Read Hatam MARKUS 4 Bible Online

MARKUS 4 - Hatam bible

MARKUS 4

¹ Mpe di gom bu lene Yesus ug gwam ei igpong nipimat leu api tri tut nihyet bak tungwatu nya leu api tungwatu nya ningot ndig induk yam kwei bingwig ttai Noni. Gima rino Noni bri bigwam ei ut nsi ba, ut piar tut ei minyei ngwa dip lo, tungwatu nya igya nyahan ei igpong nipimat.

²Lene Noni ba nihyet nibiti nindati mang bibor bingginau yok bipai,

³“Jimiap e, mpe di gom lene tungwagom ug ei nide miai ngwoisi bahap njita ngan.

⁴Ninda jo kep bahap leu api njita ngan gom-gom cut ariwace ug ei puigsi apino ha nya ikwei puk bingwig.

⁵Ninda jo kep bahap hi kin bu leu api gom-gom cut ariwace ug ei tigsi di bon dihyei suti bi. Apino dihyei dima ribindei dino njita kioi hei haninyai.

⁶Noro mpe dino mpia ngket lene nikioi mbris lewo bit bon com nigau ei dihyei jou bi ba, jei bi lene mui bingwig.

⁷Njita ngan gom-gom cut ariwace ug ei bohousi leu api bohou ceu nikioi ba, mui bingwig lene ngat ningat hi bi.

⁸Noro njita ngan nindigsi cut ei dihyei suti apino nikioi hei ba, ningat ntun him. Ninjem hi ngat ningat ningot ningai lene ninjem hi ngat ningat ningot muhwindagom lene ninjem hi ngat ningat sratus gom lene bikwop nok.”

⁹Niabiati Yesus ba nihyet nibiti nindati bingginau yok leu lene pai biyok “Gino jitingou dile lene ma jiyok ngon kep dihyet!”

¹⁰Tirigi Yesus gwam biNongkom lene ibou poi di imiap nihyet iba yok bikum yo di igya kui Noni ba, yahagom ikwei hig ser Noni tut nihyet nibiti nindati dima.

¹¹Gima rino Noni buhup “Allah mbot kep mimun tut Ninyeng Tak Kepti bije noro mbot kep mimun dima bak yo di igwam Nonti ninghim tug hon nihyet nibiti nindati he.

¹² Leu binhyepo, ‘Mbro nok gino imian ser ninno lo, ingon dorti bi. Mbro nok gino ingig itingou mem nihyet ninno lo, imiap bi. Mun dini pek kep mem yok ser nhyema iba igyai bingat mungkun cem, iba ingon bisrip huk cem leu api ingkwei hanyen ndam Da bidibindei ba, ikei hanyen bidikos ser ide sisar cem au.’ ”

¹³Leu api Yesus hig ser yok “Gino jimiap nihyet nibiti nindati dima bi lene notou jimiap nihyet nibiti nindati hi kin bu i?

¹⁴No di hap njita ngan pima rino hap Allah nihyet.

¹⁵Njita ngan di cut ei puigsi bindo tut yo di intu kep nihyet noro hammi tirigi intu kep nihyet rino Bilis kwei pos nihyet di cut ei ingonti.

¹⁶Njita ngan di cut ei tigsi bindo tut yo di intu kep nihyet lene iba ingon di kei bingon jo kep.

¹⁷Noro nihyet com nigau ei ingonti kan bi apino ingon nddong bi. Hammi tirigi mun di kinei cut igkep yok ba, hiter hwen bit yok drek dip nihyet rino ingkwei hanyen.

¹⁸Njita ngan di cut ug ei bohousi bindo tut yo di ipwoi nihyet ei ingonti,

¹⁹noro ingon ku yonti tut mun di pror yon ba, iba yoho rok mitiei nindig bibor apino gima yok hagom ceu nihyet leu api ningat ntun him bi.

²⁰Lene njita ngan di cut ei dihyei suti bindo tut yo di intu kep nihyet ba, ingon jo kep leu api ningat ntun him. Ningat ningot ningai ntun bihi him lene ningat ningot muhwindagom ntun bihi him lene ningat sratus gom ntun bihi him lene bikwop nok.”

²¹ Leu api Yesus hig singgre yok “Tou ritin mini ba, njeng lene ba bokor bikibou kep ninjeng hanyen bikes bijo ei bilen nibehei i? Hi bi! Noni kon ninjeng bikes ei nidihimti.

²² Ninjeng gom mipiga digai mun nyeng hagom di jo nding hanyen. Nihyet gom mitibim tut mimun hagom hanyen.

²³Gino jitingou dile lene ma jiyok ngon kep dihyet!

²⁴ Ma jiyok ngon kep mun di tibim ei jitingou nsi. Allah mibinai je bit leu nok jibinai nindigsi nya lo, Noni mibinai je dor njiriek bu.

²⁵ Lewo Allah mikum eisi bak no di ningon dorti dor njiriek bu. Noro Noni mitug niken hanyen leu no di ningon dorti bi.”

²⁶Lene Yesus pai bu “Allah Ninyeng Tak Kepti rinok tungwagom di hap njita ngan ei nide miai ngwoisi.

²⁷Noni bong bikwop mmun leu lene kiju bikwop njap tirigi njita kioi hei bijei. Noro kan igbit tut mun di bindei dino njita bou ngat ningat bi.

²⁸Lewo dihyei bindei ba, njita bou ngat ningat. Nok gandum nikioi hei bijei lene ninjep mien-mien ntun him leu api ningat len bu.

²⁹ Tirigino gandum ningat len tu lene noni ug ei beisi bimem ninghat tut singau koi bikos nintam kwei lewo dem ngon bou tu.”

³⁰Yesus hig ser yok bu “Iba mindei ba, ibinai sut Allah Ninyeng Tak Kepti i? Notou miditri tut mun di bindo tut i?

³¹Diba biei sawi ngan[5] di bigbibor dor njiriek njita ngan nindigsi binai sut Allah Ninyeng Tak Kepti. Lewo tungwatu nya indim ningan ei ide miai ngwoisi.

³²Tirigi hei su lene ninjem jei bibor dor njiriek njita nindigsi hagom di tungwatu nya indim ei ide miai ngwoisi binok biei leu api ha nya itot yaham ei ninda nyati.”

³³Yesus ba nihyet nibiti nindati mang bibor bitri tut nihyet biyok dem igbit ingon di dor niti.

³⁴Yesus ba nihyet nibiti nindati bingginau tungwatu nya bikwop ug. Noro Noni mbot kep tut nihyet nibiti nindati dima hagom tirigi Noni kin yo di igya kui Noni induk yam bigwam biyongkom.

³⁵Mmunti lene Yesus pai bak yo di igya kui Noni “Jikwei ba, yuug ei igpong nite dinyo ug ri.”

³⁶Gima rino Yesus bri ei ut nsi bibie leu yok lene yo di igya kui Noni ikes tungwatu ningot ndig dima yok leu api ibri ei ut nsi bit Noni ei minyei ngwa dip. Ut nindigsi nya cem gom-gom rima bit yok.

³⁷Jei bi lene hou di nimig ten bibor cut kros ba, igpong roi nindig bibor bikibor ug ei ut nsi ba, mbigom ne isar minyei.

³⁸Noro Yesus bitau bitau bibong mai ei ut ninor leu su. Haninyai yo di igya kui Noni iwin ba, yahara “Guru e, ma asindui sut ba, isar minyei ug e?”

³⁹Lene Noni kiju biya leu api ggai ser hou di ten bibor kin igpong di roi bibor bipai “Jikes hon ba, jintus hak.” Apino hou di ten bibor ntus hak ba, mpia mbum-bra.

⁴⁰Lene Noni hig ser yo di igya kui Noni “Nggon rino jidigit tut i? Nggon rino jiba jingon com Da bi i?”

⁴¹Gima rino yoni inghuisi mpig sut nindig bibor bihig yam “Tou rini i? Lewo hou kin minyei ntus bit nihyet.”