Read Hatam MIKHA 7 Bible Online

MIKHA 7 - Hatam bible

MIKHA 7

¹Buhun bibor mem da! Dinok no di nggum di nggok biei ngat di ntun biei him nya kin ba anggur ngat di ntun ba anggur him niabiati nijam njiriek tu lo, ningat hi jo him bi. Tungwatu nya ipuk ba anggur ningat kin biei ara ningat hagom bingwig leu su.

²Yo di ingon sren kin yo di ingon gom tut Allah yahagom ipror bingwig leu minu dini. Yahagom ibet ingon mem nituti tirigi ihwen mun. Yahagom itig ndep jui mem yam.

³Nibon kep mun di mbuk cig nya riyoni. Yo di inyeng jei kin nikei nya yahara mem mitiei dima ibingot kep yok. No di ninyeng jei brim ningkek kep yok bitig dino yuhum yam nsi.

⁴Yo di ikei bibor kin yo di ingon sren kei di isrig ikieti cem inoyam kin nitigot-tigausi di bon ninyeng bi. Tto bou dem mem Allah kes hukum ei yo dima dip bit leu nok nihyet di Noni sok ei ide nabi nya dip bak yoni. Nogindia nisinsiou jo ei ikieti.

⁵Ma jingon jo kep yam hyet au. Ma jiba jingon com jisut nihyet au. Ma jingon sok kep jenti tut mun di tibim ei juhui him bitut mun di tibim ei jitnem bat nya itingou nsi.

⁶ Lewo ei nijam di nok gini ne yo di ig bei nsi gom iba nitok biyam. Pinai nya ingwes om kep icig bat nya lene sop nya iba nitok bak ipmem bat nya. Sop di ignyot bat yam cem iba nitok biyam bu.

⁷Noro nye di iba ingon com TUHAN ne iba ingon di nddong bicem kep puig ser ide Allah nikweisi. Noni mimiap kep ide nadi biteu nye ba, ingwes ngun.

⁸Ide siceu nya ipai mun mem ibisu tindei ingon di kei kep nye tut gi itimek bingwig bi. Mbro nok gino nyeni icut tu lo, jei bi ne ikiju hanyen bu. Nogindini ingat rin ei nidinditi noro TUHAN mipiga digai nye bu.

⁹Ibon sisar tut TUHAN tu. Nogindini suar iba ibou coi mem ningon di sibui sut nyeti. Noro jei bi ne Noni miya hacan mem nye bibuhup bak yo di ibon mun tunggwei sut nye cem. Noni mibuwak nye leu nidinditi ug ei nipigati lene bindei ba, igyaijo bingat nituti tirigi Noni teu nye bingwes ngun.

¹⁰Nipou ne ide siceu nya ingwes om kep nye bihig ser nye “Jide TUHAN Allah No ritou i?” Noro tini bu ne yoni ingat mun di Noni bibon mem nye hagom bou igyai him leu api immai sut yonti. Nyeni mingat siceu nya di ibindei timek yok bico kep yok nok igkrop puigsi bou igyai him.

¹¹Je di timiei minu ndig Yerusalem e, nikwesti di kei bibor mem gima jikinding ngug tig di bikrop ttai jide minu dideu su. Mpe dima lene jide hanjop nsi mikum eisi bu binindig.

¹²Jide bat timiei minu ndig Yerusalem nya minduk yam hanyen kwei leu hantou-hantou ei minu Asyur ei nite bei mpia nipriti kin minu Mesir ei nite bei mpia nibiho kin Minyei Efrat nyai kin muk nite dima ug kin nungug him di ting bibor hagom.

¹³Noro dihyei ninjek dip nindigsi minok iggum ndigsi bu drek dip yo di ikieng kep dihyei dima igyai munti di mbuk bibor nya.

¹⁴TUHAN e, ma anyohou Ade limwa di adimig ei su nya. Ibong biyongkom ei mpia nintiti lo, dihyei di nnum kei jo ttai yok. Ma asindui sut ba, igyem kep njita ei abris nghousi di nnum kei ei hanjop Basyan kin Gilead cem bit leu nok igyai kepti di nipou su nya.

¹⁵TUHAN e, ma abon mindur mem nye noyam kin gi nipou po abon mem nye tirigi abuwak nye kwei leu minu Mesir pima.

¹⁶Mben dihyeisi dini isindem bibor lo, yahagom mimmai sut yonti tirigi ingat mun di abibon mem nye bou igyai him. Ingon micut leu lene bit bon yahap iji bimbrap ba, imiap kep nihyet cem kan bi.

¹⁷Yoni miba inghop bikak dihyei ei dihyei ndungti noyam kin wou di srei ba, ikes ide ig tentara nibousi di igya coi nya ei leu api iba ingon di digit kin ingwes mien binduk yam kwei ndam nyende TUHAN Allah.

¹⁸TUHAN e, Allah hi ter noyam kin Nani bi. Akos ser Ade limwa di ingwes ngun leu ingkiaisi nya ide sisar. Angon sibui sut yok kikau kan bi. Noro ajoi sut ando Ade ningon ngakeisi di ug hon nohonti bi bak nyeni.

¹⁹Mporo ma angon nggriu sut nye hanyen bu ba, akos ser nyende sisar. Mporo ma aco kep nyende sisar binnir-wap ba, acom hagom ug ei muk jou!

²⁰Mporo ma ando Ade ningon gomti kin Ade ningon ngakeisi di ug hon nohonti bi bak Ade limwa nya di intun Abraham kin Yakub him bit leu nok apreu ei mem nyeni nidigup bat-nidigai bat nya nipou su.