Read Hatam HABAKUK 3 Bible Online

HABAKUK 3 - Hatam bible

HABAKUK 3

¹Lene Nabi Habakuk ngat nadi bipai bipia,

²TUHAN e, dimiap tut Ade midyai nya leu api dinggap leu tut nindig bibor. Nnaba ayai kep midyai di nindig bibor pima hanyen mem nijam dini. Mbro nok gino nibindei ba, angon sibui sut nye lo, ma angondut nye.

³Nani Allah Di Kwes-Kwau di kwei leu minu Edom rin ba, akwei leu nungug him Paran cem. Ade nikei-kau-keisi nggai kep mpia-bbed him bibindei ba, tungwatu dihyeisi dini hagom inggei sut Nani.

⁴Akweisi noyam kin kigyei di ninjeng srei. Ninjeng di piga kei srei kwei leu andati. Aku ade nisindemti dima bijo ku ei andati.

⁵Acuk nsuwer ajar bibie aho lene acuk minu nimai nya ide biya abia kep anghim dip.

⁶Gino akes hon ba, aya hak lene dihyeisi dini ugwa-kwei. Gino aba ayai nghuisi jik kep mben dihyeisi dini ne inghuisi mpig sut. Nungug him di jo habiei nimbie him ki bingwig ba, nungug tou di jo ninno tu di aya-ya nyen eisi ei nimbie him kimbas ba, sur yam kei.

⁷Dingat lo, mben Kusyan ittin lene mben Midian idigit.

⁸TUHAN e, muk ngei bindei ba, angon sibui e, he minyei di biam nya bindei ba, agga bibor e, he notou i? Abri ba, agwam bumbuhui dip noyam kin no di bri kuda di brim kroba pran mpe dino abindei ba, Ade limwa nya ihwen siceu nya bibindei timek yok.

⁹Ayar Ade hampiap ba, atin ei mem aprindei dihyeisi dini. Nani abindei ki dihyei dini ba, noyam kin minyei pmem nya.

¹⁰Tirigi nungug him nya ingat Na lene ingon digit ba, biget mbras kwei leu mpia-bbed him. Minyei ei dihyei jou nibimbi bong nindig bibor bitti bram yam bidwoi bibor.

¹¹Ade tibor di tibim sindem bibor ninjeng srei ba, Ade micim di sieng kei jimjit bibindei ba, mpia njap kin bed mmun yahacem ijo-joti hak bimbut bi.

¹²Tirigi agga bibor ne aya bidem dihyei dini nisurti-nipekti. Tirigi angon sibui bibor ne aco kep mben dihyeisi dini.

¹³Akinyon ei Ade midyai dimati leu binhyepo akwek Ade limwa nya ba, ateu nibou ndig di adimig ei su ba, ningwes ngun. Abindei timek no di bie tut yo di imbuk bibor nya leu api ahwen nide limwa nya cem ba, itimek bingwig.

¹⁴Ade tibor tibim Ade siceu nya ide nibou pranti ba, kus leu tirigi nide tentara ikon pran bit nye noyam kin hou sigau bibindei ba, nintek gimahap. Ikwai tiei kep nye noyam kin yo di ico kep yo di yuhui mbum nyahan hak.

¹⁵Aba Ade kuda nya bico-co nyen kep muk ngeisi lene gima bindei ba, muk nggram di biam sindem nya nirai pri didiei.

¹⁶Tirigi dimiap kep mun dini yok ne dinghuisi mpig sut biduhui ngkek bingmai-bingmai gwai ba, dittin. Dinghuisi jet ba, disindem bi leu api dimig ndrat mpia bidem dimbutti nya. Midibet dingon nyahan mem nituti di Na di TUHAN akes hukum ei yo di ikon pran bit nye dip.

¹⁷Mbro nok gino biei ara ngat ningat bi lene ba anggur ngat ningat di ntun ba ninjem him cem bi. Mbro nok gino biei zaitun ningat hagom ngoi-nga ba, gandum nikioi mui bingwig ei beisi cem lene domba nya hagom imai bingwig ba, sar nsi di sapi nya ibong nyahan eisi ngwak cem lo,

¹⁸midingon llei bibor kikau lewo Na di TUHAN Allah ateu da bidingwes ngun.

¹⁹ Na di TUHAN Di Anyeng Jei Bibor asindem tut da. Abindei ba, dimig dilleu bi. Dinoyam kin rusa mpe dino diba dingon di jo nyahan bidor-dor nyen ei nungug him.