Read Hatam MIKHA 6 Bible Online

MIKHA 6 - Hatam bible

MIKHA 6

¹Ma jingig jitingou mem TUHAN di pai kep mben Israel nihyet. TUHAN e, ma akiju ba, apai kep Ade limwa nya! Ma asindui sut ba, mbigdip nya kin nungug tou nya cem ingig itingou mem ahyet.

²Mbigdip nya kin dihyeisi dini nikiou nya e, ma jingig jitingou mem TUHAN nihyet di pai kep mben Israelti! Lewo Noni mipai kep mben Israel ei nikei noho bei biwit huk yok drek dip.

³TUHAN pai “Ditde limwa jen, dibon mun tunggwei sut je notou i? Notou dikes mun di buhun ei jinghat dip i? Ma jibuhup dihyet hak ug!

⁴ Dibuwak je kwei leu minu Mesir biditeu je bijingwes ngun leu gi yuubon je nok awak. Dicuk Musa kin Harun kin Miryam leu binhyepo ibie tut je.

⁵ Ditde limwa jen, ma jiyok ngon kep notou Nibou Ndig Balak ei Moab kos dat mem gima bibon je kinei ba, notou Bileam di Beor nipmot buhup Balak nihyet cem. Ma jiyok ngon kep mun di pek kep mem je ei puig sinon tirigi jijo leu prak meng yati ei Sitim kikau ug ei prak meng yati ei Gilgal pima. Gino jiyok ngon kep mun dima yok hagom lene mijo nibreisi mem je bipia dibrim dingkek mem gima dimpu je.”

⁶Tirigi ikuk nye bak TUHAN di ninyeng tak kep gwamti ne suar ipwoi mindei kwei bigyai biNoni i? Suar ijem sapi nehen pap di kei bibor kei nya di indig kep hum ei nimbar hum dokti tirigi ibikuk nye biNoni e?

⁷Gino ijem domba ningut sribu-ribu bipwoi mini zaitun di mpung pias hagau kwei mem Noni lene joi sut mun dima yok e? Suar iba ipmot mighumbou bibon midut mem gima ibigo gau ide sisar e?

⁸Nok bi! Lewo TUHAN ndo brei binye tut mun di kei di Noni joi sut tu. Noni yok ningon mem gima igyai munti nya hagom sren kei kin gi ibrim ingkek mem ningondut yamti bingon ngakei Noni cem buug hon nohonti bi lene igyaijo nok gom bit ide Allah ba, iba ibou coi mem Noni cem.

⁹Yo di ittin tut TUHAN ingon ki. Noni tri tut nihyet bak timiei minu ndig bipai “Je di jinduk yam ei minu ndig dini e, ma jingig jitingou mem dihyet!

¹⁰Yo di imbuk nya iku ndigban kin mitiei di iris leu tungwatu nya tug hon nisinati di igbit bi ei ide ig bei. Yo dima iba ide kilo nitrowai biris ndigban leu yok. Dingon mpo tut igyai munti dima nindig bibor. Midikes hukum ei yo dima dip drek dip igyai munti dima yok.

¹¹Notou midikos ser yo di iba kilo nitrowai biris tungwatu nya dima ide sisar i?

¹²Timiei di inyeng bibor nya ei jide minu ndig ico kep yo di yuhui mbum nya. Jahagom jinok niris mun cig nya.

¹³Gima rino dikinyon ei gi dibui je bidibindei ba, jitimek bijingwig drek dip jide sisar.

¹⁴Mbro nok gino jiyem njita lo, njita dima ndei je bi leu api jinggum kikau. Mbro nok gino jipos ndigban leu tungwatu nya lo, bit bon jinyohou ndigban dima bijo kikau kan bi. Midibindei ba, ndigban di jinyohou dima timek bingwig tug hon pran.

¹⁵Mbro nok gino jiyai miai lo, mijipuk ningat hanyen bi sren. Mbro nok gino jikinding mini zaitun lo, jiba mini dima bikwen njita bi sren. Mbro nok gino jikimut ba anggur ngat bijiyai ningei lo, mijidut anggur ngei dima bi sren.

¹⁶ Mun dini yok hagom micut igkep je drek dip gi jiyai bram Nibou Ndig Omri kin nipmot Nibou Ndig Ahab igyai munti di mbuk bibor nya. Jiyai bram igyai kepti di kinei dima yok kikau. Gima rino midibindei ba, jitimek bijingwig apino tungwatu dihyeisi dini hagom ighyet wer mpiahi tut je. Mbro nok gino jinok Ditde limwa nya lo, yahagom ingwes om je.”