Read Hatam MATIUS 11 Bible Online

MATIUS 11 - Hatam bible

MATIUS 11

¹Mpe dino Yesus ngginau yo di igya kui Noni ibou simnaibrimigcan bingwig leu lene Noni jo leu mpia dima buug kikau ug ei minu ndig di gahai dima kou nya leu binhyepo tri tut nihyet bu.

²Mpe dima lene Yohanes di tur tungwatu nya ei minyeiti no sima ei ig bui nsi. Tirigi Yesus ninghapti tibim tut Nide midyai ei Yohanes nitingou nsi lene noni cuk yo di igya kui noni biyuug ngat Yesus ba,

³ihig ser Noni “Nani ne no di kwei bit leu Allah nipreu ei mem nyeti tu rin e? He suar nyeni ningon ya mem hiter bu e?”

⁴Leu api Yesus buhup “Jingkwei hanyen ug ei Yohanes nidim ba, jipui sut mun di jimiap ei jitingou nsi kin mun di jingat bou jiyai him bak.

⁵ Lewo yo di igyai tu nya igyai da hanyen. Yo di imig lit nya imbut imig hanyen. Yo di bras yem yok nya[8] ikei hanyen. Yo di itingou nam nya itingou tu hanyen. Yo di imai nya igyaijo hanyen bu ba, Allah Nihyet Di Kei tibim ei yo di ihwap mbum nya itingou nsi tu.”

⁶Yo di ingon nggre drek dip Ditde midyai bi nya ingon nggei-hi-nggei!

⁷Tirigi yo di igya kui Yohanes ingkwei hanyen tu lene Yesus pui sut Yohanes bak tungwatu ningot ndig dima yok bipai “Tirigi po juug ngat Yohanes ei iggum ndigsi lene jingon ya mem mindei i? Mem krun meng di hou yai-yai nyen e?

⁸Jug ngat mindei i? No di juk sinsun di nibok kak e? Noro yo di ijuk sinsun di nibok kak yahagom ibong bit nibou ndig nya!

⁹Ma jipai hak biDa! Juug ngat mindei ei iggum ndigsi i? No di nabi e? I, mbro nok gima lo, ninyeng jei dor njiriek nabi nya.

¹⁰ Yohanes ne no di Allah tri tut ei nihyetti rin tirigi Noni pai, ‘Midisok dihyet ei tungwagom di tri tut dihyet dip leu binhyepo noni tin puig mem Nani yo.’

¹¹Ma jiyok ngon kep bipia ei dihyeisi dini ne no di ninyeng jei dor njiriek Yohanes di tur tungwatu nya ei minyeiti hi bi sren. Mbro nok gima lo, no di awak he ei Allah Ninyeng Tak Kepti ninyeng jei dor njiriek noni bu.

¹² Habiei leu nimbie him po Yohanes sindi tri tut nihyet kikau kwei bipek ammani kep ne yo di imbuk nya igruap sindem bibor mem gima ipos Allah Ninyeng Tak Kepti mem yonti.

¹³Lewo nipou tirigi Yohanes tri tut nihyet bigyo ne nabi nya kin Allah niggai serti cem ipui sut Allah Ninyeng Tak Kepti.

¹⁴ Gino jijoi sut gima jingon jo kep ighyet lene Yohanes ne Nabi Elia di ipreu ei mem nye ri.

¹⁵Gino jitingou dile lene ma jiyok ngon kep dihyet!

¹⁶Diba mindei binai sut tungwatu nya nijam dini i? Inok munggwom nya di igwam-gwam nyen ei biyati. Munggwom nimpung gom ipai bak isut bat nimpung hiter,

¹⁷‘Nibui ndug-ndug mem je noro jibihim bi tut nggon i? Nipai doia gi nibikiek nimai cem mem je noro jipim bi tut nggon i?’

¹⁸Tirigi Yohanes tau kwei lene noni yem njita bi mem nituti poi bidut ba anggur ngei bi sren noro tungwatu nya isrep bipai ‘Ninnei rom ya ningonti!’

¹⁹Tirigi Munggwom Tungwatu Nipmot tau kwei lene Noni yem njita bidut ba anggur ngei cem noro tungwatu nya isrep bipai bu ‘Jingat i! Ninghop bou ba, dut ba anggur ngei nindig bibor lene hig nisut bit yo di igya tindei belasten bigyem jimuhup kin yo di ibon sisar nindigsi nya isut cem.’ Mbro nok gima lo, Allah ndo bindo tut ningon kiti tug hon Nide midyai.”

²⁰Lene Yesus sindi pai kep minu ndig di Noni bibon Nide mindur eisi nya. Lewo timiei minu ndig dima yok ingkek ndok. Ittin ser ide sisar ba, ikiek ndam Allah bi. Noni pai,

²¹ “Ayo! Notou mem je di timiei minu ndig Korazim i? Ayo! Notou mem je di timiei minu ndig Betsaida i? Mindur di dibibon mem je tu pima gino dibibon bak timiei minu ndig Tirus kin Sidon lene mmo yo gi ijuk sinsun kron di bindo bipia ittin ser ide sisar bikiek ndam Allah leu api igwam tut ei atriemti mimbrek tu.

²²Ma jiyok ngon kep bipia tirigi Njap dem mem Allah kes hukum ei tungwatu nya dip ne ningon minggriu bibor tut timiei minu ndig Tirus kin Sidon dor njiriek jeni.

²³ Nok gima tut je di timiei minu ndig Kapernaum cem! Jijoi sut jingon di jei kui sur mpia-bbed him e? Noro Allah micom je ug ei hum njengti! Mindur di dibibon mem je pima gino dibibon bak timiei minu ndig Sodom ne minu ndig dima mijo nijoti kikau kwei bipek ammani kep.

²⁴Ma jiyok ngon kep bipia tirigi Njap dem mem Allah kes hukum ei tungwatu nya dip ne ningon minggriu bibor tut timiei minu ndig Sodom dor njiriek jeni.”

²⁵Mpe dima lene Yesus pai “Arig e, Nani ne Tuhan mem mpia-bbed him kin dihyeisi dini! Dipai sigyo biNa lewo aku mun dini yok hagom bijo nding leu yo di ingon ki kin yo di ingon tek bibor nya yahagom igyai him leu api ambot kep tut hagom bak yo di ingon ki bi nya.

²⁶Arig e, gima igbit rin lewo hagom bit leu akos tutti.

²⁷ Dicig yai mun nyeng hagom biDa tu. Dicig Nongkom kan igbit tut Nipmot ba, Nipmot kan igbit tut Nicig. Gino Nipmot ndo Nicig brei bak tungwatu nya lene yo dima cem ikan igbit tut Noni.

²⁸Je di jinghuisi jet kin je di jibiang mun di buhun e, ma jikwei hara Da leu api midiyai jingon nggan hanyen.

²⁹ Ma jibit dicuk jeti nya bijingig jitingou mem dingginausi lewo dingon jo nyahan ba, dingon nggriu cem apino jingon minggan hanyen.

³⁰Lewo dicuk jeti nya mibiyai jingon nggan hanyen ba, minai di diba dingon com je tut mibuhun tak je bi.”