Read Hatam MATIUS 22 Bible Online

MATIUS 22 - Hatam bible

MATIUS 22

¹Yesus ba nihyet nibiti nindati bingginau tungwatu nya imang bibor mbigom kin bu.

²Noni pai biyok “Allah Ninyeng Tak Kepti rinok nibou ndig di bon pesta nindig bibor mem nipmot di wak nitnem.

³Noni sok nihyet ei nide awak nya dip bak nisut bat di sok nihyet mem yok nipou su nya noro yahagom ikou bikwei bi.

⁴Lene sok nihyet ei nide awak nindigsi nya dip bak nisut bat nya bipai biyok ‘Dingei njita ei su ba, dibui sapi nindig kin nehen pap di nok mikwau di ngge kei cem ba, dibam hagom biput ei su. Ma jinduk yam kwei mem pesta niwak yamti!’

⁵Noro yahagom iba ingha bak awak dima yok ighyet ba, igyai kep ide midyai nya. Hi ug yai miai lene hi kau nide kios.

⁶Ba, nindigsi nya ikat awak nya bibui yok ba, ikimukep yok cem.

⁷Nibou ndig ningon sibui sut yo dima nindig bibor. Noni cuk nide tentara nya biyuug yai nimai biyok lene pindei ide minu ndig dima bitimek.

⁸Gima ngwig lene noni hig nide awak nindigsi nya kwei bipai biyok ‘Njita di dingei kep pesta niwak yamti put ei su noro yo di disok dihyet mem yok pima idem mem bi.

⁹Juug nggok ser tungwatu di igya-ya nyen ei simpak nahau yamti bijinduk yahagom bikwei yem njita di dingei kep pesta niwak yamti dini.’

¹⁰Gima rino nide awak nya yuug nggok ser tungwatu nya ei simpakti bitut yo di ingon sren nya kin yo di isibut nya binduk yahagom kwei. Apino nghim nsi di igyem njita di ingei kep pesta niwak yamti mpung kei tut yok.

¹¹Leu api nibou ndig cem coi ug ei ninsi dima bimian ser yo di induk yam kwei bingat lo, tungwagom juk sinsun di igbit mem biyem njita di ingei kep pesta niwak yamti bi.

¹²Leu api hig ser noni ‘Disut na, notou acoi ninsi dini noro ajuk sinsun di igbit mem abiyem njita di ingei kep pesta niwak yamti bi i?’ Noro bit bon noni pai mun hi mem bisu tindei bi.

¹³ Lene nibou ndig pai bak nide awak nya ‘Jingot nimig ninda bingkiem leu lene jinjei noni ug ei nidinditi di jo nisai ma kwei. Noni mipim ba, mitug ndei ninghuisi wei ei mpia dima.’ ”

¹⁴Lene Yesus pai ningwigsi bitak kep nihyet nibiti nindati biyok “Allah hig tungwatu nya imang bibor kwei noro Noni dimig tungwatu cin-can he.”

¹⁵Jei bi lene Farisi nya yuug hum yam nsi leu binhyepo inggok puig di kei mem iba Yesus nihyet bisrou Nonti.

¹⁶Gima rino icuk ibou poi di igya kui yok kin ibou poi di itti kin nimpung Herodes biyuug ngat Yesus. Yo dini ipai bak Yesus “Guru e, nikan tut bipia angon sren. Ba, nikan tut bipia apai mingat tut Allah ningon kanti mem tungwatu nya lene amig mbus yok bi.

¹⁷Gima rino ma apai sut angon kanti binye tut belasten di igo bak nibou Kaisar Roma gau nyenti. Igyaisi dima tunggwei sut Puig Yahudi nidimig sutti e?”

¹⁸Noro Yesus kan tut ingon kanti di mbuk dima leu api buhup “Jingon can yo! Nggon rino jibingon mem gima jisrou Da tut i?

¹⁹Jindo igbit mitiei di jibigo belasten dima biDa.” Lene indo mitiei perak nitig gom bak.

²⁰Noni hig ser yok “Tou rininyeng kin ningwes jo ei mitiei diniti i?”

²¹Yoni ibuhup “Kaisar.” Gima rino Noni pai biyok “Gi nok lene ma jikwas mun di Kaisar nyeng tut nya hanyen igbit tut Kaisar lene ma jikwas mun di Allah nyeng tut nya hanyen tut Allah.”

²²Tirigi imiap nibuhupti dima lene inggap leu tut leu api ikes Noni ei bimbut leu.

²³ Ei njap dima cem yo di inggre kin nimpung Saduki ibou poi ikwei ngat Yesus. Yo dini ne nimpung di ingon jo kep bipia tungwatu nya igikiju hanyen leu imai eisi bi sren ri.

²⁴ Lene ipai singgre “Guru e, Musa pai bipia gino tungwagom di pijet mai leu nitnem lene suar nikinjoi wak nisen di pijet dima bu leu binhyepo yai nimunggwom bat nya bigya luei nijjep ndig hanyen.

²⁵Nihig ser Na tut pinai nya ibou muhwindacan di ibong ei minu ndig dini nipou su ba, yahagom ikindig bat-ikinjoi bat yam. Gi hi di mighumbou wak nitnem noro mai nipilei hanyen tirigi nitnem yai imunggwom hi bigyo. Lene nikinjoi wak nisen kibom hanyen.

²⁶Noro noni cem mai hanyen nipilei yo. Lene nikinjoi hi kin bu wak nisen kibom hanyen lene nok gima kikau ba, ibou muhwindacan dima yahagom imai hanyen ipilei leu.

²⁷Niabiati bu lene kibom di pijet cem mai.

²⁸Tirigi tungwatu nya ikiju hanyen leu imai eisi lene misop dima mijem gi tou rinok nijjep i? Lewo ibou muhwindacan iwak noni tu.”

²⁹Yesus buhup “Jipai mun tunggwei nindig bibor lewo jingon dorti tut Allah Nihyet kin Nide nisindemti bi.

³⁰Tirigi tto bou dem mem tungwatu nya ikiju hanyen leu imai eisi ne pinai nya kin sop nya iwak yam bu bi. Noro inok malaikati nya ei gwamti.

³¹Gino jingon kiowi tut yo di imai su nya ide nikiju hanyen leu imai eisiti ne jikwop nipas kepti di Allah pai bije bigyo e? Noni pai,

³² ‘Dani ne Abraham kin Ishak kin Yakub ide Allah ri.’ Noni ne Allah mem yo di imai su nya bi noro mem yo di igyaijo nya!”

³³Tirigi tungwatu ningot ndig imiap Yesus nipai mingat biyoti lene inggap leu tut ningginausi nindig bibor.

³⁴Tirigi Farisi nya imiap tut Yesus di nihyet om Saduki nya lene induk yam ei gom.

³⁵ Guru Puig Yahudi nicukti gom di nggre kin nimpung Farisi kwei hig singgre Yesus,

³⁶“Guru e, Allah nicukti gi tou ribon ninyeng dor njiriek nicukti nindigsi nya i?”

³⁷ Yesus buhup “Suar aba angonti titut yam kin anei titut yam kin angon kanti titut yam bingon ngakei ade Tuhan Allah.

³⁸Nicukti dini bon ninyeng biya bibie mem nicukti nindigsi nya hagom.

³⁹ Lene nicukti gi nican di bon ninyeng noyam kin gi nigom pai ‘Suar angon ngakei yo di hiter bit leu nok angon ngakei nanti.’

⁴⁰Nicukti ningat can dini ne nitriti mem Allah niggai serti kin nabi nya ide ningginausi nya ri.”

⁴¹Nipou tirigi Farisi nya intek hanyen bigyo lene Yesus hig singgre yok,

⁴²“Ma jipai jingon kanti tut Nibou Ndig di teu tungwatu nya biyai niyaijo nijep biyok. Noni ntun tou him i?” Lene ibuhup “Noni ntun Daud him.”

⁴³Yesus hig singgre yok “Gi nok lene nggon rino Allah Ninnei bie tut Daud dino jem Nibou Ndig di teu tungwatu nya biyai niyaijo nijep biyok dima ‘Tuhan’ i? Lewo Daud pai,

⁴⁴ ‘Tuhan pai bak ditde Tuhan, ma agwam kui dinda com[13] bibou doom Ade siceu nya ei amig him ug e.’

⁴⁵Gino Daud jem Nibou Ndig di teu tungwatu nya biyai niyaijo nijep biyok ninyeng ‘Tuhan’ lene notou Nibou Ndig di teu tungwatu nya biyai niyaijo nijep biyok dima ntun Daud him i?”

⁴⁶Bit bon hi buhup Yesus nihyet kan bi. Gima rino hon kep njap dima kui lene hi brim ningkek kep bihig simber Noni bu bi.