Read Hatam LUKAS 11 Bible Online

LUKAS 11 - Hatam bible

LUKAS 11

¹Mpe di gom bu lene Yesus ug ngat nadi ei mpia ttou nsi gom. Tirigi Noni kes nadi hon tu lene no di ya kui Noni gom pai “Tuhan e, angginau nye tut nadi bit leu nok Yohanes ngginau yo di igya kui noni tut nadi.”

²Gima rino Yesus buhup “Gino jingat nadi lene ma jipai, ‘Arig e, Nani ne Allah Gom ngat. Handei kon ba, ma tungwatu nya yahagom inggei sut Na tut anyeng di kwes-kwau. Handei kon ba, ma akwei bindei ba, anyeng tak kep dihyeisi dini hagom.

³Ma akwas njita di nisuar mem njap di ammani tut nye.[7]

⁴Ma akos ser mun di niyai tunggwei sut Na lewo nikos ser hiter ide mun di igyai tunggwei sut nye. Ma asindui sut ba, ningkwei hanyen tirigi nicut ei mun di srou nyeti au.’ ”

⁵Yesus pai bak yo di igya kui Noni “Gino jigom ug ngat nisut hi mem mmun mau bahara noni ‘Disut na e, ma akwas roti nindak ningai sut da,

⁶lewo disut hi mbut nimig kak puig sinon bikwei krau ig bei noro njita hi jo mem dikwas tut noni bi.’

⁷Gino asut buhup ‘Awin da au lewo dilit ser dimbou tu. Munggwom nya yahagom ibong mai su. Gima rino bit bon dikiju bidikwas njita tut na bi.’

⁸Ginok lene notou mem na i? Dipai bipia mbro nok gino anok nisut rin lo, noni mikiju bikwas roti tut nani bi. Noro noni mikiju bikwas mun di asuar nya hagom tut na drek dip gino abrim angkek kep noni ba, ahara noni kikau.

⁹Gima rino dipai bije bipia ma jahara hak ug leu api mijiyai mun di jahara tut. Ma jinggok ser hak ug leu api mijingat mun di jinggok dima. Ma jipuk dimbou hak ug leu api dimbou mikau leu je.

¹⁰Lewo no di hara miyai lene no di nggok ser mingat lene no di puk dimbou dimbou mikau leu noni.

¹¹Je di jibon jimunggwom bat nya e, gino jimunggwom hara je tut wau lene jiyai wou bak e?

¹²He ma noni hara je tut guli dunggwei lene jiyai amai nggre bak e?

¹³Mbro nok gino jisibut lo, jingondut jimunggwom bat nya lene jo nibreisi bipia Jicig ei gwamti miyai Ninnei Gi Kwes bak yo di yahara Noni tut!”

¹⁴Mpe di gom bu lene Yesus jji ninnei rom leu tungwagom di ninnei rom kibou noni. Tirigi ninnei rom hei leu ningonti lene niji nggan bimbrap. Tungwatu nya imang bibor inggap leu tut mindur dima.

¹⁵ Noro hiter isrep “Beelzebul di nibou ndig mem ninnei rom nya ya ningonti bisindem tut Noni leu binhyepo jji ninnei rom nya.”

¹⁶ Lene hiter ipi bisrou Yesus. Yahara Noni tut mindur di bindo bipia Allah pinak Noni kwei.

¹⁷Noro Yesus kan tut ingon kanti dima bipai biyok “Gino mben hi ikwas yam ei nimpung can bikon pran bit yam ne mporo imai bingwig hak ug ri. Gino yo di ig bei nsi gom iba nitok biyam lene jei bi mporo itot yam bingwig ug ri.

¹⁸Nok gima cem tut Bilis ninyeng tak kepti. Gino ikwas yam ei nimpung can bikon pran bit yam lene bit bon Bilis ninyeng tak kepti jo kikau kan bi. Jipai sut Da bipia Bilis rino sindem tut Da dino dijji ninnei rom nya e?

¹⁹Gi nok lene tou risindem tut yo di igya kui je dino ijji ninnei rom nya i? Yo di igya kui je rino indo bindo tut je bipia jiyai mun tunggwei.

²⁰Noro dijji ninnei rom nya tug hon nisindemti di kwei leu Allah. Diyai munti dima ne mun di bindo bipia Allah ninyeng tak kepti sindi kwei ttau kep je.

²¹Gino no di sindem bibor tin ei nide minggwen nya bitindei ser ninggimang kep mun cig nya ikweisi ne bit bon hi nggek nide ndigban kan bi.

²²Noro gino no di sindem njiriek noni cut igkep noni bihwen noni leu lene bipos nide minggwen di ba ningon com nya leu noni nipou ug e. Leu api ninggimang kep mun cig dima nggek nide ndigban nya hagom bikwas tut nisut bat nya.

²³ No di tti kin Da bi tte tut Da. No di mpu Da bi nggek tut Ditde midyai nya.”

²⁴“Tirigi ninnei rom hei leu tungwagom ningonti bimbut-mbut nyen ei iggum ndigsi ba, nggok mpia di mem bong kep ninghuisi lo, ngat hi bi. Lene kan ‘Singkwei hanyen ug ei ig bei di sikwei leu pima.’

²⁵Noni ngkwei hanyen ug ei ig dima bingat lo, hi cok mumpiang hagom bipwoi leu ba, kinding ig bei bikei hanyen tu.

²⁶Gima rino noni ug buwak nisut ninnei rom di kinei bibor dor njiriek noni ibou muhwindacan bu ba, icoi ug ei no dima ningonti apino niyaijoti kinei bibor dor njiriek gi nipou bu.”

²⁷Tirigi Yesus tri tut nihyet dima tu lene sop gom di ya srig yo di ningot ndig dima pai biNoni “Sop di srek tut Na di yai nido biNa ningon nggei-hi-nggei.”

²⁸Noro Yesus buhup “Yo di imiap Allah nihyet bibindei mbut nihyet dima ingon nggei-hi-nggei nindig dor njiriek bu.”

²⁹ Tungwatu ningot ndig ingwig ttai Yesus lene Noni pai biyok “Ei nijam dini ne tungwatu nya ingon rom! Yahara Da mem gima dibon mindur di ingat bou igyai him leu api ingon jo kep Da. Noro midibibon mindur mem yok bi. Gi nok lo, dindo bindo bit leu nok bindo di tug hon Nabi Yunus.

³⁰ Bit leu nok Yunus di nok bindo mem mben Niniwe lene Munggwom Tungwatu Nipmot nok bindo mem tungwatu nya ei nijam dini.

³¹ Tirigi Njap dem mem Allah birop kin hukum lene nibou ndig sop di kwei leu nite bei mpia nibiho mikiju bit tungwatu nya ei nijam dini leu api mipai kep yok. Lewo noni jo leu nitimieisi di jo minu ting bibor kwei bingig nitingou mem Salomo di ba ningon di ki bingginau tungwatu nya nihyet. Noro tini bu ne No di ninyeng jei dor njiriek Salomo no rinaha!

³² Tirigi Njap dem mem Allah birop kin hukum lene timiei Niniwe mikiju bit tungwatu nya ei nijam dini leu api mipai kep yok. Lewo timiei Niniwe ittin ser ide sisar bikiek ndam Allah tirigi Yunus tri tut nihyet biyok. Noro tini bu ne No di ninyeng jei dor njiriek Yunus no rinaha!”

³³ “Tungwatu nya itin mini binjeng lene iku nding leu nindigsi nya igyai him bi. Iba bokor bikibou kep ninjeng hanyen cem bi. Noro ikon bikes ei nidihimti leu binhyepo yo di icoi kwei ei ig bei ingat ninjeng di piga.

³⁴Jiyai ne mini ninjeng di piga digai jingut ri. Gino jiyai kwes lene jingut titut yam mpung tut nipigati. Noro gino jiyai dindi lene jingut titut yam mpung tut nidinditi.

³⁵Gima rino ma jingon hek tut jenti leu binhyepo mini njeng di jo ei jeti dima dem kep nok nidinditi bi.

³⁶Gino jingut titut yam mpung tut nipigati ba, bon nidinditi bi ne jingut dima piga kei bit leu nok njeng mbrei di piga digai je.”

³⁷Tirigi Yesus kes nihyet hon tu lene Farisi gom buwak Yesus kwei mem gima yem njita bit noni. Gima rino Yesus ug ei nide ig bigwam kui meja.

³⁸Farisi dima nga leu Yesus tut gibit Puig Yahudi nidimig sutti bipiap ninda nipou leu api yem njita bigya.

³⁹Gima rino Tuhan pai binoni “Je di Farisi nya jipiap jide mok kin den nisai he bipwoi kei noro tut jingonti ne mpung tut mun di jiba nimbuk bibon kin nisibutti bibon mun cem.

⁴⁰Jingon mbum bibor! Allah di bon bei nisai dima bon bei ninsi cem bi e?

⁴¹Suar jikwas mun di jo ei jide mokti kin jide denti tut yo di yuhui mbum nya. Tug hon nisinati dima lene map kui mun di jinyeng tut nya hagom bi.

⁴² Aye! Buhun bibor mem je di Farisi nya! Lewo jikwas jide mun di bindei njita nyop kei gom leu ningot gom tut Allah noro jiba jinghim bak ningon srenti kin ningon ngakei Allahti. Suar jiyai igbit mun dini yok lene ma jingon prion ser nicukti nya pima cem au.

⁴³Aye! Buhun bibor mem je di Farisi nya! Lewo jibisau bijigwam bilen dip kui nimbar ei jide ig mbusyameisi ba, jingon llei sut gino tungwatu nya ibou cut bije ei biyati.

⁴⁴Aye! Buhun bibor mem je! Lewo jinok jui dip di tungwatu nya isrin ser bi dino imbut dip ninyen noro ikan tut bi.”

⁴⁵Lene guru Puig Yahudi nicukti gom nso Yesus tut bipai “Guru e, apaisi dima sibui nyeni cem ningonti!”

⁴⁶Yesus buhup “Aye! Buhun bibor mem je di guru Puig Yahudi nicukti nya! Lewo jibidip huk tungwatu nya tut mun di nggruk bibor bijitri tut nidimig sutti di buhun tak yok noro jindo puig di bie ndam gima ibit nidimig sutti dima bi.

⁴⁷Aye! Buhun bibor mem je! Lewo jiwin nabi di imai su nya ijui dip noro ningat ne jidigup bat-jidigai bat nya ihwen nabi pima yok.

⁴⁸Gima rino jipaisi dima ndo brei bipia jiba je bikum jidigup bat-jidigai bat nya igyai munti nya. Yoni rino ihwen nabi nya lene jeni rino jiwin ijui dip nya.

⁴⁹Gima rino Allah Di Ningon Ki pai ‘Midicuk nabi nya kin yo di itri nihyet ndam yok noro mikimukep bihi lene mihwen bit bihi kin bu.’

⁵⁰Allah yai nok gima leu binhyepo tungwatu nya ei nijam dini mitug ndei hukum drek dip nabi di tungwatu nya ikimukep yok habiei leu nimbie him di Allah pai tes dihyeisi dini,

⁵¹ leu mpe di po ikimukep Habel kikau kwei bipek mpe dino ikimukep Zakharia ei nimbar hum dok kin Allah De Ninsi Di Kwes ikieti. Ma jiyok ngon kep bipia tungwatu nya ei nijam dini mitug ndei hukum drek dip yo dima yahagom imaisi.

⁵²Aye! Buhun bibor mem je di guru Puig Yahudi nicukti nya! Kusin mem ibikau dimbou leu ningon kiti nibousi no jo bije noro jicoi kak dimbou hui dima bijinggok tut ningon kiti bi. Noro jibigen ser yo di itibap-tibap nyen ba, ijoi sut icoi kak dimbou hui dima!”

⁵³Tirigi Yesus kes mpia dima leu lene guru Puig Yahudi nicukti nya kin Farisi nya sindi iba ighyet yai Noni bihig ser Noni tut mun nyeng mang bibor ba,

⁵⁴ibingon mem gima iba nimbrap tunggweisi bisrou Nonti hanyen.