Read Hatam MARKUS 10 Bible Online

MARKUS 10 - Hatam bible

MARKUS 10

¹Leu api Yesus jo leu mpia ttou nsi dima buug kikau ei Yudea bisigon Minyei Yordan ug ei nite dima ug. Tungwatu ningot ndig induk yam binggreu kep Noni hanyen bu ba, Noni ngginau kep yok bit leu nok niyai kepti.

²Lene Farisi nya ibou poi ittau kwei ba, ihig singgre Noni “Ide Puig Yahudi niggai serti sindui sut nikou nitnemti e?”

³Yesus buhup bihig singgre yok “Puig Yahudi niggai serti di tug hon Musa pai mindei bije i?”

⁴ Ibuhup “Niggai serti dima sindui sut tungwatu nya bibon srat nikou nitnemti bigyai bak itnem leu api ijji yok bihigom.”

⁵Yesus buhup “Puig Yahudi niggai serti di tug hon Musa sindui sut ba, jiyai nok gima lewo jingkek ndok.

⁶ Noro Allah nihyet pai ‘Ei nimbie him tirigi Allah pai tes tungwatu nya lene Noni pai tes no di pinai kin no di sop.

⁷ Gima rino no di pinai mikes nicig nipmem nya ei ba, nitnem yoni mibong gom,

⁸leu binhyepo yahacem inok gom.’ Gima rino inok ibou can bu bi noro inok gom.

⁹Tut mun di Allah bicom yam nok gom tu lene ma tungwatu nya inggek tut yam au!”

¹⁰Tirigi Yesus nya ingkwei hanyen ug ei ig bei lene yo di igya kui Noni ihig ser Noni tut nipaisi dima.

¹¹ Noni buhup “No di kou nitnem leu api ug wak sop gom bididei nitnem ndig lene no dima pigau nitnem ndig pima.[11]

¹²Nok gima cem tut sop di kou nijjep buug wak pinai gom bididei nijjep bu lene sop dima pigau nijjep ndig pima.”

¹³Mpe dima lene tungwatu nya ibuwak munggwom mien nya ndam Yesus leu binhyepo Noni tak kep ibou nggram him noro yo di igya kui Noni ibigen ser yok.

¹⁴Tirigi Yesus ngig niyai kep yok lene wok yo di igya kui Noni bipai biyok “Jisindui sut munggwom dima yok bikwei ndam Da ba, jibigen ser yok au. Lewo tungwatu di ingonti noyam kin munggwom dini yok ingonti minggre kin Allah Ninyeng Tak Kepti.

¹⁵ Ma jiyok ngon kep gini! Gino jiya um Allah noyam kin munggwom dini yok bi lene bit bon jinggre kin Allah Ninyeng Tak Kepti bi.”

¹⁶Tirigi Yesus pai nok gima leu lene nggriou munggwom dima yok yahagom bitak kep tungwagom gom nibou nggram him lene yai gi kei biyok.

¹⁷Tirigi Yesus sindi kiju bimbut nut lene tungwagom dor kwei bikuk no ei nimig him bihig ser Noni “Guru di kei e, dibon mun di notou leu binhyepo ditug ndei niyaijo nijep di jo kikau i?”

¹⁸Lene Yesus buhup “Nggon rino andat dinyeng guru di kei i? Tungwatu nya hi kei bi noro Allah Nongkom he.

¹⁹ Akan tut Allah nicuk nyeti nya di pai binye ‘Ahwen mun au acut tut hi nitnem au anggimang mun au ambres kep hiter au aris bak hiter cem au. Noro ma akuk na ba, anyohou acig apmem nya.’ ”

²⁰No dima buhup “Guru e, dibit nicukti dima yok hagom habiei dimien kikau kwei bipek ammani kep tu.”

²¹Yesus tou kep noni nggilun bingondut lene pai binoni “Atunggwei sut mun nyeng gom ngat he. Ma atri ade ndigban hagom ba, abipek mitiei leu api akwas hagom tut yo di yuhui mbum nya leu binhyepo abikum ei ade mun di keiti mem nanti ei gwamti. Ayai gima bidem leu api akwei bit Da.”

²²Tirigi no dima miap Yesus nibuhupti dima rino ningon pus tut leu api ba ningon di buhun bingkwei hanyen lewo nyeng tut ndigban nindig bibor.

²³Gima rino Yesus nyohou mian ser yo di igya kui Noni bipai biyok “Nggruk bibor mem yo di inyeng nya inggre kin Allah Ninyeng Tak Kepti!”

²⁴Tirigi yo di igya kui Yesus imiap nipaisi dima lene inga leu tut. Noro Noni pai bu “Dimunggwom bat jen, nggruk bibor mem tungwatu nya inggre kin Allah Ninyeng Tak Kepti!

²⁵Krop kei mem unta ningut gom coi kak mup mbrei mihyeti leu gima no di nyeng bibor coi ei Allah De Dihyei Di Nijepti.”

²⁶Tirigi yoni imiap nipaisi dima lene inga leu tut nindig bibor bihig yam “Gi nok lene tou ridem mem gima yai niteu leu sisarti kin niyaijo nijep i?”

²⁷Yesus mian huk yok bibuhup “Bit bon tungwatu nya igyai mun dini yok kan bi! Noro Allah sindem mem gima yai mun nyeng hagom.”

²⁸Lene Petrus pai biNoni “Angat i! Nikes mun di hagom ei leu binhyepo nibit Na.”

²⁹Yesus buhup “Ma jiyok ngon kep bipia bikwop no di kes nide ig bei nsi nya kin nikindig-nikinjoi nya kin nikwohop bat nya kin nicig nipmem nya kin nimunggwom bat nya kin nide miai bitut njita di joti ei leu bibit Dani kin Nihyet Di Kei di kwei leu Allah cem ne,

³⁰no dima miyai bibikwop mun dima yok hagom nindig bibor hanyen bu ei nijam dini. Noni miyai ig kin nikindig-nikinjoi nya kin nikwohop bat nya kin nipmem bat nya kin nimunggwom bat nya kin miai tut njita di joti nya hagom mbisratus gom bram yam lo, tungwatu nya mihwen bit noni cem. Lene noni miyai niyaijo nijep di jo kikau ei nijam di nijep ei nidipti bu.

³¹ Noro imang bibor di igya bibie mem nijam dini miyuug ya ei nohon keti bu lene imang bibor di yoom yonti bigya ei nohon keti mem nijam dini mikwei ya bibie mem nindigsi nya bu.”

³²Yesus nya imbut imig biyuug ei puig sinon ndam Yerusalem lene Yesus bie leu api yo di igya kui Noni iba ingon di ku yonti bigya abia. Lene yo di nindigsi nya di igya abia kep yok ingon digit. Leu api Yesus buwak ibou simnaibrimigcan di igya kui Noni ter biyongkom bipui sut mun di jei bi micut igkep Noni.

³³Noni pai “Jimiap e, nogindini ikui ug ei Yerusalem lene tungwatu nya mitri Munggwom Tungwatu Nipmot ei imam nindig nya kin guru Puig Yahudi nicukti nya indati leu api ijem nimai gau Noni bitri Noni hanyen bak ngkiai nya.

³⁴Yo dima miba ighyet bicig Noni cem itrai ndei Noni cem imbas Noni cem ihwen Noni cem. Noro njap ningai bu lene Noni mikiju hanyen leu nimai eisi.”

³⁵Lene Zebedeus nipmot bat cin di Yakobus Yohanes nya ikwei brim ingkek kep Yesus bipai “Guru e, nijoi sut ma abon mun nyeng gom mem nye.”

³⁶Noni hig ser yok “Jijoi sut dibon mindei mem je i?”

³⁷Ipai “Nijoi sut ma nigom gwam kui anda com lene nigom gwam kui anda prak tirigi agwam ei Ade banggo mbrei di kei-kau-kei dip.”

³⁸ Yesus buhup “Jikan bidem tut mun di jahara Da tut dima bi. Bon jidut ei gi mokti di didut eisi ug rin e? Bon jiyai dimig yam tug hon ninghuisi wei noyam kin Dani e?”

³⁹Yoni ice. Gima rino Noni pai biyok “Ningat ne mijidut ei gi mokti di didut eisi bijiyai dimig yam tug hon ninghuisi wei noyam kin Dani.

⁴⁰Noro tut yo di igwam kui dinda com kin dinda prak ne bit bon dindo yok bi lewo Dicig jem gumihyep dima bou No mem yo di inyeng jo niti he.”

⁴¹Tirigi yo di igya kui Yesus nindigsi ibou simnai imiap tut mun di yo cin dima yahara Yesus tut lene ingon sibui sut Yakobus kin Yohanes.

⁴² Gima rino Yesus hig yo di igya kui Noni yahagom kwei bipai biyok “Jikan tut bipia nibou ndig ngkiai nya ico kep ide limwa nya lene yo di isindem nya ighyet buhun tak ide awak nya.

⁴³ Noro ma jinok yoni au. No di joi sut yai ninyeng di jei lene ma om nonti nok awak mem nindigsi nya.

⁴⁴No di joi sut ya bibie mem je lene ma om nonti nok awak mem je di nindigsi.

⁴⁵Bit leu nok Munggwom Tungwatu Nipmot di kwei leu binhyepo tungwatu nya inyohou Noni bi noro kwei leu binhyepo nyohou tungwatu nya leu api kes ninnei hak ei mem bikwek imang bibor leu mun di kat yok.”

⁴⁶Yesus nya ikwei krau minu ndig Yerikho bimbut kikau bijo leu minu ndig dima leu api tungwatu ningot ndig ijop bram yok. Mpe dima lene Bartimeus di niyai tu gwam simpak ninghas ba, tindei tungwatu nya bahara yok. No dini nicig ninyeng Timeus.

⁴⁷Tirigi noni miap tut Yesus leu minu ndig Nazaret di mbut binjiriek noni lene hara “Yesus di Daud Nipmot e, ma angondut da o!”

⁴⁸Noro imang bibor ipai ser noni “Ahara sok au.” Noro ba nihyet nindig bahara bu “Na di Daud Nipmot e, angondut da o!”

⁴⁹Gima rino Yesus ya niyati bipai bak tungwatu nya “Jihig noni kwei.” Leu api ipai bak no di niyai tu “Dwai, akiju kwei lewo Yesus hig na tu.”

⁵⁰Haninyai noni kiju kui bikes nide ban bijo ei lene bisau buug ndam Yesus.

⁵¹Yesus hig ser noni “Ajoi sut dinggon ndei na i?” No di niyai tu buhup “Andigpoi e, akinding diyai ba, da hanyen!”

⁵²Yesus pai binoni “Ambut hak ug lewo ayai da hanyen hak tug hon ade niba ningon com Dati.” Tirigi pai bak nok rino niyai da hanyen leu api noni bit Yesus kak puig dima.