Read Hatam MIKHA 4 Bible Online

MIKHA 4 - Hatam bible

MIKHA 4

¹Ei nijam di nidipti bu ne nungug tou di TUHAN De Ig joti minok mbigdip di anai bibor dor njiriek mbigdip nindigsi nya hagom. Mpe dima lene mben dihyeisi dini hagom mittei yam bingwig kep mbigdip dima,

²bipai cuk yam “Jikwei ba, ikui ug ei TUHAN de nungug tou[2] kin Allah mben Israel De Ig cem! Noni mingginau nye tut ningon kanti mem nye leu api ikak puig di Noni tin mem nye lewo TUHAN nipingok tungwatu nyati tibim kwei leu minu ndig Yerusalem ba, Noni ya ei mbigdip Sion bimbrap bit Nide limwa nya.”

³ TUHAN migwam nok nikei di kos tut mben dihyeisi dini kin ide ninyeng tak kepti di sindem bibor gi ibong dideu kin gi ibong ting bibor nya ide munhyet. Yoni mitug ide singau simeda bikinding nok ngkimom di sapi bitem dihyei biprin ide tigtug nya hagom bidem kep nok singau koi nya. Mpe dima lene mben dihyeisi dini hagom mikon pran bit yam binjei siceu bu bi sren.

⁴ Tungwatu nya yahagom mibong kei migwam kei ei ide ba anggur kin biei ara nghousi nya ba, yahagom ingon kwes kin yam. Mpe dima lene tungwatu nya ingwes mien tut yam bu bi sren. TUHAN Di Sindem Bibor preu ei nok gima mem yo dima yahagom.

⁵Bikwop mben hagom ei dihyei njek dip dini ikuk yok bak ide kwar bibit kwar nihyet. Noro tut nyeni ne ikuk nye bak TUHAN di nok ide Allah bibit nihyet bijo ninno bijo kikau.

⁶TUHAN pai “Ei nidipti bu ne midinduk yo di dikes hukum ei yok dip kin yo di igyai inghuisi wei ei ingkiaisi yahagom kwei ei gom.

⁷Yo dima imig lit bibong ting leu itimieisi noro midibindei ba, gi hi di ingkwei hanyen inok pung di intun yam him di nijep bu. Yoni midigek kep mpia nok mben di nindig bibor bisindem bibor cem. Hon kep njap dima kui midigwam ei Nungug Sion ba, dinyeng tak kep yok bijo ninno bijo kikau.”

⁸He minu ndig Yerusalem e, anok gumihyep gom di Allah ya ser Nide limwa nya eisi dem kep nok gembala di ya ser nide domba nya. Na di minu ndig Yerusalem e, mporo anok minu ndig pmem mem jinyeng bitak kep jide limwa nya hanyen noyam kin gi nipou yo.

⁹Nggon rino jipim nggruet i? Nggon rino jinghuisi wei noyam kin sop di ninghim dut tut munggwom i? Gima hagom nok lewo jibon jide nibou ndig di bie tut je bi ba, yo di ipingok kep jingonti yahagom imai bingwig leu je tu e?

¹⁰Je di timiei minu ndig Yerusalem e, ma jipu jinghim ba, juun noyam kin sop di ninghim dut tut munggwom lewo jei bi lene suar jikes jitimieisi ei bijibong bas hek mpia leu api jide siceu nya mikri je ug ei minu ndig Babel. Noro tirigi jibong ei minu dima ne TUHAN miteu je bijingwes ngun leu jide siceu nya inda nsi.

¹¹Minu ndig Yerusalem e, mben imang bibor injei siceu ndam na bicuk yam “Jikwei ba, inggek minu ndig Yerusalem bitimek bingwig! Ma ita ibou eisi leu binhyepo ingat minu ndig Yerusalem di wer igkum kroi bou igyai him!”

¹²Noro mben dima yok ikan tut TUHAN ningon kanti di tin ei bi. TUHAN nduk yok ei gom mem gima kes hukum ei yok dip noyam kin tungwagom di ke gandum nintam kin yam kwei ei ig gudanti mem gima bui noro gima jo nibreisi mem yok bi.

¹³TUHAN pai “Je di timiei minu ndig Yerusalem e, ma juug bijico kep jide siceu nya! Midibindei ba, mimbri kui jingkek dem kep nok sapi nikre di nibou nggai wer ngkimom nitu ba, ninjou wer ngkimom-tembaga. Mijibindei timek mben imang bibor bingwig leu api jikon ide ndigban kin mitiei di iba imbuk bipos leu siceu nya hagom hanyen kwei bijinjei bak Da di TUHAN mem dihyeisi dini hagom.”

¹⁴Je di timiei minu ndig Yerusalem e, ma jibidip huk TUHAN leu binhyepo Noni kwei mpu je! Ide siceu nya igyon ttai nye! Yoni sindi ibui nye bibindei ba, nibou ndig Israel mmai sut nonti!