Read Hatam LUKAS 14 Bible Online

LUKAS 14 - Hatam bible

LUKAS 14

¹Ei Njap Nigwam Kep Ninghuisi gom lene Yesus ug yem njita bit nibou Farisi gom lene tungwatu nya itou kep Noni nggilun.

²Tungwagom di nimig-ninda dwoi mai kei kwei ngat Yesus.

³Leu api Yesus hig ser guru Puig Yahudi nicukti kin Farisi nya “Puig Yahudi nicukti sindui sut mem gima nyeni ibindei ba, tungwatu nya ikei hanyen mem Njap Nigwam Kep Ninghuisi e, he nicukti dima sindui sut bi e?”

⁴Yo dima ibuhup bi. Lene Yesus hig no dima kwei bibindei ba, noni kei hanyen. Leu api Yesus cuk noni bimbut.

⁵ Gima ngwig lene Yesus hig ser yo dima “Gino jipmot hi e, jide sapi hi e, cut bisar ei jui nsi mem Njap Nigwam Kep Ninghuisi lene mijiteu noni e, mijibrim sapi leu jui nsi mem Njap Nigwam Kep Ninghuisi dima bi e?”

⁶Noro bit bon ibuhup nihyet kan bi.

⁷Mpe dima lene yo di nibou ig bei cigit yok kui ig pima ibou poi igya bibie leu nindigsi nya. Yesus tou kep yok leu api pai nihyet nibiti nindati gom biyok.

⁸ “Gino tungwagom hig na kwei ei nibon pesta kep niwak yamti bit noni lene ma agwam bibie nibieti mu leu nindigsi nya au. Gino tungwagom di ninyeng jei njiriek na coi kwei ei pestati dima bit je,

⁹lene nibou ig bei di hig jahacem kwei ei nibon pestati bit noni pima kwei pai bina ‘Ma ati bileu lewo ditin ei bilen dima mem no dini bigwamti bibie.’ Gi pai nok lene ammai sut nanti drek dip gima aom nanti kikau ug ei nohon keti.

¹⁰Lene gino nibou ig bei gom hig na kwei ei nibon pestati bit noni lene ma aom nanti ba, aug gwam igbit nohon keti. Mpaba nibou ig bei mikwei pai binani ‘Disut na e, akwei gwam bibie.’ Tug hon nisinati dima lene nindigsi yahagom inggei sut na.

¹¹ Lewo Allah moom kep no di bisau sut ninyeng jei noro Noni mikon bikwop no di om kep ningonti ninyenga.”

¹²Lene Yesus pai bak nibou ig bei “Tirigi anduk tungwatu nya kwei bibit pesta bit na mem njap cem mem mmun cem lene ma anduk asut bat nya kin akindig bat-akinjoi bat nya kin ade bat nya kin yo di anttig-tta nya di inyeng nya au. Lewo jei bi lene yoni miba nibon pestati bibirop hanyen bina ba, amuhup ttau bina drek dip.

¹³Gima rino tirigi abon pesta lene ma ahig yo di yuhui mbum nya kin nikinei-kinau nya kin yo di imig lit nya kin yo di igyai tu nya kwei.

¹⁴Leu api Allah minjei mun di kei bina drek dip. Lewo bit bon yo dima ibirop hanyen bina kan bi. Noro Allah mibirop hanyen bina mpe dino Noni win yo di ingon sren nya bikiju hanyen leu imai eisi.”

¹⁵Tirigi tungwagom di yem njita bit yok miap Yesus nipaisi nok lene noni pai bak Yesus “No di bon pesta bit Allah tirigi Noni kwei hanyen nok Nibou Ndig ningon nggei-hi-nggei!”

¹⁶Noro Yesus pai binoni “Mpe di gom tungwagom bon pesta nindig bibor bitri tut bak tungwatu nya imang bibor leu binhyepo ikwei bit.

¹⁷Tto bou dem mem ibon pesta dima lene noni sok nihyet ei nide awak dip mem yok bipai ‘Jinduk yam kwei lewo dingei njita mem je tu.’

¹⁸Noro yahagom ijem sigyo sindam biyoom yok leu pesta di noni ngei mem yok. Gi nigom pai bak awak dima ‘Sindi dipek dihyei hanjop nsi gom ba, suar duug yok diyai kep nipou ug e. Gima rino doom da leu.’

¹⁹Hiter pai bak ‘Sindi dipek sapi ningut simnai ba, suar duug yok diyai kep bidibingon yok nipou ug e. Gima rino doom da leu.’

²⁰Hiter pai bak ‘Sindi diwak sop nok ditnem. Gima rino dihwou yem njita bit andigpoi bi.’

²¹Awak dima ngkwei hanyen bindat igbit yo dima yahagom ighyet bak niceu lene ningon sibui sut yok nindig bibor bicuk nide awak bipai ‘Abipbur ba, aug buwak yo di yuhui mbum nya kin nikinei-kinau nya kin yo di igyai tu nya kin yo di imig lit nya yahagom kwei leu biyati cem leu simpakti cem bidem minu ndig dini.’

²²Jei bi lene awak dima kwei hanyen bitri tut bak niceu bipai ‘Diyai hagom bit leu nok acuk dati tu noro ig bon ningwakti mem hi kin bu.’

²³Lene niceu cuk noni hanyen bu ‘Aug buwak tungwatu nimikuisi nya yahagom kwei leu minu mien di gahai dini kou leu binhyepo ditde ig mpung.

²⁴Dipai bina bipia yo po ditri tut pesta di dibon mem yok biyok pima migyem njita dini bit nye bi sren!’ ”

²⁵Mpe di gom bu tirigi tungwatu nya ningot ndig ijop bram Yesus lene Noni kiek No ndam yok bipai,

²⁶“No di joi sut bit Da noro ningon ngakei nicig kin nipmem kin nitnem kin nimunggwom bat nya kin nikindig bat-nikinjoi bat nya kin nikwohop bat nya nindig dor njiriek ningon ngakei Dati binyohou nonti niyaisi lene bit bon Noni ya kui Da kan bi.

²⁷ No di kon nide biei salib bibit Da bi dem tut gima ya kui Da bi.

²⁸Gino jigom tin ei mem ngot ig di bon ninggre bijo-jo yam dip anai bibor lene suar noni kan-kan nyen tut nibok nipou ug e. Leu binhyepo kwop mitiei bikan tut lo, nimangti dem mem gima ngot ig dima.

²⁹Gi bi ne bit bon noni ngot ig dima biput kan bi noro tig cou he bijo nok. Leu api yo di ingat ig di ngot dima mipa ndip noni nindig bibor.

³⁰Ipai biyam ‘No dima kinyon ei ningot igti noro bit bon ngot biput kan bi!’

³¹Gino nibou ndig gom hei sut nide tentara nya ibou sribu simnai bikon pran bit nibou ndig hiter di hei sut nide tentara nya ibou sribu ningot can ne suar noni kan-kan nyen tut nipou ug e. Leu binhyepo kan tut bipia noni yai nisindemti mem gima bindei timek siceu nya e, he bi e?

³²Gi bi ne noni sok nihyet ei yo di igya kui noni ibou poi dip leu binhyepo yuug ya hacan mem noni tirigi nibou ndig hiter dima no rima ei minu ting yo. Leu binhyepo ikwam minggwen bit yam ser.”

³³Lene Yesus pai ningwigsi biyok “Nok gima tut jeni cem. Gino jikes mun di jinyeng tut hagom ei bi ne bit bon jiya kui Da kan bi.”

³⁴“Nsim di nijep nyop kei. Noro gino nsim mbum hanyen binyop bi ne bit bon jikinding binyop hanyen kan bi.

³⁵Nsim di nyop bi kei mem ibigimahap miai ngausi ba, iba pupuk njita kioi cem bi. Gima rino icom hak ug. Gino jitingou dile lene ma jiyok ngon kep dihyet!”