Read Hatam ZAKHARIA 6 Bible Online

ZAKHARIA 6 - Hatam bible

ZAKHARIA 6

¹Dingat ningat-hi-ngat gom kin bu. Dingat kroba pran ningat bitai di hei kwei leu nungug ngkimom-tembaga can ikieti.

² Kuda can-can kum yam bikri kroba pran nya. Kuda ningwoi nya ikri kroba pran gi nigom lene kuda nimmun nya ikri kroba pran gi nican,

³ lene kuda nitiei nya ikri kroba pran gi niningai ba, kuda nillikti nya ikri kroba pran gi nibitai.

⁴Dihig ser malaikati “Andigpoi e, kroba pran dima yok bindo tut mindei i?”

⁵ Noni buhup “Kroba pran nya igya ei TUHAN di pai tes dihyeisi kin gwamti bitut mun di joti nya Noho bei leu api ikwas yam ba, hi mbut ndam hou nimig ei nite bei ninghim lene hi mbut ndam hou nimig ei nite bei noho lene hi mbut ndam hou nimig ei nite bei ninda com lene hi mbut ndam hou nimig ei nite bei ninda prak.

⁶Kroba pran di kuda nimmun nya ikri mbut ndam nite bei mpia nijjai biyuug ei Babel. Kuda nitiei nya imbut ndam nite bei mpia nicutti lene kuda di nillikti nya imbut ndam minu di jo nite bei mpia nibiho.”

⁷Tirigi kuda nillikti nya dima yehei bimbut lene dingat lo, bit bon yoom ingon tut gi yuug biyok igyai kep dihyeisi dini kan bi. Malaikati pai “Nnaba jimbut bijiyok jiyai kep dihyeisi dini!” Lene igyai igbit nicuk yokti.

⁸Leu api malaikati hara bipai bida “Kuda nya di imbut ug ei nite bei mpia nijjai ug ei minu ndig Babel pima ibindei ntus TUHAN de nigga biborti tu.”

⁹TUHAN yai nisokti dini bida,

¹⁰bipai “Njap di ammani ma ayai munkwas dino Heldai kin Tobia kin Yedaya ikwas leu yok. Yo dini sindi ingkwei hanyen leu ingkiaisi ei minu ndig Babel. Attei ide munkwas dima yok ug ei Yosia di Zefanya nipmot de ig.

¹¹Aba mas kin perak di ikwas dima yok bibon topi nibou ndig ningat gom ba, abijuk Imam Nibou Ndig Yosua di Yozadak nipmot nibou nggram him a.

¹² Ma abipai binoni bipia Da di TUHAN Di Disindem Bibor dipai ‘No di ijem ninyeng Biei Biop mingat ningat ei mpia di ntun him biwin TUHAN De Ig hanyen.

¹³Noni rimiwin Ditde Ig ba, tug ndei ninyeng di jei di noyam kin nibou ndig ba, ninyeng mitak kep nide limwa nya. Imam gom miya kui noni ba, yahacem miba ningon kei sut yamti kin ningon kwes kin yamti bigyai midyai.’

¹⁴Topi nibou ndig dima mijo kikau ei Ditde Ig binok topi nibiyok ngon kep Heldai kin Tobia kin Yedaya di icigit Yosia kui ide ig.

¹⁵Tungwatu nya mikwei leu ting bibor bimpu yo di iwin Ditde Ig. Mpe dino iwin Ig dima biput lene mijo nibreisi mem yok bipia Da di TUHAN Di Disindem Bibor dipinak na di nabi ndam yok. Mun dini yok hagom mipek kep mem yok gino ibit ide TUHAN Allah nicukti di dicuk yok tut nok mungkun kei.”