Read Hatam LUKAS 1 Bible Online

LUKAS 1 - Hatam bible

LUKAS 1

¹Srat dini mem Andigpoi Teofilus di ninyeng jei. Nipou pini jug ne tungwatu nya imang bibor ita ibou ei nipas kep sindam tut mun di pek kep ei nyeni nikieti tu.

²Yo dima ipas kep mun di tungwatu nya ingat bou igyai him habiei leu nimbie him di ipui kep binye leu api itri tut hanyen bu.

³Gima rino Andigpoi e, dikan bipia gi kei mem dipas kep mun di pek kep dima yok sindam bak nani lewo dinyohou pigot bram hagom leu nimbie him kikau kwei bipek ammani kep tu.

⁴Dipas kep tut ayat dini yok hagom leu binhyepo akan tut bipia ningginausi di amiap tut pima ne nijit-jau ri.

⁵ Tirigi nibou ndig Herodes ninyeng tak kep hanjop Yudea lene Zakharia di nggre kin nimpung Abia yai midyai nok imam. Nitnem ninyeng Elisabet ba, noni cem ntun imam nya him.

⁶Ba, yahacem iba ingon di sren biyai mun di bindei ba, Allah joi sut yok. Iba ingon di gom bibit Allah nihyet kin nicuk yokti nya hagom.

⁷Noro igyai munggwom hi bi lewo Elisabet pijet ba, yahacem inghim koi su.

⁸Mpe di gom tirigi imam nimpung Abia igyai midyai sindam lene Zakharia bindei mbut nide midyai nok imam ei Allah Noho bei.

⁹Imam nya ikes srat ninghas tut inyeng di joti bit leu nok igyai kepti ba, ibinggok tut. Apino daptar ndo Zakharia nok no di suar ndig biei nggrai di ui-gwang kei ei nimbar hum ndokti. Gima rino noni coi ug ei Tuhan De Ig,

¹⁰bibon midut nindig biei nggrai di ui-gwang kei pima lene tungwatu nya imang bibor igya nisai ba, ingat nadi.

¹¹Mpe dima Allah de malaikatigom kwei ya kui nimbar hum ndok ei nite bei ninda com bindo nonti bak Zakharia.

¹²Lene Zakharia ninghuisi mpig sut ba, ningon digit tut nindig bibor.

¹³Noro malaikati dima pai bak “Zakharia e, ma angon digit tut au! Allah miap ade nadi tu. Gima rino atnem Elisabet misrek tut munggwom pinai. Suar ajem ninyeng Yohanes.

¹⁴Apino angon minggei-hi-nggei ba, ayai nillei cem. Tungwatu nya imang bibor mingon llei bibor ei mpe dino nipmem srek tut noni!

¹⁵ Noni miyai ninyeng di jei ei Allah niyai him. Ma noni dut ba anggur ngei kin mun di pu tungwatu nya au. Ninnei Gi Kwes misrek kwei ei ningonti nipou tirigi nipmem srek tut bigyo.

¹⁶Noni mibindei ba, mben Israel imang bibor mingkwei hanyen ndam Tuhan di nok ide Allah.

¹⁷ Noni miya bibie mem Tuhan biyai nisindemti bit leu nok nisindemti di Nabi Elia yai nipou su. Leu binhyepo munggwom nya mingon kwes kin icig bat nya ba, noni cen yo di ibit nihyet bi nya kak puig di yo di ingon sren nya ibit hanyen bu cem. Gima rino noni mibindei ba, Allah de limwa nya mitin ei mem Tuhan hanyen bu.”

¹⁸Zakharia hig ser malaikati dima “Notou midikan tut mun di mipek kep mem da dini i? Lewo dinok andig-ndau su ba, ditnem cem nok sindig-ndau leu su.”

¹⁹ Malaikati buhup “Dinyeng Gabriel. Diya hak ei Allah Noho bei. Noni cuk da kwei leu binhyepo ditri tut nihyet di kei dini bina.

²⁰Mun di dipai mipek kep mem na. Noro hon kep ammani kui ne abbwe kikau ba, ahyet tibim leu ahui him bi bibou mun di dipai bina mipek kep mem na ug e. Gima hagom drek dip angon di jo kep dihyet bi ri.”

²¹Lo bi lene yo di imang bibor igya kikau bimem kep ser Zakharia nitau hanyenti ba, ingon kiowi tut midut di noni yai bijo ninno dima.

²²Tirigi noni hei kwei lene bit bon mbrap bit yok kan bi. Noro ba ninda ngon ndiyok biyok lewo noni bbwe. Yoni ikan tut bipia noni ngat ningat-hi-ngat gom bou niyai him ei Tuhan De Ig tu.

²³Tirigi Zakharia de njap di yai midyai sindam pima ngwig leu su lene noni ngkwei hanyen ug ei nide ig.

²⁴Jei bi lene nitnem Elisabet nghop ba, ku no nyahan ei ig bei kikau mem bed muhwi.

²⁵Noni kan “Cobi! Allah ngondut sa biciu ser gi po simmai sut santi bou tungwatu nya igyai him pima leu sa tu!”

²⁶Elisabet nghop ei bed muhwindagom tu leu api Allah cuk malaikati Gabriel buug ei minu ndig Nazaret ei hanjop Galilea.

²⁷ Noni ug ngat sop gwam nitta pilei gom di ninyeng Maria di ngwam kep Yusuf di nide pung kim Nibou Ndig Daud.

²⁸Malaikati dima coi ug ei ig bei bingat Maria bipigo “Na di sop di Allah singat tut na ba, ningat rin bit na e, acem!”

²⁹Leu api Maria ninghuisi mpig sut bihig ningonti tut malaikati nipigo noti dima.

³⁰Gima rino malaikati pai bak “Maria e, antu kep anghuisi tut au lewo Allah joi sut na.

³¹ Mporo anghop ba, asrek tut amunggwom nipinai lene suar ajem ninyeng Yesus.

³² Noni miyai ninyeng di jei ba, tungwatu nya mijem ninyeng Allah Di Ninyeng Jei Nipmot. Tuhan Allah mibindei ba, Noni yai ninyeng nibou ndig noyam kin Nibou Ndig Daud di Noni ntun him.

³³Ninyeng mitak kep yo di intun Yakub him yahagom bijo ninno ba, ninyeng tak kepti cem muug hon nohonti bi sren!”

³⁴Maria pai bak malaikati bipai “Mei! Midiyai dimunggwom notou i? Lewo dani ne sop gwam nitta pilei yo ri!”

³⁵Malaikati buhup “Ninnei Gi Kwes misrek kwei ei nani dip ba, Allah di Ninyeng Jei cem minggai na yo. Gima rino amunggwom di asrek tut dima miyai ninyeng Gi Kwes-Kwau cem Allah Nipmot cem.

³⁶Ma ayok ngon kep Elisabet di atig mbier tut pima ug e? Mbro nok gino noni pijet kikau ba, wer sindigsi su lo, noni cem nghop ba, nogindini ikwop kep lo, ug ei bed muhwindagom rini.

³⁷ Lewo Allah sindem mem gima yai mun nyeng hagom kan.”

³⁸Lene Maria buhup “Dinok awak mem Tuhan. Nnaba mun di asimbot dat nya hagom pek kep mem da hak ug.” Noni pai nok rino malaikati kes noni ei bimbut leu.

³⁹Mpe dima lene Maria tin ei bimbut ug ei minu mien gom di jo ei nungug him ei hanjop Yudea.

⁴⁰Tirigi noni ug krau lene coi ug ei Zakharia de ig bipigo Elisabet.

⁴¹Hammi tirigi Maria nihyet tibim ei Elisabet nitingou nsi rino munggwom di jo ei ninghopti kiek no nyen leu api Allah Ninnei srek kwei ei Elisabet ningonti,

⁴²lene ba nihyet nindig bahara “Allah singat tut na dor njiriek sop nindigsi nya yahagom ba, Noni singat tut amunggwom di jo anghopti cem!

⁴³Noro tut dani ne dibon dinyeng bi. Nggon rino Tuhan nipmem kwei cem kep da i?

⁴⁴Lewo hammi tirigi ahyet tibim ei ditingou nsi rino dimunggwom kiek no ei dinghopti drek dip ningon llei biborti.

⁴⁵Angon nggei-hi-nggei lewo angon jo kep bipia mun di Allah pai bina mipek kep mem nani yo!”

⁴⁶Lene Maria pai, “Dingon nggei sut Tuhan.

⁴⁷Ba, dingwes yai nillei bibor drek dip Allah di teu da leu sisar biyai niyaijo nijep bida.

⁴⁸ Noni kan kep bipia mbro nok gino hiter ingwes pri gau da lo, ningat ne dinok Nide awak! Hon kep ammani kui lene tungwatu nya yahagom mipai sut da bipia dingon nggei-hi-nggei,

⁴⁹lewo Allah Di Sindem Bibor bibon mindur bida. Allah ninyeng kwes-kwau.

⁵⁰Nintun himti di bram yam kikau kwei bipek ammani kep ne Allah ningon nggriu sut yo di idigit tut Noni.

⁵¹Noni ba ninda di sindem bidri yo di ingon jei nya bintek gimahap ningwig ba, binggek tut ide nikos tutti nya hagom cem.

⁵² Noni njei nibou ndig nya leu ide banggo dip leu api kon yo di tungwatu nya ingwes pri gau yok binyeng jei.

⁵³Noni kwas njita di kei-kau tut yo di yuhui mbum nya bindei yok noro mbres yo di inyeng tut ndigban ba, imbut kin yehei he.

⁵⁴Noni mpu Nide awak di mben Israel bit leu nok gi Noni preu ei mem idigup bat-idigai bat nya.

⁵⁵ Tuhan ningon prion ser mun di Noni preu ei mem yok bi ba, ningon nggriu sut Abraham kin nide nintun him di bram yamti nya kikau.”

⁵⁶Mmo yo Maria bong bit Elisabet bidem bed nitindur ningai leu api ngkwei hanyen ug ei nide ig.

⁵⁷Mpe dima lene tto bou dem leu api Elisabet srek tut munggwom pinai.

⁵⁸Yo di ninttig-tta nya kin nide bat nya imiap ninghapti tut gino Allah ningon nggriu sut noni bibor dima. Gima rino yahagom ingon llei bibor bit noni.

⁵⁹ Tirigi munggwom ngwoi dima nide njap ug ei Njap muhwindaningai lene yuusap Noni biyuug sut mem gima imam gom bon midut sunat binoni. Nide bat nya ipi bijem ninyeng Zakharia noyam kin nicig ninyeng,

⁶⁰noro nipmem srep “E bi! Suar ijem ninyeng Yohanes.”

⁶¹Noro isrep “Ade bat nya bihi inyeng Yohanes bi e.”

⁶²Leu api iba inda ngon bak nicig leu binhyepo pai ningon kanti tut nipmot ninyeng.

⁶³Noni ba ninda ngon biyok bigyai tig pas binoni leu api pas “Ninyeng rino Yohanes.” Yahagom inggap leu tut nindig bibor.

⁶⁴Hammi tirigi Zakharia pas Yohanes ninyeng rino niji nggan bu bimbrap hanyen binggei sut Allah.

⁶⁵Yo di ninttig-tta nya yahagom idigit tut nindig bibor leu api ninghapti tibim tut mindur dini bikieng kep nungug him ei hanjop Yudea hagom.

⁶⁶Bikwop yo di imiap ninghapti tut nya ikan-kan nyen tut bipai “Tirigi mot dini mahan ne miyai midyai mindei i?” Lewo Tuhan No rima bit noni.

⁶⁷Ninnei Gi Kwes yai nisindemti bak Zakharia di Yohanes nicig leu api noni tri tut Allah ningon kanti bipai,

⁶⁸“Jikwei ba, inggei sut mben Israel ide Tuhan. Lewo Noni kwei mpu Nide limwa nya ba, kwek yok leu mun di kat yok.

⁶⁹Noni pinak No di sindem kwei mem gima teu nye leu mun di kinei hagom ba, No dini ntun Daud di Tuhan de awak pima him.

⁷⁰Tuhan preu ei mem nye tug hon Nide nabi di ingon kwes nya nipou su,

⁷¹leu binhyepo teu nye leu ide siceu nya kin yo di ingon mpo tut nye nya yahagom inda nsi ba,

⁷²ningon nggriu sut idigup bat-idigai bat nya lene biyok ngon kep Nide nipreu ei mem yokti di kwes-kwau.

⁷³Noni ba neheng bipreu ei mem nyeni icig Abraham,

⁷⁴bipia miteu nye leu ide siceu nya inda nsi leu binhyepo inok Nide awak di inghuisi mpig sut Noni bi,

⁷⁵noro ingon kwes-kwau ba, sren-srau cem bou niyai him kikau ug bipek igyaijo ningwig honti.

⁷⁶ He mot de ndia ug o! Mijem anyeng Allah Di Ninyeng Jei de nabi. Noni pinak nani bibie kwei mem Tuhan leu binhyepo atin puig mem Noni ba,

⁷⁷atri tut bak Nide limwa nya bipia Noni miteu yok leu sisar leu binhyepo igyai niyaijo nijep tug hon gi igyai nikos ser ide sisarti.

⁷⁸Ide Tuhan ningon nggriu ba, Ningondut Kep Nye Cig di tau kwei noyam kin mpia nipriti mem njap bigyoti biteu nye leu sisar biyai niyaijo nijep binye.

⁷⁹ Nok gima lene Noni piga digai puig mem yo di ibong ei nidinditi ba, idigit tut igyaijo ningwig honti. Noni minyohou bie tut nye kak puig di bie ug ei nibong kei nigwam keisi.”

⁸⁰Zakharia nipmot mahan ba, ningon nddong ba, ningon ki cem. Noni bong ei iggum ndigsi kikau bipek njap di tto bou dem mem gima ndo nonti brei bak mben Israel.