Read Hatam ZEFANYA 3 Bible Online

ZEFANYA 3 - Hatam bible

ZEFANYA 3

¹Timiei minu ndig Yerusalem igyaijoti kinei ba, itug ndei nisigionti drek dip ide naham nimbuk kep TUHANti kin ico kep yonti ide timiei nyati cem!

²Buhun bibor mem timiei minu ndig di ikou sut TUHAN nisok kep yokti ba, ijoi sut nipingok yokti bi cem. Yo dima iba ingon com Tuhan ba, yahara bak mem gima mpu yok cem bi!

³Nibou di inyeng jei ei minu ndig dima idem kep singa di yau-yau nyen. Nikei nya idem kep serigala di nggum. Iduhwen bibor apino igibet ndia njum gom bijo ei mem njap di hyep cem bi.

⁴Nabi nya igita ibou ei ide midyai nyati bi ba, tungwatu nya iba ingon com yok cem bi. Imam nya ibindei ba, map kui mun di ikwas pijum ei mem TUHAN bikiek-kiek nyen Allah niggai serti nya mem gima bimpu yok tut mun di bon ninyeng mem yonti he.

⁵Noro TUHAN ningat rin ei minu ndig dima yo. Noni bon kep mun di kei kikau lene bon mun di tunggwei bi sren. Noni ne nikei di ba nisren-srausi bikos tut mun di kei bak Nide limwa nya bikwop njap tekti ri. Mbro nok gima lo, yo di ingon sren bi nya ei minu ndig dima ibon kep mun di kinei bijo kikau leu api immai sut yonti drek dip bi.

⁶TUHAN pai “Dibindei sar mben nya mang bibor ba, ijo bu bi tu. Dibindei timek minu ndig di ide nya hagom ba, dibindei ngug tig di ide nya kin ide tentara nibousi di igya coi nya cem bindung-ndiem. Minu ndig di ide nya mbum-bra bram. Hi di bong ser minu ndig dima bu bi ba, puig di ide nya cem ngwak.

⁷Dikan ‘Nogindini Side limwa nya ibou cut biSa leu api iba ibou coi mem sipingok yokti bibit leu api igyok ngon kep mun nyeng hagom di sibingginau yok nya.’ Lo, ningat ne ibrim ingkek tut ide nibon mun di kinei biborti bidor tunggwei igyai munti di nipou nya bu.

⁸Noro ma jingon sok kep jenti! Jigwam hak bibou njap dima dikiju nok No di pai kep je ug e. Lewo dikos tut mem gima diba mben nya kin ninyeng tak kepti nya bicom yam leu api dikes Ditde nigga biborti ei yok dip tu. Ditde nigga biborti di nok hum di cig-cai miyem dihyeisi dini titut yam bitimek bindung-ndiem.

⁹Mpe dima kui midipai tes ngkiai nya dima ingonti leu api ingat nadi biDangkom he. Mpe dima lene igingat nadi bak nung nya bu bi. Noro ice tut bibit Dangkom ngat dihyet he.

¹⁰Ditde limwa di intek gimahap mingkwei hanyen leu minu Sudan di ting kwei ba, ibon midut nindig mindhe-ndhe ei nimbar hum dokti bibikuk yok biDa.

¹¹Ditde limwa jen e, dem tut gima jingkek kan nimmai ei njap dima drek dip gi jikiek jimig jou tut da bi. Midijji bikwop ngkiai nya di illei-lau kin yo di ingon jei nya bingwig ug. Noro tut jeni ne mijaham jimbuk kep Da ei Ditde nungug di kwes[3] bu bi.

¹²Midisindui sut mben gom di yoom yonti ba, iba ingon com Da tut Ditde nimpu yokti bibong kikau ei minu ndig dima.

¹³ Mben Israel di niken-ken di ingwes ngun migyai mun tunggwei sut yam bisuglai ba, inok niris mun cig bu bi. Yo dima ingon jo nyahan bibong kei igwam kei lene ittin tut tungwatu nya bu bi.”

¹⁴Je di mben Israel e, ma jimbos-hi-mbos! Ma jipai doia! Timiei minu ndig Yerusalem e, ma jiba jingon titut yam biyai ningon nggei-hi-nggeisi!

¹⁵Lewo TUHAN kes hon Nide nikes hukum ei je dipti tu. Noni jji jide siceu di iba nitok bije leu su. Jide TUHAN Nonti di nibou ndig Israel nyohou jeni. Tini bu ne ma jittin bu au.

¹⁶Ngon bou midem leu api tungwatu nya ipai “Mei! Timiei minu ndig Yerusalem e, ma jittin ba, jingon dahat leu au.

¹⁷Jide TUHAN Allah di sindem bibor nyohou je. Joom kep mun nyeng hagom tug hon Nide nisindemti. Ningon nggei-hi-nggei ba, nillei ngwig sut je. Noni ba Nide ningon ngakei jeti biyai niyaijo nijep bije.

¹⁸Noni ba ningon di nggei-hi-nggei bipai doia drek dip je noyam kin no di sindi bon pesta.” TUHAN pai bu “Dibindei ba, mun di buhun di cut igkep je ngwig hon nohonti tu. Didip tut jinyeng di kinei leu je tu.”

¹⁹Tto bou mem gima dibindei timek jide siceu nya di ico kep je dideu su. Miditeu yo di imig lit nya bidibuwak yo di isima ei ingkiaisi nya hanyen kwei. Dibindei ba, inyeng di jei luei inyeng di kinei. Tungwatu nya bidem dihyei nisurti-nipekti mikon inyeng binggei sut yok cem.

²⁰Tto bou mem gima dibuwak jide limwa di intek gimahap nya bingkwei hanyen ei ide ig dideu su. Dibindei ba, jinyeng di jei tibim bidem dihyei nisurti-nipekti. Midipindi je leu api jibong kei jigwam kei hanyen bu. TUHAN simbot dat tu.