindo bipia jingon ngguk tut jimunggwom bat di jingon ngakei yok nya. Ma jikak jibou nta bidia kei noyam kin ha di nindig krop di yem kep mun di mai nya lewo jide siceu nya mikat jimunggwom bat nya ug ei ingkiaisi.