Read Hatam MARKUS 16 Bible Online

MARKUS 16 - Hatam bible

MARKUS 16

¹Njap Nigwam Kep Ninghuisi njiriek tu lene Maria Magdalena kin Maria di Yakobus nipmem kin Salome yuug pek mpam di nuui kei mem gima ibihwen nimai ngut.

²Njap di hyep lene ide las gom rin ba, iba njap bigyoti bikwei yok igyai kep jui dip.

³Tirigi ingat rin ei puig sinon lene isimbot kep biyam “Tou rima mpu nye bibei tig mma di jo ser jui dip leu nye i?”

⁴Isimbot kep biyam nok lewo tig dima nindig bibor. Leu api yuug ngat lo, hi son tig mma leu jui dip tu.

⁵Gima rino yuug bicoi kikau ug ei hak mihyeti dima bingat pinjoi pilei gom di gwam ei nite bei inda com di juk sinsun di tiei-tiau kei. Apino sop nya inghuisi mpig sut.

⁶Pinjoi pilei dima pai bak sop nya “Ma jinghuisi mpig sut au. Dikan tut bipia jinggok ser Yesus leu minu ndig Nazaret di ipek ei biei salibti. Ningat rin ei mpia ttou nsi dini bi. Noni kiju hanyen leu nimai eisi tu! Jikwei ngat mpia di ikes ningut eisi rini.

⁷ Ma jibipbur bijingkwei hanyen lene ma jipai bak yo di igya kui Noni kin Petrus cem bipia Noni ug ei hanjop Galilea bibie mem je. Mijingat ningat ei mpia dima bit leu nok nipai bijeti.”

⁸Gima rino sop dima yok iba inghuisi di mpig sut kin ingon di digit tut bipbur binang leu jui dip. Ipai sut bak nindigsi nya bi lewo ittin tut nindig bibor. [

⁹Tirigi Yesus kiju hanyen leu nimai eisi ei mben Yahudi ide las gom mem njap bigyoti tu lene ndo Nonti bak Maria Magdalena. (Noni ne sop di Yesus jji ninnei rom muhwindacan leu ningonti nipou su ri.)

¹⁰Gima rino Maria Magdalena ug tri tut Yesus nittau kep noti bak yo di igya kui Noni tirigi ingon ngguk tut nimai bigyai nggwei kibor.

¹¹Noro tirigi imiap Maria nipaisi di pai Yesus kiju hanyen ba, ngat Noni bou niyai him tu lo, ingon bit nihyet bi.

¹²Gima ngwig leu lene Yesus ndo Nonti brei bak ibou can di ibit Noni tirigi ingat rin ei puig sinon biyuug ei minu mien hiter.

¹³Gima rino ingkwei hanyen bitri tut mun di bitimon yok bak yo di igya kui Yesus noro yo dima ingon bit ighyet bi.

¹⁴Gima leu lene Yesus ndo Nonti brei bak yo di igya kui Noni ibou simnaibrimiggom tirigi igyem njita. Noni sinsam yok tut ide niba ningon com Noni mungkun bisi ba, ingon bit yo di ingat Noni bou igyai him tirigi kiju hanyen leu nimai eisi tu pima ighyet cem bi.

¹⁵ Lene Noni cuk yok “Ma jimbut bijuug ei dihyei nisurti-nipekti ba, jitri tut Allah Nihyet Di Kei bak tungwatu nya yahagom.

¹⁶Yo iba ingon com Noni bi mitug ndei hukum. Noro yo di iba ingon com Noni di itur yok ei minyeiti migyai niteu leu sisarti kin niyaijo nijep.

¹⁷Mun di bindo bipia yo dima iba ingon com Da mungkun rino iba dinyeng bijji ninnei rom nya leu tungwatu nya ingonti ba, iba nihyet hiter di ingon dorti bi bimbrap.

¹⁸Gino ikrau wou piet ba, ipinde mun di pijuk di bindei di imai cem lene yoni mitug midut bi. Gino ikes inda ei yo di inggwen nya dip lene yo dima mikei hanyen.”

¹⁹ Niabiati Tuhan Yesus mbrap bit yo di igya kui Noni leu lene Noni ngkwei hanyen ug ei gwamti bigwam kui Allah ninda com.

²⁰Gima rino yo di igya kui Noni intek gimahap ug ei dihyei nisurti-nipekti bitri tut Allah de Nihyet Di Kei. Tuhan ba No kum yok lene ba mindur nya bindo bindo bipia mun di tibim ei yuhui him dima ne mun di nijit-jau ri.]