Read Hatam MARKUS 14 Bible Online

MARKUS 14 - Hatam bible

MARKUS 14

¹ Mpe dima lene jo njap can bu nipou tirigi tto bou dem mem ibon pesta kep Njap Ndig Paskah kin Njap Nindig Roti Dwoi Bi bigyo lene imam nindig nya kin guru Puig Yahudi nicukti nya imem kep ser nikwesti mem gima ikat Yesus niku leu binhyepo igyai nimai bak.

²Ipai biyam “Ma ikat Noni mem njap dino ibon pesta kep Njap Ndig Paskah au. Leu ma tungwatu nya mibigen ser nye.”

³ Mpe dima lene Yesus ningat rin ei minu mien Betania bigwam bit Simon di bras yem nipou su noro kei hanyen tu. Tirigi Yesus yem njita lene sop gom bisau kwei ba, pwoi ampou tut mini mbris nuut gom di iba wangi nigau di nibok kak bibor bibon kwei lene kiber ei Yesus nibouti.

⁴Tirigi tungwatu nya ibou poi ingat misop dima nibonti dima lene ingon sibui sut ba, ihig yam “Nggon rino noni bimangkrei mini mbris dima i?

⁵Gi kei rino itri mini dima bibou ibipek mitiei nitig di buhun[16] sratus ningai leu api ibitri yo di yuhui mbum nya.” Gima rino indron noni drek dip.

⁶Noro Yesus srep “Jisindui sut noni hak! Nggon rino jisinsam noni i? Lewo noni bibon mun di kei biDa apino tungwatu nya minggei sut noni drek dip.

⁷ Yo di yuhui mbum nya ingat rin bit je kikau ba, bon nituti mem gima jingondut yok bit leu jingon kanti noro Dingat rin bit je kikau bi.

⁸Noni bibon mun dini biken tiri tug ndei nide mun di mati. Noni tin ampou tut mini mbris bikiber ei dibouti leu binhyepo bitin ei dingut dini nipou tirigi itig bigyo.

⁹Ma jiyok ngon kep bipia Allah Nihyet Di Kei mitibim bidem dihyei nisurti-nipekti tut misop dini niyai munti dini leu binhyepo tungwatu nya yahagom igyok ngon kep noni.”

¹⁰Mpe dima lene Yudas Iskariot di nggre kin ibou simnaibrimigcan di igya kui Yesus ug ngat imam nindig nya leu binhyepo tri Yesus ei indati.

¹¹Yoni ingon llei sut mun di noni pai biyok leu api ipreu mem noni tut mitiei. Gima rino Yudas nggok nikwesti mem gima kes Yesus ei indati.

¹²Ug ei njap gi nigom tirigi mben Yahudi ibon Njap Nindig Roti Dwoi Bi bibui domba Paskah bibam lene yo di igya kui Yesus ikwei hig ser Noni “Ajoi sut nitin ei pesta Paskah mem Na ei sirigitou i?”

¹³Gima rino Yesus cuk yo di igya kui Noni ibou can bipai biyok “Jicoi ug ei minu ndig dima lene juum tungwagom di ttei dibijig tut minyei lene jibit noni,

¹⁴ug ei ig bei gom leu api jipai bak ig dima niceu ‘Guru hara na tut ninsi hi mem Noni kin yo di igya kui Noni ibon pesta kep Njap Ndig Paskah eisi.’

¹⁵Lene no dima mindo ninsi nindig bibor di jo ig ninggre gi jo anai di itin ei su bije. Ma jitin ei mun di isuar nya hagom ei sirima.”

¹⁶Lene ibou can dima imbut bicoi ug ei minu ndig dima ba, ingat mun dima yok hagom dem igbit Yesus nipaisi leu api ingei njita mem pesta di igyem kep Njap Ndig Paskah.

¹⁷Mmun tu rino Yesus tau sut yo di igya kui Noni ibou simnaibrimigcan kwei.

¹⁸ Tirigi igwam jug bibon pesta lene Noni pai biyok “Ma jiyok ngon kep bipia jei bi lene je di jiyem njita bit Da dini jigom mitri Da ug ri.”

¹⁹Yo di igya kui Noni ingon buhun tut nipaisi dima leu api bikwop yoni tungwagom-gom hig ser Noni sindam bipai “Tuhan e, ningat ne apai sut dani bi e?”

²⁰Noni buhup “Tungwagom leu je di jibou simnaibrimigcan di tur roti ei gi bokorti bit Da mitri Dani.

²¹Munggwom Tungwatu Nipmot miyai nimai bit leu nok Allah nihyet pai sut Noniti. Noro aye! Notou mem no di mitri Munggwom Tungwatu Nipmot i? Gi kei rino nipmem srek tut noni habiei bi sren.”

²²Tirigi igyem njita lene Yesus yai roti nindak gom bipai sigyo bak Allah kep. Leu api ki bitri yo di igya kui Noni bipai biyok “Jiyai roti dini bijiyem ug lewo gini ne dinghui ri.”

²³Gima ngwig lene Noni yai gi mokti leu api pai sigyo bak Allah kep biyai mok tut biyok sindam leu api yahagom idut eisi.

²⁴ Gima ngwig lene Noni pai biyok “Gini ne dinggrom di tak buk ser Allah de gi preu nijep rin ba, dinggrom di siber mem tungwatu nya imang bibor ri.

²⁵Ma jiyok ngon kep bipia didut ba anggur ngei dini bu bi kikau bipek njap dino didut ba anggur ngei nijep bu ei Allah Ninyeng Tak Kepti.”

²⁶Leu api yahagom ipai doia bibinggei sut Allah. Lene imbut biyuug ei Nungug Zaitun.

²⁷ Leu api Yesus pai biyok “Himmun di ariman ne jahagom mijinang leu Da bijikes Da ei ri. Bit leu nok Allah nihyet pai ‘Allah miyai nimai bak no di gembala leu api domba nya mintek gimahap.’

²⁸ Noro tirigi Allah kon Da leu dimai eisi lene dingkwei hanyen ug ei hanjop Galilea bibie mem je.”

²⁹Petrus pai bak Yesus “E bi! Mbro nok gino yo di nindigsi dini yok yahagom ikes Na ei lo, dangkom dikes Na ei bi sren!”

³⁰Yesus buhup “Ma ayok ngon kep bipia himmun di ariman nipou tirigi hacig yau mbican bigyo lene aom ser Da mbiningai ug ri.”

³¹Petrus ba nihyet singga bisrep “Mbro nok gino diyai nimai kin Na lo, midoom ser Na bi sren!” Lene yo di igya kui Yesus nindigsi nya yahagom ipai bram Petrus nipaisi dima.

³²Yahagom yuug ei mpia ttou nsi di Getsemani leu api Noni kuk yo di igya kui Noni bipai “Jigwam nyahan ei mpia dini leu bibou duug ngat nadi ug e.”

³³Lene Noni buwak Petrus kin Yakobus kin Yohanes bimbut mbigom kin bu. Mpe dima lene Yesus ningon ngguk bibor ba, ningon buhun bibor cem.

³⁴Noni pai biyok “Dingon buhun bibor bidikan bipia dimai ug ri. Ma jigwam nyahan ei mpia dini bijiyai ngkiem ser Da.”

³⁵Yesus ug ei pas poi leu yok lene kuk No ba, ba ningwak bikik dihyei leu api ngat nadi leu binhyepo gi bon nituti lene ma ngon bou niyai ninghuisi weisi dima njiriek leu Noni.

³⁶Ba, ngat nadi bipai “Arig e, asindem mem mun nyeng hagom. Ma ayai ninghuisi wei dini binjiriek leu Da hak ug. Noro dibit dingon kanti bi leu binhyepo dibit angon kanti.”

³⁷Ngat nadi nok leu lene Yesus kwei tau kep ibou ningai pima hanyen bingat lo, ibong mai leu su. Noni hig ser Petrus “Simon e, abong mai su e? Bit bon ayai ngkiem ser Da mem jam gom ngat bi e?”

³⁸Lene Noni sok kep yahagom “Ma jiyai ngkiem bijingat nadi cem ser nhyepo jingkwei hanyen tirigi jibiam mun di srou je bi. Ningat ne jingon llei sut jiyai kep mun di kei nya noro jisindem mem bi lewo jinghuisi jet ser.”

³⁹Noni ngkwei hanyen bingat nadi bit leu nok gi nipou pima bu.

⁴⁰Bikwei hanyen lene ngig niyai kep ibou ningai pima mbigom bu lo, ibong mai leu su lewo igyai nggrop buhun. Gima rino ikan tut mun di ibirop hanyen biNoni bi.

⁴¹Tirigi Noni kwei ngat yok nimbiningai bu lene hig ser yok “Jibong mai kep jinghuisi kikau e? Cobi! Tto bou dem mem tungwatu nya itri Munggwom Tungwatu Nipmot ei yo di isibut nya indati tu.

⁴²Jikiju ba, imbut ri. Jingat i! No di mitri Da ttau kep nye tu!”

⁴³Tirigi Noni pai nok rino Yudas di nggre kin ibou simnaibrimigcan ttau kep yok bibuwak yo di isibut nya bikwei sut ide simeda kin biap tindak. Imam nindig nya kin guru Puig Yahudi nicukti nya kin nibou mben Yahudi nya yahagom icuk yok kwei.

⁴⁴No di tri Yesus pai bak yo di isibut nya bibie tu bipai “Ma jitou kep! Gino dimei tungwagom ningyoi lene mijikan tut bipia No pima ri. Ma jikat Noni ngkiem ba, jibuwak ug!”

⁴⁵Tirigi Yudas kwei krau mpia ttou nsi dima lene noni bisau buug ei Yesus niyati bipigo “Guru e, acem!” Leu api noni mei Yesus ningyoia.

⁴⁶Lene yo di ibit Yudas kwei ibisau bikat Yesus lene iba lante biteu.

⁴⁷Noro tungwagom di ningat rin ei sirima hit nide simeda bitot Imam Nibou Ndig de awak hi bisriot nitingou meng bicut leu.

⁴⁸Lene Yesus hig ser yok “Jikwei sut jide simeda kin biap tindak ba, jikwei bikat Da bit leu nok jikat no di sibut e?

⁴⁹ Apo dingat rin ei Tuhan De Ig biditri tut dihyet bikwop njap-njap bou jiyai him lo, jikat Da bi e? Noro suar mun dini yok hagom cut igkep nye leu binhyepo Allah Nihyet midem igbit.”

⁵⁰Yo di igya kui Noni yahagom ikes Noni ei binang leu.

⁵¹Pinjoi pilei di kai sre nitut gom ser hou abia kep Yesus. Yo di isibut nya ipi bikat noni cem lo,

⁵²kes nide sre di ikat ei indati binang tut ningat ngu leu yok.

⁵³Ibuwak Yesus ug ei Imam Nibou Ndig de ig. Ba, imam nindig nya kin nibou mben Yahudi nya kin guru Puig Yahudi nicukti nya yahagom idem yam ei sirima.

⁵⁴Petrus abia kep yok bitumbeu sut yok kikau ug bipek Imam Nibou Ndig de biyati. Noni coi ug ei biyati bigwam srig imam de limwa nyati hek hum.

⁵⁵Imam nindig nya bitut Nikei Puig Yahudi nya yahagom ibicom yam binggok tungwa hi mem gima mbres mun kep Yesus bikkin kep ninghapti leu binhyepo ijem nimai gau Noni drek dip. Noro ingat tungwa hi bi.

⁵⁶Mbro nok gino tungwatu nya imang bibor imbres mun kep Yesus lo, ighyet tot kep yam hyet bi.

⁵⁷Lene ibou poi ikiju bigya lene imbres mun kep Noni bipai,

⁵⁸ “Nimiap Noni nihyet di pai bipia Noni milet Tuhan De Ig di tungwatu nya ingot bou inda him dini leu api njap ningai bu lene Noni mingot hiter bu di tungwatu nya ingot bou indati him bi.”

⁵⁹Noro yo dini cem ighyet tot kep yam hyet bi.

⁶⁰Gima rino Imam Nibou Ndig kiju biya ei yahagom yoho bei leu api hig ser Yesus “Abuhup yo di ipai kep Na ighyet bi e?”

⁶¹Noro Noni buhup bi. Lene Imam Nibou Ndig hig ser Noni bu “Apo anyeng Nibou Ndig di teu tungwatu nya biyai niyaijo nijep biyok di Allah di kwes-kwau Nipmot e?”

⁶² Yesus ce “Bit leu nok jipaisi dima. Mijingat Munggwom Tungwatu Nipmot di gwam kui Allah Di Sindem Bibor ninda com[17] tirigi Noni kwei ei bumbuhuiti leu mpia-bbed him kwei ri!”

⁶³Pai nok rino Imam Nibou Ndig bisinggre birik nide sinsun[18] Bipai bak nindigsi nya “Isuar yo di ikkin kep ninghapti bu bi!

⁶⁴ Nihyet di wer mpiahi tut Allah tibim ei jitingou nsi tu. Gima rino jipai igbit jikos tutti hak ug.” Yahagom ikos tut bipia Yesus ningon mui ba, dem mem gima ikes hukum nimai ei Noni dip.

⁶⁵Lene ibihi itrai ndei Noni leu api iba sinsun ninghas binggai kep niyai lene ibui Noni. Leu api icuk “Ando igbit no di bui Na i.” Ba, yo di igya ser Tuhan De Ig ittem nijap bu.

⁶⁶Petrus no ya nyen ei biyati lene Imam Nibou Ndig de awak sop gom tau ndam noni.

⁶⁷Tirigi noni ngat lo, Petrus no gwam hek hum lene tou kep noni nggilun bipai “Nani cem aya kui Yesus leu Nazaret bi e?”

⁶⁸Noro Petrus om ser bipai “Dimiap ahyet dima bidikan tut bi.” Lene noni hei bigwam ei dimbou huigya. [Hammi tirigi pai nok rino hacig yau nimbigom.]

⁶⁹Sop dima ngat noni hanyen bu bipai kep noni bak tungwatu nya di ingat rin ei biyati dima “No dini tti kin yo dima.”

⁷⁰Noro Petrus om ser hanyen bu. Jei bi lene tungwatu di igya-ya nyen ei biyati ipai kep noni bu “Jo nibreisi bipia nani cem atti kin yo di igya kui Yesus lewo nani cem atimieisi leu hanjop Galilea.”

⁷¹Lene Petrus ba neheng bibuhup “Dikan igbit No di jipai dima bi sren!”

⁷²Hammi tirigi pai nok rino hacig yau nimbican ba, Petrus yok ngon kep Yesus nisok kepti pima di pai “Himmun di ariman tirigino hacig yau mbican bigyo lene aom ser Da mbiningai bipia akan tut Da bi ug ri.” Apino noni pim biniyai nggwei kibor.