Read Hatam MATIUS 7 Bible Online

MATIUS 7 - Hatam bible

MATIUS 7

¹“Ma jibon jenti dem kep nok nikei mem hiter au. Leu binhyepo Allah di nok nikei pai kep je bi.

² Lewo Allah di nok nikei mibibon je bit leu nok jibibon hi terti. Noni mibinai je bit leu nok jibinai hi ter.

³Nggon rino jingon pri tut biei nnir di sigi ser jisut niyaisi lene jiba jiyai hwen kep biei ttou di sigi ser jenti jiyaisi bi i?

⁴Nggon rino jihig jisut ‘Diser biei nnir di sigi ser ayaisi e?’ Noro biei ttou gom no sigi ser jenti cem jiyaisi yo?

⁵Jingon can! Ma jikon biei ttou leu jenti jiyaisi bibie ug e leu binhyepo jiyai kwes mem gima jiser biei nnir di jo jisut niyaisi leu a.

⁶Ma jiyai mun di Allah nyeng tut nya bak nsien nya au. Lewo yoni mingkwei hanyen ba, yaham je. Nok gima cem ma jiba sriou tiei njep biris na nya au. Lewo yoni mico kep sriou tiei njep dima ug ri.”

⁷“Jahara hak ug leu api mijiyai mun di jahara tut. Jinggok ser hak ug leu api mijingat mun di jinggok tut. Jipuk dimbou hak ug leu api dimbou mikau leu je.

⁸Lewo no di hara miyai ba, no di nggok ser hak mingat ba, no di puk dimbou hak lene dimbou mikau leu noni.

⁹Je di jibon jimunggwom bat nya e, gino jimunggwom hara je tut roti lene ma jiyai tig nindak gom bak e?

¹⁰He hara je tut wau lene jiyai wou bak e?

¹¹Mbro nok gino jingkek ndok lo, jingondut jimunggwom bat nya. Jicig ei gwamti ne miyai nok gima hak ri! Nijit ne Noni mingondut yo di yahara Noni.

¹² Ma jibibon yo di hiter bit leu nok gi jijoi sut ibibon hanyen bije. Gima ne Allah niggai serti di tug hon Musa kin nabi nya ighyet ri.”

¹³“Ma jicoi kak dimbou hui di kom lewo dimbou hui di bie ug ei hum njengti nyan bibor ba, puig dima sur yam kei apino tungwatu nya imang bibor icoi kak dimbou hui dima.

¹⁴Noro dimbou hui di bie ug ei niyaijo kikauti kom bibor ba, puig dima cem kom bibor apino tungwatu nya gom-gom he icoi kak dimbou hui dima.”

¹⁵“Ma jisok kep jenti ser nabi nitrowai nya di isrig jikieti lo, iluei itta binok domba nya. Noro bei ninsi ne inok nsien mbrei di niten-pos.

¹⁶Mijingat igbit yok tug hon igyai munti nya. Lewo ba anggur ngat ntun cibou nda him bi ba, biei ara ningat ntun ndia nggwen di tigot-tigau him cem bi.

¹⁷Biei ngat di nggwop kei ntun biei di kei him. Biei ngat di kinei ntun biei di kinei him.

¹⁸Bit bon biei di kinei ningat ntun biei di kei him kan bi. Bit bon biei di nggwop kei ningat ntun biei di kinei him kan bi.

¹⁹ Bikwop biei di ngat ningat di kinei ne niceu wim bindig kep hum.

²⁰ Gima rino mijingat igbit guru nitrowai nya tug hon igyai munti nya.”

²¹“Tungwatu nya imang bibor mindat kep dinyeng bipai ‘Tuhan! Tuhan!’ Noro yo dima yahagom micoi bit Allah Ninyeng Tak Kepti bi. Noro bikwop yo di igyai igbit Dicig ei gwamti ningon kanti he micoi bit.

²²Mpe dino Njap Ningwig Honti dem ne tungwatu nya imang bibor yahara Da ‘Tuhan e, nitri tut Allah Nihyet ba, nijji ninnei rom nya imang bibor lene nibon mindur nya mang bibor cem tug hon anyeng tu.’

²³ Lene dibuhup biyok ‘Dikan tut je bi sren. Juug bihigom leu Da lewo jisibut bibor!’ ”

²⁴“Bikwop no di miap kep dihyet bibit hagom lene no dima dem kep tukan di ningon ki di ngot ig ei tig di nok cou nipmem dip.

²⁵Tirigi nijam dem mem mpia but ba, minyei su bibiam sindem lene hou di ten cut cem ba, hwen ig dima noro tti bi lewo no dima ngot ig ei tig di nok cou nipmem dip.

²⁶Noro bikwop no di miap kep dihyet bibit bi ne no dima dem kep tukan di ningon mbum di ngot ig ei iggum dip di jo minyei nipimat.

²⁷Tirigi nijam dem mem mpia but ba, minyei su bibiam sindem lene hou di ten cut cem ba, hwen ig dima apino ig dima tti binggek bingwig.”

²⁸ Tirigi Yesus kes nihyet hon lene tungwatu ningot ndig dima yok inga leu nindig bibor tut.

²⁹Lewo Noni ba nihyet buhun bingginau yok. Nihyet noyam kin ide guru Puig Yahudi nicukti nya ighyet bi.