Read Hatam MIKHA 5 Bible Online

MIKHA 5 - Hatam bible

MIKHA 5

¹TUHAN pai “He minu ndig Betlehem Efrata e, anyeng mitibim nok minu mien he ei minu Yehuda bu bi! Noro midita ade timiei gom nok nibou di ninyeng jei mem mben Israel ba, pung di noni ntun him jo habiei nipou su.”

² TUHAN mikes Nide limwa nya ei siceu nya indati kikau bibou sop gom di Noni ndo ei nok no di ninyeng jei dima nipmem misrek tut noni ug e. Gima ngwig leu api nintun yam him nya di isima ei ingkiaisi mingkwei hanyen kwei binok gom kin ide bat nya ei itimieisi bu.

³Mpe dino no di ninyeng jei dima kwei krau ne ninyeng mitak kep nide limwa nya tug hon nisindemti kin mimbri di kui ningkek di kwei leu TUHAN di nide Allah Nongkom. Nide limwa nya ingon mijo nyahan lewo tungwatu dihyeisi dini hagom mikuk yok bak Nide ninyeng jeisi.

⁴Noni mibindei ba, yahagom ingon kwes kin yam. Tirigi tentara mben Asyur nya ihwen ide minu dini binggek ngug tig nya lene nyeni micuk ide nibou di mimbri kui ingkek ba, ihwen yok bibiyai nimai biyok.

⁵Nibou dima yok miba minggwen di nggwen-gwau biyai nimai bak mben Asyur leu api iteu nye leu indati.

⁶ Mben Israel niken-ken di icut bak siceu nya ba, isima ei ingkiaisi bi nya minok nggou di hem jui di kwei leu TUHAN mem mben nya imang bibor lene dem kep biget di but di biprok njita kioi ei beisi. Yo dima iba ingon com Allah bitut ningon kanti mem yok lo, iba ingon com tungwatu nya bi.

⁷Mben Israel di isima ei ingkiaisi minok mindhe singa di lus-lus nyen srig mindhe-ndhe bigbehei nya ikieti bisrig domba di igyem kep abris nggrup ei abris nghousi ikieti cem. Singa dima cut igkep domba dima yok ba, ham yok lene bibrig-brig nyen yok bingwig. Bit bon hi teu domba nya leu singa nuhui kan bi.

⁸Mben Israel mibindei timek ide siceu nya bicok tut yahagom ningwig a.

⁹TUHAN pai “Mpe dima lene midibindei sar jide kuda pran nya hagom leu je bidinggek jide kroba pran nya hagom bingwig.

¹⁰Midibindei ba, jide minu ndig nya kin minu mien nya kin tentara nibousi di igya coi nya cem hagom timek bingwig.

¹¹Midibindei ba, jide seig ut nya cem timek bingwig leu api midijji jide nung nya ningwig leu je.

¹²Midibindei ba, jide kwar nya kin jide cou tig nya di jipigig sut ei mem jide kwar nya hagom timek bingwig. Hon kep njap dima kui ne jikuk je bak mun di jibon bou jinda him bu bi.

¹³Midiwim jide cou biei di jipigig sut ei mem kwar Asyera di jo bidem jide minu bidibindei ba, jide minu ndig di bon tentara nibousi di igya coi nya timek bingwig.

¹⁴Midiba Ditde nigga biborti di cig-cai bibirop hanyen bak mben dihyeisi dini nya di ibit dihyet bi hagom.”