Read Hatam LUKAS 13 Bible Online

LUKAS 13 - Hatam bible

LUKAS 13

¹Mpe dima lene ibou poi ikwei pui bak Yesus tut timiei hanjop Galilea di Pilatus kimukep yok tirigi ibon midut nindig mindhe-ndhe kep hum ei nimbar hum dokti bak Allah.

²Yesus miap ipaisi dima bibuhup “Jikan bipia timiei hanjop Galilea dima igyai nimai drek dip gi ibon sisar nindig bibor dor njiriek timiei hanjop Galilea nindigsi nya e?

³Nok bi! Ma jiyok ngon kep bipia gino jittin ser sisar bijikiek ndam Allah bi lene jahagom mijitug ndei nimai noyam kin yo dima.

⁴Notou mem ibou simnaimuhwidip brimigtehiningai ei Siloam di imai bingwig tirigi ig di bon ninggre di jo-jo yam dip di anai bibor tti bitot yok i? Jikan bipia igyai nimai drek dip gino ibon sisar nindig bibor dor njiriek timiei minu ndig Yerusalem nindigsi nya e?

⁵Nok bi! Dipai bije mbigom kin bu. Gino jittin ser sisar bijikiek ndam Allah bi lene jahagom mijitug ndei nimai noyam kin yo dima.”

⁶Gima ngwig leu lene Yesus ba nihyet nibiti nindati bingginau yok bipai “Mpe di gom ne tungwagom nide biei ara hei srig nide ba anggur nghousi leu api noni ug nggok ningat di ntun him noro ngat hi bi.

⁷Gima rino noni nso nide awak di nyohou ba anggur nghousi tut bipai ‘Angat i! Dikwei nggok ser biei ara ningat ninno ei ari bingwam ningai noro biei dini ngat ningat hi bi. Awim hak ug lewo ceu ba anggur nghousi!’

⁸Noro nide awak buhup ‘Andigpoi e, ma asindui sut ba, biei dima jo nijoti bibou dinyohou ninjem ba, diba pupuk bigimahap nitriti mem ari bingwam nitindur gom bu ug e.

⁹Mpaba ningat mintun him ei ari bingwam gi nidipti bu e? Gi bi lene ma na di Andigpoi acuk da bidiwim ninjem hak ug.’ ”

¹⁰Mpe di gom bu lene Yesus ngginau tungwatu nya ei ig mbusyameisi mem Njap Nigwam Kep Ninghuisi.

¹¹Ei sirima cem sindig gom di nggwen kikau ari bingwam simnaimuhwidip brimigtehiningai ningat ri. Ninnei rom di ya ningonti bindei ba, ninghim koi lene bit bon ya pijum kan bi.

¹²Tirigi Yesus ngat noni lene ba nihyet nindig bipai bak “Sindig e, ninggwenti di hwen na dima kes hon tu!”

¹³Tirigi Yesus tak kep sindig dima lene noni pu ninghim biya pijum kei ba, nggei sut Allah.

¹⁴ Nibou mbusyamei ningon sibui sut Yesus di bindei ba, sop dima kei hanyen mem Njap Nigwam Kep Ninghuisi. Gima rino noni pai bak yo di idem yam ei dima “Nyeni igyai kikep ide midyai nya mem las gom kikau ug bipek las muhwindagom. Gima rino ma jikwei yai gi kei hanyen mem njap ngot dima noro ma jikwei yai gi kei hanyen mem Njap Nigwam Kep Ninghuisi au!”

¹⁵Yesus buhup “Je dini jingon mang! Jikwek sapi kin keledai nya leu kandanti bijijem yok kep minyei mem Njap Nigwam Kep Ninghuisi bi e?

¹⁶Mbenjen! Nogindini sindig gom di ntun Abraham him ningat rin bit nye. Bilis ngot kep noni kikau mem ari bingwam simnaimuhwidip brimigtehiningai su. Jisindui sut ba, dikwek noni leu mun di ngot kep noni mem Njap Nigwam Kep Ninghuisi bi e?”

¹⁷Nibuhupti dima bindei ba, Nide siceu nya immai sut yonti nindig bibor noro yo di idem yam ei nya ingon llei sut bikwop mindur di Yesus bibon nya.

¹⁸Yesus hig ser yok “Allah ninyeng tak kepti rinok mindei i? Diba mindei binai i?

¹⁹Diba sawi ngan binai kin nihyet nibiti nindati dini. Tungwagom ndim sawi ngan[10] ei nide miai ngwoisi leu api nikioi hei bijei bibor ba, nok biei leu api ha nya itot yaham ei ninda nyati.”

²⁰Lene Noni hig ser yok bu “Diba mindei bidibinai sut Allah ninyeng tak kepti i?

²¹Diba sop gom binai kin nihyet nibiti nindati dini. Sop gom yai roti ninjep bibiwir tepun tong mien gom apino dwoi binindig.”

²²Yesus mbut nimig ug ei Yerusalem bikak puig sinon lene coi minu ndig nya kin minu mien nya bingginau tungwatu nya.

²³Lene tungwagom hig ser Noni “Andigpoi e, tungwatu nya ibou poi he migyai gi teu leu sisar kin niyaijo nijep e?” Lene Yesus buhup,

²⁴“Ma jigruap mem gima jicoi kak dimbou hui di kom lewo tungwatu nya imang bibor igruap mem gima icoi kak dimbou hui di kom noro bit bon icoi bi.

²⁵Ig niceu mikiju binggam mbou leu api je di jiya igbit nisai mijipuk-puk nyen dimbou bijahara ‘Andigpoi e, akau dimbou leu nye o!’ Noro noni mibuhup ‘Dikan tut jikwei leusi bi.’

²⁶Mijibuhup ‘Niyem njita binidut ndia ngei bit Na tu lene akwei ngginau nye ei simpakti nya ei nyende minu ndig cem tu!’

²⁷ Noro noni mibuhup ‘Dikan tut jikwei leusi bi ba, juug bihigom leu Da lewo jisibut bibor!’

²⁸ Tirigi jingat Abraham kin Ishak kin Yakub kin nabi nitimiei nya yahagom di ingon llei bibor ei Allah De Dihyei Di Nijepti lene jipim bijiyai jinghuisi di wei cem drek dip Allah nijji je ug ei nisaisi!

²⁹Tungwatu nya mikwei leu nite bei mpia nipriti kin nicutti kin nijjai kin nibiho ba, igwam keyam bibon pesta nindig bibor ei Allah De Dihyei Di Nijep.

³⁰ Ningat ne mpe dima yo di igya nohon keti ei nijam dini mikwei ya bibie mem nindigsi nya ba, yo di igya bibie ei nijam dini miyuug ya ei nohon keti bu.”

³¹Mpe dima lene Farisi nya ibou poi ikwei pai bak Yesus “Ma ambut leu minu dini ug ei minu ttou nsi hiter bu lewo Herodes kos tut bipia mikimukep Na.”

³²Yesus buhup “Ma juug pai bak nikinei-kinau dima ‘Njap di ammani kin njap di hyep bu dijji ninnei rom nya bidibindei ba, tungwatu nya ikei hanyen. Noro midibindei put Ditde midyai nya ei njap gi niningai.’

³³Mbro nok gima lo, suar dimbut bikwop njap di ammani kin njap di hyep kin njap di can lewo dem mem gima no di nabi yai nimai ei minu di jo ei minu ndig Yerusalem nisai ma kwei bi.

³⁴Ayo! Je di mben Yerusalem e, jikimukep nabi nya! Jiba tig bihwen yo di Allah cuk yok kwei ndam je! Dipi bidinggriou jahagom bit leu nok kuke di kieng ninyehei gau nimien nya noro jikou sut Da.

³⁵ Gima rino Allah mikes jide minu ndig dini ei ba, dem kep nok ha ngunti ri. Hon kep ammani kui ne mijingat dingat bou jiyai him bu bi bibou jipai ‘No di kwei tug hon Allah ninyeng ningon nggei-hi-nggei ug e.’ ”