Read Hatam LUKAS 10 Bible Online

LUKAS 10 - Hatam bible

LUKAS 10

¹Mpe hi bu lene Yesus dimig yo di ibit Noni ibou ningot muhwindacan bu leu api cuk ibou can ibou can lene nok ba, yuug ya bibie bidem minu ndig di Noni tin ei mem gima ug cem kep nya.

² Noni pai biyok “Njita nindig bibor len tu noro yo di ikos njita kwei nya ibou cin-can he yo. Gima rino ma jingat nadi bak miai niceu leu binhyepo noni micuk tungwatu nya ba, yuug kos bipian njita hagom kwei ei ig gudanti.

³ Jimbut hak ug! Dicuk je nok domba nya ug ei nsien di niten-pos nya ikieti.

⁴ Ma jibiang bangdop kin minai kin srop au. Ma jiya ei puig sinon mem jipigo tungwatu nya au.

⁵Tirigi jicoi ug ei ig bei hi lene ma jipai biyok ‘Handei kon ba, Allah bindei ba, jibong kei jigwam kei.’

⁶Gino no di ningon jo nyahan bong ser ig dima lene jide nipigo noti dima jo ei noni dip. Gi bi lene ma jibrim jide nipigo noti dima hanyen leu noni.

⁷ Ma jibong ei ig gom ngat lene ma jiba jingon di kwes kin yok biyem njita bidut ndia ngei di ingei mem je. Lewo no di yai midyai dima dem tut gima tug ndei nimuhup. Ma jibong bidem ig au.

⁸Tirigi jicoi ug ei minu ndig gom ba, tungwatu nya igya um je lene ma jiyem njita di yoni ingei mem je nya.

⁹Ma jibindei ba, yo di inggwen ei minu ndig dima ikei hanyen lene ma jitri tut biyok ‘Allah ninyeng tak kepti dideu kwei ei jikieti tu.’

¹⁰ Tirigi jicoi ug ei minu ndig gom noro tungwatu nya igya um je bi lene ma jiya hak ei simpak bijisok kep yok,

¹¹‘Nikit nimig tut jide dihyei ndung di rap nimig jou leu nok mun di bindo di biki jingon. Noro ma jiyok ngon kep bipia Allah ninyeng tak kepti dideu kwei ei jikieti tu!’

¹² Ma jiyok ngon kep bipia tirigi Njap dem mem Allah kes hukum ei tungwatu nya dip lene ningon nggriu sut timiei minu ndig Sodom nya dor njiriek minu ndig dima.”

¹³ “Ayo! Buhun bibor mem je di timiei minu ndig Korazim! Ayo! Buhun bibor mem je di timiei minu ndig Betsaida! Mindur po dibibon mem je tu pima gino dibibon bak timiei minu Tirus kin Sidon bu lene yoni mijuk sinsun kron di bindo bipia ittin ser ide sisar bikiek ndam Allah dima leu api igwam tut ei atriemti mimbrek tu.

¹⁴Tirigi njap dem mem Allah kes hukum ei tungwatu nya dip lene ningon nggriu bibor tut timiei minu ndig Tirus kin Sidon nya dor njiriek jeni.

¹⁵ Nok gima tut je di timiei minu ndig Kapernaum cem! Jijoi sut jingon di jei kui sur mpia-bbed him e? Noro Allah micom je ug ei hum njengti!”

¹⁶ Lene Yesus pai bak yo di ibit Noni “Bikwop no di ngig nitingou mem jihyet lene gima dem kep nok ngig nitingou mem Dani dihyet. No di kou sut je lene gima dem kep nok noni kou sut Dani cem. No di kou sut Dani ne gima dem kep nok noni kou sut No di cuk Da kwei cem.”

¹⁷Ibou ningot muhwindacan pima ingkwei hanyen lene iba ingon di llei bibor bipai bak Yesus “Andigpoi e, ningat ne ninnei rom nya ibit nihyet tirigi niba anyeng bijji yok!”

¹⁸Yesus buhup “Dingat Bilis tirigi noni cut leu gwamti nok kigyei.

¹⁹ Jimiap e, diyai nisindemti bije leu binhyepo jico kep wou kin amai nggre nya ba, jibindei timek jide Siceu nide nisindemti hagom ba, bit bon mun nyeng hi yai nibok bije kan bi.

²⁰Noro ma jiyai ningon di llei drek dip ninnei rom nya di ibit jihyet au. Gi kei rino jiyai ningon di llei sut gino Allah pas kep jinyeng ei gwamti.”

²¹Mpe dima lene Yesus ningon llei bibor tug hon Allah Ninnei bipai “Arig e, Nani ne Tuhan mem mpia-bbed him kin dihyeisi dini! Dipai sigyo biNa lewo aku mun dini yok hagom bijo nding leu yo di ingon ki kin yo di ingon tek bibor nya igyai him noro ambot kep tut hagom bak yo di ingon mbum nya. Arig e, ajoi sut nipek kepti dima.

²² Dicig kes mun nyeng hagom ei dindati tu. Dicig Nongkom kan igbit tut Nipmot ba, Nipmot kan igbit tut Nicig. Gino Nipmot ndo Nicig brei bak tungwatu nya lene yo dima cem mikan igbit tut Noni.”

²³Lene Yesus kiek noho ndam yo di igya kui Noni bipai nyahan bak yongkom “Jingon nggei-hi-nggei lewo jingat mun dini yok hagom bou jiyai him tu!

²⁴Gima rino ma jikan kep bipia nabi gi nipou kin nibou ndig nya imang bibor ijoi sut mem gima ingat mun di jingat bou jiyai him mem nijam dini noro ingat bi. Yoni ijoi sut mem gima imiap mun di jimiap mem nijam dini noro imiap cem bi.”

²⁵ Mpe dima ne guru Puig Yahudi nicukti gom kwei ttau kep Yesus leu binhyepo ba Yesus nihyet bisrou Nonti hanyen. Noni hig singgre Yesus “Dibon mun nyeng di tou leu binhyepo ditug ndei niyaijo nijep di jo kikau i?”

²⁶Yesus buhup “Allah Nihyet pai mindei binye i? Ma abuhup igbit akan-kan nyenti biDa hak ug.”

²⁷ No dima buhup “Ma aba angonti titut yam kin annei titut yam kin ade nisindemti titut yam kin angon kanti titut yam bingon ngakei ade Tuhan Allah. Lene ma angon ngakei yo di hiter bit leu nok angon ngakei nanti.”

²⁸ Yesus buhup “Igbit ri. Ma ayai igbit nicukti dima leu api ayai niyaijo nijep.”

²⁹Noro no dima pai mun singgre mem gima bisu tindei nonti bihig ser Yesus “Tou rino yo di hiter di dingon ngakei yok i?”

³⁰Yesus buhup “Mpe di gom tungwagom jo leu minu ndig Yerusalem buug ei minu ndig Yerikho noro yo di isibut nya icut igkep noni kak puig sinon bibui-bui nyen ba, inggimang nide sinsun kin nide ndigban hagom leu api ikes bimai-mai nyen ei puig nghas kin gi bok-ba.

³¹Jei bi lene imam gom cem kak puig dima ba, tirigi noni ngat no di mai-mai nyen dima lene noni kriau ug ei puig nite hi bimbut kikau.

³²Jei bi lene no di ntun Lewi him gom kak puig dima ba, tirigi noni ngat no di mai-mai nyen dima lene ngig niyai kep noro noni cem kriau ug ei puig nite hi bimbut kikau.

³³ Noro jei bi lene timiei minu ndig Samaria gom kak puig dima ba, tirigi noni ngat no di mai-mai nyen dima lene ngondut noni nindig bibor.

³⁴Gima rino ug gwam simiak noni lene ba ba anggur ngei bipiap nibokti buhug obat mini eisi lene ngot kep hagom nok gi kei. Noni kon no di mai-mai nyen dima bikes ei nide keledai dip bicen keledai tut ug ei ig losmen gom leu api nyohou noni.

³⁵Njap di hyep bu rino noni hit mitiei nitig can bak nibou ig losmen dima bipai bak ‘Ma anyohou no di mai-mai nyen dima ba, gino mitiei dini dem bi lene midikum eisi ei nidipti bu tirigi dikwei bidikak puig dini hanyen.’ ”

³⁶Leu api Yesus kes nihyet tut nihyet nibiti nindati dima leu lene hig ser no dima “Ma apai igbit tut ibou ningai dima. Gi tou ribibon no di mai-mai nyen pima nok gi kei bingondut noni i?”

³⁷Guru Puig Yahudi nicukti buhup “No di ngondut noni.” Yesus pai binoni “Gi nok lene ma nani cem aug ba, ayai bram no dima niyaisi!”

³⁸ Leu api Yesus kin yo di igya kui Noni imbut kak puig kikau biyuug krau minu mien gom. Lene sop di ninyeng Marta di bong ei sirima cigit Noni kui igya.

³⁹Sop dini bon nikinjoi Maria di kuk no ei Yesus nimig him bingig nitingou mem Yesus ningginausi.

⁴⁰Noro Marta yai midyai ba, midyai buhun tak noni leu api kwei nso tut bak Yesus bipai “Andigpoi e, asindui sut ba, Maria ba niyai ngat da bidiyai midyai hagom bidangkom ug e! Ma acuk noni kwei bimpu da!”

⁴¹Yesus buhup “Marta Marta e, angon ku na tut mun nyeng mang bibor,

⁴²noro mun nyeng gom ngat bon ninyenga. Maria dimig mun di kei bibor mem nonti. Hi mipos mun di kei bibor dima leu noni bi.”