Read Hatam MIKHA 2 Bible Online

MIKHA 2 - Hatam bible

MIKHA 2

¹Buhun bibor mem yo di igyai ngkiem ei ibongti mem mmun bigyok ingon gom mem igyai munti di kinei bibor! Yo dima ikinyon ei gi igyok ingon gom tut igyai munti di kinei dima ei njap tekti.

²Gino ingon pri kep tungwagom de beisi lene ipos beisi dima leu noni hak ug. Tirigi iba yoho rok hiter de ig ne ijji ig ceu leu lene ibong ser ig dima binok ide bu. Bit bon tungwatu nya ingon jo nyahan tut mun di inyeng tut nya kin ide bat nya cem kan bi.

³Gima rino TUHAN pai “Dikos dat bipia midibindei ba, mun di buhun bibor micut igkep je leu api bit bon jingwes ngun kan bi. Ei nijam dima ne mijiba jingon di jei biya-ya nyen bu bi.

⁴Mpe dima lene tungwatu nya mipai singgre je lewo jinok bindo tut mun di buhun di cut igkep tungwatu nya. Iba doia bikiek mun di buhun di cut igkep je bipai, ‘TUHAN pos nyende minu dini bingwig leu nye biyai bak siceu di ikat nye. Nyeni nitimek biningwig hak tu.’ ”

⁵Tirigi tto bou dem mem TUHAN de limwa nya ipek hanjop nsi ei ide minu dima hanyen ne Noni mingkwei jide hanjop nsi hanyen bije bi.

⁶Tungwatu nya ipai ighyet bida bipai “Ma atri tut Allah nihyet kin mun di micut igkep nye au. Allah mibindei ba, nimmai sut nyenti bi sren.

⁷Ma akan bipia TUHAN mbriom Nide limwa di mben Israel au! Noni bibon yok nok gima bi. Noni moom ningon tut yok kikau. Noni ba ningon di nggriu nyohou pingok yo di ibon mun di igbit nya ingonti bi e?”

⁸TUHAN buhup “Jeni rino jihwen bit Ditde limwa nya noyam kin gi jihwen bit siceu nya. Tirigi ingkwei hanyen leu ikon pranti lene igyok ingon mem gima ibong kei igwam kei ei ide ig bei noro jitindei ser yok ei ide ig bei leu binhyepo jipos ide sinsun dut leu yok nok mun di bindo bipia yoni mirop ningwam hanyen bije ei nidipti bu.

⁹Jijji Ditde limwa di sop nya leu ide ig bei di ingon ngakei nya lene jipos mun di kei di dinjei bak imunggwom bat nya leu yok gingga.

¹⁰Ma jikiju ba, jimbut hak ug lewo mijibong kei jigwam kei ei minu ndig dini bu bi. Jide sisar bindei ba, mun di buhun bibor micut igkep mpia ttou nsi dini.

¹¹Jijoi sut nabi di ris mun igkei bipai sut mun di mipek kep mem je ei nidipti bu nok gini ‘Jei bi ne jidut ba anggur ngei kin mun di pu je nindig bibor ri.’ ”

¹²TUHAN pai bu “Je di mben Israel niken ndi jijo e, dipreu ei mem je bipia midimbus je hanyen kwei leu api jibicom yam nok gom noyam kin domba nya di ingkwei ei sar nsi hanyen. Jidigek kep mpia ei jitimieisi hanyen noyam kin abris nghousi di mpung tut domba nya.

¹³Miditin puig mem je leu api dibuwak je kwei leu jingkiaisi. Mijinggek dimbou pmem nya ei minu ndig dima leu api jimbut hak ug. Da di TUHAN dinok jide Nibou Ndig di bie tut je leu api mijehei leu minu dima.”