Read Hatam MATIUS 15 Bible Online

MATIUS 15 - Hatam bible

MATIUS 15

¹Gima ngwig leu lene Farisi nya nimpung gom kin guru Puig Yahudi nicukti nya ibou poi ijo leu Yerusalem kwei ndam Yesus ba, ihig ser Noni,

²“Nggon rino yo di igya kui Na ibit idigup bat-idigai bat nya ide ningginausi bi i? Leu nipou tirigi igyem njita bigyo ne ipiap inda bit leu ningginausi nidimig sutti bi!”

³Yesus buhup “Nggon rino jipigau Allah Nihyet leu api jibit jidigup bat-jidigai bat nya ide ningginausi i?

⁴ Lewo Allah pai binye ‘Ma jibou cut bak jicig jipmem nya bijibit ighyet.’ Gima cem pai binye ‘No di sigion nicig nipmem lene suar jikes hukum nimai ei noni dip.’

⁵Noro jingginau tungwatu nya bipia gino hi nyeng tut mun di binyohou nicig nipmem nya lo, pai biyok ‘Diyai mun di dinyeng tut dima nok nimui bak Allah leu su.’

⁶Lo, tut gima nyohou nicig nipmem nya lene nna ug. Nok gima lene jiba jidigup bat-jidigai bat nya ide ningginausi bico kep Allah Nihyet.

⁷Mei! Jingon can yo! Nabi Yesaya nipaisi ndei je tu. Lewo noni pai,

⁸ ‘Allah pai sut yo dini bipia inggei sut Da ei yuhui him he noro ingonti jo ei minu ting leu Da.’

⁹Ikuk yok biDa mikui-kausi lewo ipingok yam tut tungwatu nya ide nidimig sutti bipai biyok ‘Gima ne Allah nidimig sutti ri.’ ”

¹⁰Lene Yesus nduk tungwatu nya kwei leu api pai biyok “Ma jintu kep dihyet leu binhyepo jingon dor niti!

¹¹Mun di coi ei tungwatu nya insi bindei ba, map kui yokti bi. Noro mun di tibim kwei leu yuhui him he rino bindei di map kui yokti.”

¹²Yo di igya kui Yesus ikwei pai biNoni “Akan tut gino ahyet dima sibui Farisi nya ingonti bi e?”

¹³Yesus buhup “Dicig ei gwamti mohom njita kioi di Noni ta bi nya hagom.

¹⁴ Nok ug e. Ma jingon pri tut yok au. Lewo iba igyai di tu bibie tut yo di igyai tu nya. Gino no di niyai tu cen hiter di niyai tu lene mporo yahacem icut ei jui nsi ug ri.”

¹⁵Petrus pai bak Yesus “Andigpoi e, ma apingok nye tut nihyet nibiti nindati dima ningginausi!”

¹⁶Lene Yesus buhup “Jeni cem jingon dorti tut bi e?

¹⁷Jikan tut bipia mun di coi ug ei tungwagom ninsi coi kikau ug ei ninghopti ba, jei bi lene oi sut hanyen rin bi e?

¹⁸ Noro nihyet di tibim ei tungwagom nuhui him kwei leu ningonti lene gima bindei ba, map kui noniti.

¹⁹Lewo nihwen mun kin nicut tut hi nitnem kin nicut tut yam kin ninggimang mun kin niris yam kin nikucang yam hagom ntun ningon him.

²⁰Mun dima yok bindei ba, map kui yokti. Noro tut gi iba inda di ipiap haigtu bi bigyem njita ne gima bindei ba, map kui yokti bi.”

²¹Lene Yesus jo leu mpia ttou nsi dima ba, ug ei hanjop nsi di dideu minu ndig Tirus kin Sidon.

²²Sindig timiei minu Kanaan gom di bong ei hanjop nsi dima kwei hara Yesus “Na di Daud nipmot e, ma angondut da o! Ninnei rom ya dipmisop ningonti lene bindei ba, duhug-duhug nyen!”

²³Noro Yesus buhup nihyet bi. Leu api yo di igya kui Noni ikwei pai bak “Acuk noni buug hak ug lewo noni jop bram nye nyen ba, hara ninno!”

²⁴Yesus buhup “Dicig cuk Da kwei mem gima dimpu mben Israel he lewo inok domba di srawir nya.”

²⁵Sindig dima kuk no nyahan ei Yesus nimig him bahara Noni “Andigpoi e, ma ampu da o!”

²⁶Yesus buhup “Dem mem gima niteu njita leu munggwom nya leu api nicom bak nsien nya bi.”

²⁷Noro sindig dima buhup “Andigpoi e, gima igbit ri. Noro nsien nya iduhwen njita ninnir di cut leu iceu nide meja dip bi e?”

²⁸Lene Yesus buhup “He dipmisop ndia ug o, aba angon com Da nindig bibor! Gima rino midibirop bina bit leu ahara Dati!” Tirigi Yesus pai bak nok rino nipmisop kei hanyen.

²⁹Yesus jo leu mpia ttou nsi dima bisir Igpong Galilea nintig dip lene kui ug ei mbigdip gom bigwam jug ei mpia dima.

³⁰Tungwatu ningot ndig induk yam kwei kep Noni ba, ibuwak yo di imig lit kin yo di igyai tu kin yo di imig-inda hom kin mibbwe nya kin yo di inggwen nindigsi nya yahagom kwei bikes yok ei Yesus nimig him leu api Noni bindei ba, ikei hanyen.

³¹Gima rino tungwatu nya yahagom inggap leu tut nindig bibor lewo ingat mibbwe nya di imbrap hanyen bu kin yo di imig-inda hom ikei hanyen kin yo di imig lit di imbut hanyen bu kin yo di igyai tu di igyai da hanyen yahagom. Gima rino inggei sut mben Israel ide Allah.

³²Lene Yesus hig yo di igya kui Noni kwei bipai biyok “Dingondut tungwatu ningot ndig dini lewo igwam bit Da mem njap ningai ba, njita ngwig leu yok tu. Dipi bidicuk yok bingkwei hanyen ug ei ide ig lo, inghop ngwak apino imai inggum hapuig ri.”

³³Lene yo di igya kui Noni ihig ser “Ninggok njita ei hantou bibitri tungwatu ningot ndig dini ei ha ngunti dini i?”

³⁴Yesus hig ser yok “Jide roti di jipwoi kwei nindak pig i?” Ibuhup “Nindak muhwindacan kin wau mimien poi mien he.”

³⁵Gima rino Yesus cuk tungwatu ningot ndig dima yahagom bipia igwam jug ei dihyeisi.

³⁶Lene Noni krau roti nindak muhwindacan kin wau pima bipai sigyo bak Allah kep leu api ki kukiau bak yo di igya kui Noni ba, ibitri tungwatu nya.

³⁷Yahagom igyem njita bindei yok leu lene yo di igya kui Yesus imbus niken ei bansi muhwindacanti ba, hagom ut.

³⁸Gino ikwop yo di igyem njita dima pinai nya he lene imangti ibou sribu bitai noro ikwop sop nya kin munggwom nya imangti bi.

³⁹Lene Yesus kes yok ba, ingkwei hanyen ug ei ide ig leu api Noni bri ut hanyen ba, bitot minyei kikau ug ei hanjop Magadan.