Read Hatam HABAKUK 2 Bible Online

HABAKUK 2 - Hatam bible

HABAKUK 2

¹Midikui ug ei ig di ingot bibinut yam di jo anai bidiyok diyai kep ditde beisi bidimem kep ser TUHAN nihyet kin nibuhup ditde nilua kwopti.

²TUHAN buhup bida bipai “Ma apas kep mun di dimbot kep bina nok igbit ei srat gomti leu binhyepo nibokti jo nibreisi ba, krop kei mem no di kwop.

³ Ma apas kep nimbot kepti dima lewo tto bou dem mem nipek kepti bigyo. Jei bi ne tto bou dem leu api nimbot kepti dima mipek kep mem je dem igbit dipaisi. Mbro nok gino tto bou dima dem bigyo lo, ma amem ser nitausi! Dipreu ei mem na bipia mun dima mipek kep lene binyen bi.

⁴ Ma apas kep ‘Yo di imbuk bibor mingwes ngun bi noro yo di ingon sren nya migyai niyaijo drek dip ide ningon gom tut Allahti.’ ”

⁵Ninyeng tut ndig ban nindig bibor ris mun bak no di nyeng tut. Yo di idrui bou ngwak yahagom ingon jei ba, ingon bos-bos nyen. Yoni inoyam kin minu nimai nya ide di ningon cut hon yo di imai nya imangti bi sren. Gima rino tentara Babel ikon pran bit mben dihyeisi dini bijo-jo yam dip bipos ndigban mem yonti.

⁶Noro yo di icut bak tentara dima yok iba ighyet bicig yok lene iba yok bikek bipai biyok “Mijitug ndei nisigion jeti lewo jipos mun di jinyeng tut bi nya! Apig api mijibindei ba, jinyeng tut mitiei nindig bibor tug hon nikak tut yo di ibon ningwam bije birop hanyen bijeti i?”

⁷Jiba jingon di huk niti bi bindei hi ter bicut bije lo, jo nibreisi pia mijibon ningwam mem jenti cem tu ba, yo di ma mibidip huk je bijigo nibittemti cem biyok. Siceu nya ikweisi mibindei ba, jinghuisi mpig sut yok leu api ipos jide ndigban bingwig leu je!

⁸Jipos ndigban nindig bibor leu mben mang bibor ei dihyeisi dini noro yo gi hi di ingwes ngun nya mikwei pos jide ndigban bingwig leu je drek dip gi jihwen mun bijimbuk tut mben dima yok bitut ide minu ndig nya cem.

⁹Jitug ndei nisigion jeti tu! Lewo jibindei ba, jide bat nya inyeng bibor tut mun di jiba jimbuk bipos leu tungwatu nya. Jingot jide ig di kei bibor kei leu binhyepo jide bat nya ibong kei igwam kei ei mpia di ting bibor leu mun di buhun kin mun di yok nisinsiou ei yoti.

¹⁰Noro jiyaisi dima bindei ba, jide bat nya immai sut yonti. Jibindei ba, mun di buhun bibor cut igkep jenti drek dip gi jiya kep mben di dihyeisi dini imang bibor bitimek bingwig tu.

¹¹Ningat ne tig tindak di jo-jo yam dip ei ngug tigti yahap iji ba, isigion je ba, ig nidihim nya ighyet ter tut.

¹²Jitug ndei nisigion jeti tu! Jiwin minu ei nikiou nimbuk bibor dip leu api jiba nihwen munti bingot igya.

¹³Mben dihyeisi dini di icut bak jeni icom yahanggwap mikuisi. Mun nyeng di ingot hagom mipror bingwig ei humti. Mun dini yok hagom ne TUHAN Di Sindem Bibor ningon kanti ri.

¹⁴ Nintin kimbo tut Allah kin Nide nisindemti mikieng kep dihyeisi dini nisurti-nipekti dem kep nok muk ndigsi di mpung tut minyei.

¹⁵Jitug ndei nisigion jeti tu! Lewo jibindei ba, jide yo di jinttig-tta nya idut jimbuk biborti noyam kin idut ba anggur ngei di pu yok. Jinim kep yok bijibindei ba, immai sut yonti tirigi intig kibi-kibou yam nyen.

¹⁶Nogindini bon nituti mem tungwatu nya ikon jinyeng bi noro bon nituti mem jimmai sut jenti sindam. TUHAN mibindei ba, jidut ei gi mokti di hukum joti noyam kin jidut ba anggur ngei di pu je. Tirigi jidut bingwig ne jintig kibi-kibou yam nyen.

¹⁷Jiwim baham tindurti ei Libanon tu. Gima rino tungwatu nya miwim jeni drek dip. Jibui mindhe-ndhe nya ei bahamti dima bingwig su. Gima rino mindhe-ndhe nya mibindei ba, jingon ttin nindig bibor. Mun dini yok hagom micut igkep je drek dip gi jihwen mun bijimbuk tut minu dima yok bitut ide minu ndig nya kin timiei minu ndig dima yok.

¹⁸Kwar di tungwatu nya ibon bou inda him dima kei mem mindei i? Kwar dima ris tungwatu nya ei nikineisi. No di bon kwar bou ninda him ba ningon com kwar dima mikuisi lewo bit bon kwar dima buhup nihyet kan bi!

¹⁹Jitug ndei nisigion jeti tu! Lewo jipai bak biei ttou gom “Ada ayai ba, akiju!” Lene jipai bak tig nindig nindak gom “Akiju ba, aya!” Kwar dima sindem mem gima mbot kep tut mun nyeng gom bijeni e? Mbro nok gino jiba perak kin mas binggai kep kwar dima lo, ninnei joti bi.

²⁰TUHAN ningat rin ei Nide Ig di kwes-kwau. Ma tungwatu dihyeisi dini hagom ikimut yuhui ei Noho bei bimbrap au.