Read Hatam MARKUS 9 Bible Online

MARKUS 9 - Hatam bible

MARKUS 9

¹Yesus pai biyok “Ma jiyok ngon kep bipia je di jingat rin ei mpia dini jibihi mijiyai nimai bi bibou jingat Allah Ninyeng Tak Kepti di mikwei sut Nide nisindemti bou jiyai him ug e!”

² Njap muhwindagom ser lene Yesus buwak Petrus kin Yakobus kin Yohanes nya ba, kui sut yok ug ei mbigdip gom anai bibor biyongkom. Tirigi iba igyai nghuisi jik kep Yesus lene ingat lo, luei nitta ba,

³Nide sinsun sieng-siau bitiei kei bidor njiriek sinsun di iba sabun di sindem bitot nya hagom.

⁴Leu api yo di igya kui Noni ibou ningai dima ingat Nabi Elia kin Musa di ikwei mbrap bit Yesus.

⁵Gima rino Petrus pai bak Yesus “Guru e, nyeni ningon llei sut gi ningat rin bit je. Gi kei mem nohok ig jibei ningai ba, hi mem Nani hi mem Musa lene hi mem Nabi Elia.”

⁶Yo di igya kui Yesus dima ittin tut nindig bibor apino Petrus ba ningon di kiowi niti bipai nihyet nghwak him dima.

⁷ Leu api bumbuhui ttou gom juk kwei binggai kep yok ba, nihyet gom tibim kwei leu bumbuhui ttou bipai “No dini ne Dipmot di dingon ngakei rin ba, ma jimiap kep Noni nihyet.”

⁸Ibipbur ba, icap nggok nyen bingat lo, tungwatu hi bi noro Yesus Nongkom ningat rin bit yok.

⁹Tirigi ijuk kwei leu mbigdip lene Yesus sok kep yok ngkiem ser “Ma jitri tut mun di jingat bou jiyai him dima au bibou Munggwom Tungwatu Nipmot kiju hanyen leu nimai eisi ug e.”

¹⁰Leu api ipwoi Yesus nihyet dima ei ingonti lo, ingon kiowi niti ba, ihig yam biyongkom “Gi pai sut nikiju hanyen leu nimai eisi dima ne ikan tut ningon kanti dima bi.”

¹¹ Lene ihig ser Noni “Nggon rino guru Puig Yahudi nicukti nya ipai sut Nabi Elia bipia suar noni kwei bibie i?”

¹²Yesus buhup “Gima igbit rin lewo Nabi Elia ttau bibie kwei leu binhyepo nyohou dimig mun nyeng hagom bikei hanyen. Noro notou mem Munggwom Tungwatu Nipmot i? Nggon rino Allah nihyet pai sut Munggwom Tungwatu Nipmot bipia miyai ninghuisi wei nindig bibor ba, tungwatu nya mibimangkrei Noni ugwai-gwai i?

¹³Noro dipai bije bipia Nabi Elia tau kwei su noro tungwatu nya ibimangkrei noni ugwai-gwai bit leu ingon kanti. Mun dini yok bit leu nok Allah nihyet pai sut noni.”

¹⁴Tirigi Yesus nya itau kep yo di igya kui Noni nindigsi nya hanyen lene ingat lo, tungwatu ningot ndig inggreu tai yok ba, guru Puig Yahudi nicukti nya ibou poi isrep huk yok.

¹⁵Tirigi yo dima ingat igbit Yesus lene inga leu tut ba, ibisau ndam bigya um Noni.

¹⁶Noni hig ser yo di igya kui Noni “Jisrep huk yok tut mindei i?”

¹⁷Tungwagom di srig yo di ningot ndig dima ikieti hara Yesus “Guru e, duusap dipmot kwei bak Nani lewo ninnei rom ya ningonti bikibou noni.

¹⁸Tirigi ninnei rom bon noni lene njei nonti ug ei dihyeisi cem nirai kui tas kep niji nghuisi cem sien nikwai cem leu api ningut titut yam nggicai. Dahara yo di igya kui Na dini noro bit bon ijji ninnei rom dima kan bi.”

¹⁹Lene Yesus buhup “Mei! Jo nibreisi bipia jiba jingon com Da bi! Diya tut je njap pig bu i? Doom dingon tut je njap pig bu i? Juusap noni kwei biDa!”

²⁰Gima rino yuusap mot dima kwei ndam Yesus. Tirigi ninnei rom ngat Yesus lene noni dahat kukwei mot dima ninyen binjei nonti ug ei dihyeisi bibindei ba, rim-rim nyen ba, nirai kui tas kep niji nghuisi.

²¹Lene Yesus hig ser nicig “Ninnei rom ya ningonti apig su i?” Noni buhup “Habiei leu ningwoi-ngwoi kwei su.

²²Ninnei rom njei noni ug ei humti kin minyeiti ninyen leu binhyepo yai nimai binoni. Gino asindem mem gima ampu nye lene ma angondut nye ba, ampu nye o!”

²³Yesus buhup “Nggon rino ahig Da ‘Gino asindem mem gima ampu nye’ i? Lewo bon no di ba ningon com Da yai mun di hagom kan.”

²⁴Haninyai no dima hara Yesus “Diba dingon com Na noro wer dem bi ba, ampu da leu binhyepo diba dingon com Na nindig bibor bu.”

²⁵Tirigi Yesus ngat lo, tungwatu ningot ndig hi kin bu induk yam kwei binggreu ttai Noni lene cuk ninnei rom dima bipai “Ninnei di bindei niji nggicai kin nitingou nam e, dicuk na bipia ahei bihigom ba, acoi ug ei ningonti bu au!”

²⁶Ninnei rom hara nindig bibor bidahat kukwe mot dima hanyen leu api hei leu ningonti bibindei ba, dem kep nimai ngut apino yahagom ipai “Noni mai su!”

²⁷Noro Yesus krau ninda bibrim leu api noni kiju hanyen biya pijum.

²⁸Tirigi Yesus kin yo di igya kui Noni icoi ug ei ig bei gom biyongkom lene ihig ser Noni “Nggon rino nijji ninnei rom dima leu ningonti kan bi i?”

²⁹Yesus buhup “Suar jijji ninnei rom di nok gima leu tungwatu nya ingonti tug hon nadi nongkom he.”

³⁰Yesus nya ijo leu mpia ttou nsi dima bimbut kak puig ug ei hanjop Galilea. Noro Noni ku nimbutti leu tungwatu nya leu binhyepo hi kan tut bi,

³¹lewo ngginau yo di igya kui Noni bipai biyok “Ibou poi mikes Munggwom Tungwatu Nipmot ei tungwatu nya indati leu api yo dima mikos Noni noro njap ningai bu lene Noni mikiju hanyen leu nimai eisi.”

³²Noro yo di igya kui Noni ingon kiowi tut ningginausi dima lo, igihig ser Noni tut bi lewo ingwes mien tut.

³³Tirigi ikwei krau minu ndig Kapernaum bicoi ug ei ig bei lene Yesus hig singgre yok “Aponi jiba jihyet dahat yam tut mindei ei puig sinon pima i?”

³⁴ Noro ibuhup nihyet bi lewo iba ighyet dahat yam ei puig sinon tut gi hi dima ninyeng jei dor njiriek nindigsi nya.

³⁵ Yesus gwam jug binduk ibou simnaibrimigcan di igya kui Noni bikwei gwam bit Noni lene pai biyok “Ma no di joi sut ya bibie mem tungwatu nya om nonti biya nohon keti binok awak mem nindigsi yahagom.”

³⁶Leu api Noni hig munggwom mien gom kwei biya hak ei ikieti ba, nggriou noni lene pai bak yo di igya kui Noni,

³⁷ “Bikwop no di ya um munggwom di nok gini drek dip Dani lene no dima ya um Dani cem. No di ya um Dani ne dem kep nok ya um Dangkom he bi noro ya um No di cuk Da kwei cem.”

³⁸Lene Yohanes pai bak Yesus “Guru e, mpe di gom ne ningat no di ba anyeng bijji ninnei rom leu tungwatu nya ingonti lene niggai ser noni lewo tti kin nye bi.”

³⁹Noro Yesus buhup “Jiggai ser noni au. Lewo bon no di bibon mindur tug hon dinyeng dima luei ningonti hanyen bipai Da kinei bi.

⁴⁰ Lewo no di srep tut je bi dima tti kin je tu.

⁴¹ Ma jiyok ngon kep bipia no di ttin kau tut minyei mem je di jiya kui Nibou Ndig di teu tungwatu nya biyai niyaijo nijep biyok jidut eisi ne no dima nimuhup mitau binoni.”

⁴²“Bikwop no di bindei dino munggwom mien dini gom ngkwei leu ba, ba ningon com Da bu bi lene gi kei rino tungwatu nya ikim tig mma di nindig bibor ba, ibisrou no dima nikimam binjei sut ug ei muk jou.

⁴³ Gino jinda hi bindei ba, jicut ei sisarti lene ma jirop jinda leu hak ug! Gi kei rino jinda hom kikau ug ei jiyaijo ningwig honti leu gima jinda hacem jo kikau lene gima bindei ba, jisar ei hum njengti di jo kikau. [

⁴⁴Ei mpia ttou nsi dima ne njingwoi mai bi ba, bipio yok lene hum njeng cem bit bon hi mu kan bi.]

⁴⁵Gino jimig hi bindei ba, jicut ei sisarti lene ma jirop jimig leu hak ug! Gi kei rino jimig hom kikau ug ei jiyaijo ningwig honti leu gima jimig hacem jo kikau lene gima bindei ba, jisar ei hum njengti. [

⁴⁶Ei mpia ttou nsi dima ne njingwoi mai bi ba, bipio yok lene hum njeng cem bit bon hi mu kan bi.]

⁴⁷ Gino jiyai njep hi bindei ba, jicut ug ei sisarti lene ma jiket jiyai njep leu hak ug! Gi kei mem jiba jiyai gom ngat bicoi ug ei Allah Ninyeng Tak Kepti leu gima jiyai njep hacem jo kikau lene gima bindei ba, jisar ei hum njengti.

⁴⁸ Ei mpia ttou nsi dima ne njingwoi mai bi ba, bipio yok lene hum njeng cem bit bon hi mu kan bi.

⁴⁹Mpe dima lene Allah nden Nide hum ei bikwop tungwagom-gom dip. Hum dima noyam kin nsim di tungwatu nya inden ei mikwau di ikwas tut Allah ei nimbar hum dokti di bindei ba, nyop kei.

⁵⁰ Ba, nsim di nijep nyop kei. Noro gino mbum hanyen binyop bi ne notou ikinding binyop hanyen i? Gima rino ma jinyohou nsim ei jingonti ba, jingon kwes kin yam.”