Read Hatam MATIUS 6 Bible Online

MATIUS 6 - Hatam bible

MATIUS 6

¹ “Jimiap e, harin dima jiyai Allah nicuk nyeti nya bou tungwatu nya igyai him a. Leu gino jiyai gima bou tungwatu nya igyai him ne Jicig ei gwamti mibindei ba, jimuhup tau bije bi.

²Gima rino tirigi jingondut yo di yuhui mbum lene ma jiyai gima brei bou tungwatu nya igyai him au. Lewo yo di ingon can nya igyai kep igyaisi dima ei mben Yahudi ide ig mbusyamei kin simpak ba, igyok ingon mem gima tungwatu nya inggei sut yok. Ma jiyok ngon kep bipia yo dima imuhup tau biyok tu.

³Noro tirigi jingondut yo di yuhui mbum nya lene ma mun di jiba jinda com biyai dima ne jinda prak kan tut au.

⁴Apino mun di jibingondut yo dima mijo nding leu tungwatu nya igyai him. Jicig di ngat mun di jo nding hagom bou niyai him mibindei ba, jimuhup tau bije.”

⁵ “Tirigi jingat nadi lene ma jiyai bram yo di ingon can nya igyai kepti nya au. Lewo yo dima igya ter ei mben Yahudi ide ig mbusyamei kin simpak nahau yamti cem bingat nadi brei bou tungwatu nya igyai him. Ma jiyok ngon kep bipia yo dima imuhup tau biyok tu.

⁶Noro tirigi je jingat nadi lene ma jicoi ug ei jide nghim nsi ba, jinggam mbou ser je leu api jingat nadi bak Jicig di tungwatu nya ingat bou igyai him bi. Apino Jicig di ngat mun di jo nding hagom bou niyai him mibindei ba, jimuhup tau bije.

⁷Tirigi jingat nadi lene ma jindat-ndat wai dem kep yo di igwam Allah ninghim au. Yo dima ikan bipia Allah miap ide nadi di yuhuk kikau.

⁸Ma jiyai bram igyai kepti dima au. Lewo Jicig kan tut mun di jisuar nipou tirigi jingat nadi bigyo.

⁹Gima rino ma jingat nadi nok gini, ‘Arig e, Nangkom ne nyende Allah ei gwamti ri. Handei kon ba, tungwatu nya yahagom inggei sut Na tut anyeng di kwes-kwau cem.

¹⁰Nani ne nyende Nibou Ndig ri. Akwei bindei ba, anyeng tak kep dihyeisi dini hagom leu binhyepo tungwatu nya yahagom ibit ahyet noyam kin Ade nipai testi ei gwamti nya di ibit ahyet.

¹¹Akwas njita di nisuar mem njap di ammani[3] tut nye.

¹²Akos ser mun di niyai tunggwei sut Na bit leu nok nyeni cem nikos ser hiter nya ide mun di igyai tunggwei sut nye.

¹³Asindui sut nye ba, ningkwei hanyen tirigi nibiam mun di srou nye au. Noro anyohou nye ba, ningwes ngun leu Bilis de nisindemti. [Lewo Nani ne Nibou Ndig rin ba, nisindemti kin nikei-kau-keisi hagom jo biNa kikau. Igbit ri.]’

¹⁴ Gino jikos ser hiter ide mun di igyai tunggwei sut je ne Jicig nyo kug ei gwamti cem mikos ser jide mun di jiyai tunggwei sut Noni.

¹⁵Noro gino jikos ser hiter ide mun di igyai tunggwei sut je bi ne Jicig nyo kug cem mikos ser jide mun di jiyai tunggwei sut Noni bi.”

¹⁶“Tirigi jiyem njita bi mem nituti poi lene ma jibon jiimaisi hai dem kep yo di ingon can nya au. Lewo yo dima ibon nok bisinggre leu binhyepo tungwatu nya ingat ide niyem njita bisi. Ma jiyok ngon kep bipia imuhup tau biyok tu.

¹⁷Noro gino jiyem njita bi mem nituti poi lene ma jipiap jiimaisi bijipri jibou cem.

¹⁸Leu binhyepo hiter ingat jide niyem njita bi mem nituti poi dima bi. Noro Jicig nyo kug di bit bon tungwatu nya ingat bou igyai him bi Nongkom ngat je tut jiyai munti dima. Leu api Jicig di ngat jiyai munti di jo nding bou niyai him mibindei ba, jimuhup tau bije.”

¹⁹ “Ma jimbus ndigban kin mitiei keyam mem jenti ei dihyeisi dini au. Leu gima yok awam mikkin ba, prap yem lene yo di imbrai nya minggek dimbou binggimang cem.

²⁰Noro ma jimbus ndigban kin mitiei keyam mem jenti ei gwamti lewo bit bon awam kkin bi lene prap yem ba, yo di imbrai nya inggek dimbou binggimang cem ei gwamti kan bi.

²¹Lewo jingon llei ndam mpia ttou nsi di jimbus jide ndigban kin mitiei kikep keyam eisi!”

²²“Jiyai ne mini njeng di piga digai jingut ri. Gino jiyai kwes lene jingut titut yam mpung tut nipigati.

²³Noro gino jiyai dindi lene jingut titut yam mpung tut nidinditi. Gino mini njeng di jo ei jeti dima dem kep nok nidinditi ne nidinditi dima dindi-kai!”

²⁴“Bit bon tungwagom bon nonti nok awak mem niceu bat nya ibou can kan bi. Lewo miningon mpo tut hi lene miningon gom tut hi. Noni miba nijoi biborti biyai midyai mem hi lene ba ninghen biyai midyai mem hi. Bit bon jinok awak mem Allah kin ndigban di mipror yon cem kan bi.

²⁵Gima rino ma jingon bos-bos nyen tut njita di jiyem kin ndia ngei di jidut kin sinsun di jijuk au. Lewo jide niyaijoti bon ninyeng dor njiriek njita di jiyem. Jingut bon ninyeng dor njiriek sinsun di jijuk.

²⁶Ma jingat ha di idimba-dimba nyen nya di indim njita ngan bigyai njita ngat kwei binju hagom ei igudanti bi. Mbro nok gima lo, Jicig ei gwamti nyohou yok! Jibok kak bibor dor njiriek ha dima yok bu.

²⁷Mbro nok gino jingon bos-bos nyen lo, bit bon jibinut jide njap wer jei[4] bu kan bi.

²⁸Nggon rino jingon bos-bos nyen tut sinsun di jijuk i? Ma jingig jiyai kep mitou igbit susti. Lewo mitou yai midyai binap sinsun mem nonti bi.

²⁹ Noro Nibou Ndig Salomo di nyeng bibor juk sinsun di kei bibor di dem mitou dima bi!

³⁰Gino Allah pai tes mitou di kieng ammani leu api njap di hyep bu mui hanyen ba, tungwatu nya indig bingwig ne Noni minyohou jeni cem bi e? Mei! Jiba jingon com Noni haigtu bi e?

³¹Gima rino ma jingon bos-bos nyen tut njita di jiyem kin ndia ngei di jidut kin sinsun di jijuk bijo ninno au.

³²Lewo yo di igwam Yesus ninghim ingon bos-bos nyen tut mun dima yok hagom bijo ninno. Jicig ei gwamti kan tut mun di jisuar dima yok hagom tu.

³³Noro ma jibrim jingkek mem nikuk je bak Allah di ninyeng tak kep jeti ba, jiyai igbit ningon kanti nipou ug e. Leu api Noni miyai mun di nindigsi pima hagom bije.

³⁴Gima rino ma jingon bos-bos nyen tut mun di mipek kep mem je mem njap di hyep bu au. Mun dima yok hagom jo mem njap di hyep hak ug. Lewo mun di buhun di micut igkep nye mem njap gom ngat dini ne dem mem njap ndia he.”