Read Hatam ZAKHARIA 3 Bible Online

ZAKHARIA 3 - Hatam bible

ZAKHARIA 3

¹ TUHAN ba ningat-hi-ngat bindo Imam Nibou Ndig Yosua tirigi ya ei TUHAN de malaikati noho bei bida. Bilis di tin ei mem gima pai kep Yosua ya kui nitta.

² Lene TUHAN de malaikati[1] pai binoni “Bilis e, nna ba TUHAN kes hukum ei na dip hak ug! Nna ba, TUHAN di ngondut minu ndig Yerusalem kes hukum ei nani dip. Yosua dem kep nok hum priot di ikus leu hum njengti.”

³Mpe dima lene Yosua juk sinsun di rom-rau biya tut.

⁴Gima rino malaikati dima pai bak yo di igya kui no ei gwamti “Jicom sinsun di rom-rau di no dini juk leu no.” Ba, pai bak Yosua “Dicom ade sisar leu na tu. Midiyai sinsun di nijep-jau bina.”

⁵Noni cuk yo di igya kui no mem gima iba minghas di pwoi kei bingot Yosua nibou. Igyai igbit nipaisi leu api ijuk sinsun di nijep ei noti tirigi malaikati dima yok niyai kep yok tut.

⁶Leu api malaikati dima pai TUHAN nihyet bak Yosua,

⁷“Gino abit Ditde niggai serti nya ba, abiyai kep midyai nya di dindo bina hagom ne anyeng mitak kep Ditde Ig ba, ayok ayai kep Ditde mpia di jo bas hak nya cem bijo kikau. Midingig ditingou mem ade nadi nya noyam kin gi dingig ditingou mem malaikati di ingat rin simiak da nya ide nadi.

⁸ Imam Nibou Ndig Yosua kin je di imam nya di jiya kui noni e, ma jingig jitingou mem dihyet. Jahagom jinok bindo tut nijam di kei ei nidipti bu ri. Midihig Ditde awak di ninyeng ‘Biei Biop’ kwei.

⁹Dikes tig gom di bon nuhuisi muhwindacan ei Yosua noho bei. Diba mun pas nikilisti bimau tig dima. Midiciu ser minu dini nide sisar ei ninsi njap gom ngat he.

¹⁰ Tirigi njap dima dem lene tungwagom-gom minduk yo di ninttig-tta nya bikwei bingat ingwes ei nibong kei nigwam keiti ei jide miai ba anggur nghousi nya kin biei ara nghousi nya.”