Read Hatam MATIUS 18 Bible Online

MATIUS 18 - Hatam bible

MATIUS 18

¹ Mpe dima lene yo di igya kui Yesus ikwei hig ser Noni “Tou rino ninyeng jei dor njiriek nindigsi nya ei Allah Ninyeng Tak Kepti i?”

²Yesus hig munggwom mien gom kwei biya ei ikieti.

³ Leu api pai biyok “Ma jiyok ngon kep bipia gino jiluei jingon kanti dem kep munggwom mien dini ningon kanti bi ne mijicoi bit Allah Ninyeng Tak Kepti bi sren.

⁴No di nim kep ningonti binok munggwom mien dini ningonti ne ninyeng jei dor njiriek nindigsi nya ei Allah Ninyeng Tak Kepti.

⁵Bikwop no di ya um munggwom di nok gini drek dip ningon di jo kep Dani lene no dima ya um Da sindam.”

⁶“Bikwop no di bindei dino munggwom mien gom ngat he ngkwei leu ba, ba ningon com Da bu bi ne gi kei rino tungwatu nya ikim tig mma di nindig bibor ba, ibisrou no dima nikimam binjei sut ug ei muk jou.

⁷Ayo! Buhun bibor mem tungwatu dihyeisi dini lewo mun nyeng mang bibor bindei ba, icut ei sisarti. Mun dima yok mipek kep mem tungwatu nya kikau. Noro buhun bibor mem no di bindei dino hi ter cut ei sisarti!

⁸ Gino jinda gom e, he jimig gom e, bindei bijicut ug ei sisarti lene ma jirop hak ba, jicom ug. Gi kei rino jinda e, he jimig hom e, kikau ug bipek jiyaijo ningwig honti leu gima jinda kin jimig hacem jo kikau lene gima bindei ba, jisar ei hum njengti.

⁹ Gino jiyai njep hi bindei bijicut ug ei sisarti lene ma jiket jiyai njep leu ba, jicom ug. Gi kei rino jiyai igdo hi tu kikau ug bipek jiyaijo ningwig honti leu gima jiyai hacem jo kikau lene gima bindei ba, jisar ei hum njengti.”

¹⁰“Ma jingon sok kep jenti ser nhyema jingwes pri gau munggwom mien dini hi au. Lewo jiyok ngon kep bipia ide malaikati nya igya hacan mem yok ei Dicig Noho bei ei gwamti bijo ninno. [

¹¹ Lewo Munggwom Tungwatu Nipmot ttau kwei leu binhyepo teu tungwatu di israwir nya biyai niyaijo nijep biyok!]

¹²Jihig yam tut nihyet nibiti nindati dini. Mpe di gom lene tungwagom hyen kep nide domba ningut sratus gom noro domba gom srawir. No dima mibon ndei notou i? Noni mikes nindigsi di ningot muhwindatai ba, muhwindatai ei abris nghousi leu api ug nggok gi hi di srawir.

¹³Ma jiyok ngon kep bipia tirigi noni ttau kep domba di srawir lene nillei ngwig sut domba ningut gom dima dor njiriek domba di ningot muhwindatai ba, muhwindatai di israwir bi nya.

¹⁴Nok gima cem Jicig ei gwamti ningon llei sut gima yo di ingon mbum noyam kin munggwom mien dini yok ibihi israwir bi.”

¹⁵ “Gino asut hi bon sisar tut na lene ma aug ngat noni ba, ando nide sisar brei bak nyahan binding leu nindigsi nya igyai him. Gino noni ce tut ade nipingokti lene bindo bipia jingon kwes kin yam hanyen tu.

¹⁶ Gino ningon tunggwei ade nipingok noti lene ma abuwak tungwagom-tungwacan ba, ibikum na. Lewo Allah Nihyet pai binye ‘Isuar ibou can ibou ningai di ingat no dima nitunggweisi bou igyai him nipou tirigi abakilak noni bigyo.’

¹⁷Gino ningon tunggwei yo dima cem ide nipingok noti lene ma ambot kep tut bak yo di inggre kin mbusyamei nya yahagom. Gino ningon tunggwei yo di inggre kin mbusyamei cem ide nipingok noti lene ma aba anghim birok noni noyam kin no di gwam Allah ninghim kin no di ya tindei belasten biyem jimuhup cem.”

¹⁸ “Ma jingon dorti tut gini ug e. Mun di jiggai ser ei dihyeisi dini ne Allah ei gwamti cem ggai ser tu ba, mun di jisindui sut ei dihyeisi dini ne Allah ei gwamti cem sindui sut tu.

¹⁹Lene ma jingon dorti tut gini cem. Gino jibou can ei dihyeisi dini jiba jingon kanti gom bingat nadi ne Dicig ei gwamti mibirop hanyen bije.

²⁰Gino ibou can ibou ningai imbus yam ei drek dip Dani lene Dani cem dingat rin ei ikieti.”

²¹ Lene Petrus kwei hig ser Yesus “Tuhan e, gino disut hi bon sisar tut da lene suar dikos ser sisar di bon tut da mbipig i? Mbimuhwindacan bram yam e?”

²² Yesus buhup “Mbimuhwindacan bram yam he bi noro mbisratus bitai ningot muhwindatai[11] bram yam.

²³Lewo Allah Ninyeng Tak Kepti rinok nibou ndig gom di hig bram nide awak nya tut nide ningwam.

²⁴Sindi hig bram yok lene ibuwak awak gom di rop ningwam juta mang bibor bigyo kwei biya ei noho bei.

²⁵Bit bon awak dima rop ningwam kan bi. Gima rino nibou ndig cuk yok mem gima itri noni kin nitnem nimunggwom bat nya kin nide ndigban hagom bibipek mitiei mem gima birop ningwam dima.

²⁶Awak dima ba nibiau bicom mpia ei niceu nimig him bahara noni ‘Andigpoi e, aom angon tut da mbigom ug e. Leu api midirop ade ningwam hagom bina.’

²⁷Nok rino niceu ngondut noni bikos ser ningwam di rop bigyo hagom bingwig leu api kes noni bimbut.

²⁸Awak dima ug leu lene um nisut awak gom kin bu di rop nide ningwam gom-gom bak bigyo leu api kimukep nikimam bipai binoni ‘Arop ditde ningwam haninyai!’

²⁹Lene nisut ba nibiau bicom mpia ei nimig him bahara ‘Aom angon tut da mbigom ug e leu api midirop ade ningwam hagom bina!’

³⁰Noro noni ngondut nisut bi ba, com noni ug ei ig bui nsi bibou rop nide ningwam leu ug e.

³¹Tirigi awak nindigsi nya ingat mun di cut igkep no dima bou igyai him lene ingon buhun leu api yuug ngat nibou ndig bimbot kep tut bak.

³²Lene nibou ndig sok nihyet mem awak pima hanyen kwei bipai bak ‘Nani ne awak di sibut! Dikos ser ningwam nindig bibor pima drek dip ahara dati bi e?

³³Nggon rino angondut asut bit leu nok gi dingondut na pima bi i?’

³⁴Lene niceu ningon sibui sut noni nindig bibor bicom noni ug ei ig bui nsi mem gima tug ndei hukum bibou rop niceu nide ningwam hagom leu ug e.”

³⁵Lene Yesus pai nihyet ningwigsi bitak kep nihyet nibiti nindati “Nok gima cem Dicig ei gwamti mibibon je bibikwop tungwagom-gom nok gima drek dip gi jiba jingon gom bikos ser sisar di jisut bon tut je bi nya.”