Read Hatam ZAKHARIA 14 Bible Online

ZAKHARIA 14 - Hatam bible

ZAKHARIA 14

¹TUHAN de njap nigwam nok nikei dideu su. Mpe dima lene tungwatu nya micoi ug ei minu ndig Yerusalem bipos ndigban hagom bikwas tut yam bou jiyai him.

²TUHAN minduk mben nya yahagom bibicom yam ba, mikwei mem gima injei bihwen minu ndig Yerusalem. Igyai minu ndig dima bigyati lene icoi bidem ig hagom bipos ndigban di joti nya. Mben dima yok ipos sop nya bikat timiei minu ndig Yerusalem nite hi bicom yok ug ei ingkiaisi. Noro igikat tungwatu nindigsi di ibong ei minu ndig Yerusalem bi.

³Leu api TUHAN mikiju bikon pran bit mben dima yok noyam kin gi kon pran bit yok ei nijam gi nipou cem.

⁴Njap dima dem ne Noni miya ei Nungug Zaitun dip ei minu ndig Yerusalem ei nite bei mpia nipriti. Leu api Nungug Zaitun nonti miki hacan binok briep ndig di nyan bibor di jo leu bei mpia nipriti buug ninno bipek kin nite bei mpia nicutti. Nungug dima nite hi mison ei nite bei mpia nijjai ba, nite hi bu mison ei nite bei mpia nibiho.

⁵Mijidor kak briep di bikwas nungug can dima noyam kin jidigup bat-jidigai bat di nipou nya inang ei mpe di ngkit cut ei nijam di nibou ndig Uzia di ninyeng tak kep timiei Yehuda nya yo. Lene ditde TUHAN Allah mikwei sut Nide malaikati yahagom di injei bit Noni.

⁶Njap dima dem ne hou kin biget es cut bu bi.

⁷Njap dima dem ne nidinditi nggai kep je bu bi. Njap tek bijo kikau mem mmun cem. Noro TUHAN nongkom he rino kan tut njap dima nitausi.

⁸ Njap dima dem ne minyei di su mibiam kwei leu minu ndig Yerusalem. Minyei dima mikwas ninggram can ba, hi biam buug com Igpong Nsim lene hi biam buug com Muk Hacan. Minyei dima mibiam bijo-jo wai ari bingwam jei dimo ba, ningei jo-jo wai bidem nijam di biang biget kin nijam di biang ngei-ndung bipingge bi sren.

⁹TUHAN ne nibou ndig di ninyeng tak kep dihyei njek dip dini titut yam ri. Bikwop tungwagom-gom mikuk no bak binok nide Allah lene mikan tut Nonti ninyeng gom ngat.

¹⁰Minu titut yam miwer nibriepti leu minu ndig Geba ei nite bei mpia nijjai ug bipek kin minu ndig Rimon ei nite bei mpia nibiho. Noro minu ndig Yerusalem mikiju bijo anai dor njiriek dihyei di jo ttai nya. Minu ndig dima ninyanti mijo leu Dimbou Pmem Benyamin kikau ug bipek kin Dimbou Pmem Nuhuisi di nok mpia di dimbou pmem gi nipou joti. Ba, ninyanti bu mijo leu Hananel De Ig Mien Di Jo Anai kikau ug bipek kin nibou ndig de bak di ipot ba anggur ngei eisi.

¹¹ Tungwatu nya mibong kei-migwam kei ei minu ndig dima leu ba, itug ndei nisigionti di bindei sar yok bu bi sren.

¹²TUHAN mikes nsuwer ajar di buhun bibor ei mben di ikon pran bit timiei Yerusalem nya yahagom dip. Nsuwer ajar dima bindei ba, igyai njep kin idweb kin ingut titut yam hagom jet ba, mpiei.

¹³Njap dima dem ne TUHAN mibindei ba, ngkiai dima yok ingon tai-tai bou bibor bittin bibor cem. Apino bikwop tungwagom-gom nitta tti bikat nisut di ya simiak bihwen noni.

¹⁴Pinai nya di ingat rin ei minu Yehuda mikon pran gau minu ndig Yerusalem. Yoni mipos ngkiai nya di ibong ttai yok nya ide ndigban mas kin perak kin ide sinsun di jo-jo yam dip cem hagom nok ndigban nipos he nya.

¹⁵Nsuwer ajar di buhun bibor micut igkep kuda kin bagal kin unta kin keledai bitut mindhe di igya coi prak meng yati di iceu bat nya yohok mem yok nya hagom bingwig.

¹⁶ Niabiati bu ne yo di ibong ei mben di ikon pran bit minu ndig Yerusalem nya ikieti di igyaisi jo yo nya yahagom miyuug ei minu ndig dima mem gima ikuk yok bak Nibou Ndig di TUHAN Di Ninyeng Jei Bibor ba, ibit midut Pesta Ig Jibei Mpam Meng cem.

¹⁷Gino mben gom yuug ei minu ndig Yerusalem mem gima ikuk yo bak Nibou Ndig di TUHAN Di Ninyeng Jei Bibor bi ne biget mibut ei ide minu bi.

¹⁸Gino mben Mesir ikou sut gi icoi bit midut Pesta Ig Jibei Mpam Meng dima ne TUHAN miba nsuwer ajar bihwen yok drek dip. Ba, nsuwer dima noyam kin gi Noni bihwen mben nindigsi di icoi bit pesta dima bi cem.

¹⁹Gima ne mun di buhun di micut igkep mben Mesir kin mben nindigsi nya hagom drek dip gino ikou sut gi icoi bit midut Pesta Ig Jibei Mpam Meng ri.

²⁰Njap dima dem ne tungwatu nya mikilis nibok ‘Ikes pijum ei mem TUHAN’ bidem ei brem-brem mien di ndun him bang nya di ibipingok kuda nya. Yengkuong ei TUHAN De Ig ninsi nya mibon ninyeng noyam kin den midut nya ei nimbar hum dok nikiou cem.

²¹Yoni mibet yengkuong ngot di jo ei minu ndig Yerusalem kin yengkuong ngot di jo bidem minu Yehuda hagom pijum ei mem TUHAN Di Ninyeng Jei Bibor binok Nide bu. Limwa di ibui mindhe bindig ei nimbar hum dokti bak TUHAN miba yengkuong dima bingei mikwau di ibikuk yok bak TUHAN. Nijam dima tau ne nitri-nipek mun cig ingat rin ei TUHAN Di Ninyeng Jei Bibor De Ig bi sren.