Read Hatam ZAKHARIA 10 Bible Online

ZAKHARIA 10 - Hatam bible

ZAKHARIA 10

¹TUHAN rino ba bimbuhui di biang biget bibindei ba, biget but mbras. Biget dima bindei ba, njita kioi ei miaisi nya nnum kei ba, kei-kau mem nyeni. Gima rino ug cut nijam di biang mpia ngei ndung ningwigsi lene ma jahara TUHAN biyai nok mpia but.

² Tungwatu nya yahara kwar di ikuk yok bak nya kin yo di inda dut nya leu binhyepo imbot kep tut mun di mipek kep. Lo, nibuhupti di igyai leu yok nya igbit bi lewo isuglai nitu he. Bihi itri tut mumpriem nimbot kepti lo, nimbot kepti dima bindei ba, jisrawir. Ighyet di ibigwam ser jingon cem bon ninyeng bi. Gima rino limwa nya intek gimahap bidem kep nok domba di intek gimahap leu api mun di buhun cut igkep yok lewo igimbun ide gembala di bie tut yok bi.

³TUHAN pai “Digga nibou ngkiai nya di inyeng tak kep Ditde limwa nya bibor ba, dibindei mbut hukum di cut igkep yok. Limwa mben Yehuda ne Ditde nya rin ba, Da di TUHAN Di Dinyeng Jei Bibor dinyohou yok. Dibindei ba, inok Ditde kuda pran di mimbri kui ingkek.

⁴Nibou ndig nya bitut nibou di igya kui yok kin nibou pran nya mintun him yok binyeng tak kep Ditde limwa nya.”

⁵Timiei minu Yehuda miyoom kep ide siceu nya dem kep nok nikon mbrap cig nya di ico kep ide siceu nya ba, ide siceu nya idem kep igkrop kak puig sinon. Yoni mibindei timek siceu nya bitut tentara nibri kuda cig nya yahagom lewo Da di TUHAN dimpu yok.

⁶“Midiyai nisindemti bak timiei minu Yehuda nya biditeu mben Israel bingwes ngun. Midibuwak yok hanyen kwei ei itimieisi lewo dingondut yok. Midimpu yok tereu nok mben dino dibikep ser yok bi sren nya. Dani ne ide TUHAN Allah rin ba, diyok ditingou kep ide nadi hanyen bu.

⁷Mben Israel minok nikon pran cig di sindem bidem kep yo di iba ba anggur ngei di idut ba, ibiyai nillei. Yo di intun him yok nya ei nijam dini ug ei nijam di nidipti bu kikau mibbwe ser ide nibindei timek siceu nyati di diyai biyok dini bi. Igyai nillei drek dip Ditde nibon mun mem yokti.

⁸Dijem Ditde limwa nya kwei bidiba yok bicom yam nok gom. Dikwek yok leu mun di kat yok bidibindei ba, imangti dem kep imangti di nipou hanyen.

⁹Mbro nok gino dibindei ba, intek gimahap bibong bidem ngkiai nya ikieti lo, igyok ngon kep Da ei ingkiaisi nya kikau. Yoni kin imunggwom bat nya mingwes ngun leu api yahagom mittei yam bingkwei hanyen kwei ei itimieisi.

¹⁰Midingkwei yok hanyen kwei leu minu Mesir kin Asyur bidikes yok ei itimieisi hanyen. Midibuwak yok kwei ei hanjop Gilead kin minu Libanon cem bidibindei minu dima nisurti-nipekti mpung tut yok hanyen.

¹¹Tirigi isigon mun di nggruk tereu nok isigon muk ndigsi ne Da di TUHAN midibui muk ngwa dip di roi leu api Minyei Pmem Nil pingge ug ei nijou bai bingak cai hak. Midicut mben Asyur di ingon jei nya inyeng bicut lene mben Mesir di mimbri kui ingkek nya ide nisindemti misar yon hak.

¹²Midiyai nisindemti bak Ditde limwa nya ba, yoni mice tut bibit dihyet bikuk yok biDa cem.” TUHAN simbot dat tu.