Read Hatam LUKAS 16 Bible Online

LUKAS 16 - Hatam bible

LUKAS 16

¹Yesus pai bak yo di igya kui Noni “Mpe di gom ne andigpoi di nyeng bibor ta tungwagom nok mindor mem nide awak nya. Mindor dima nyohou mun di niceu nyeng tut nya hagom. Mpe di gom lene hi pui kep awak dima ninghapti bak andigpoi tut mitiei di noni bimangkrei.

²Gima rino andigpoi hig nide mindor kwei bihig ser noni ‘Anghapti di tibim kwei bida nijit-jau e? Ma apas kep tut ade midyai ninyohou ditde ndigbanti dima hagom ei srat laporanti ba, ayai bida. Bit bon dijem anyeng mindor di nyohou ditde mitiei kin ndigban bu bi.’

³Gima rino mindor dima kan ‘Siceu miciu ser sinyeng mindor. Sibon ndei notou i? Sisindem mem siwim dihyei cem sitig jui cem bi ba, simmai sut gima sigwam tindei tungwatu nya bisahara yok tut mun di bahati tut sa.

⁴Nnaba sikan tut puig di kei mem sa leu binhyepo tirigi siceu ciu ser sinyeng lene sibon sisut bat di micigit sa kui igya.’

⁵Gima rino noni hig tungwatu nya di andigpoi pima nide ningwam jo biyok yahagom kwei bihig ser tungwagom ‘Andigpoi de ningwam pig jo bina i?’

⁶No dima buhup ‘Mini zaitun tong nuut sratus gom.’ Leu api mindor pai binoni ‘Angig ayai kep ade daptar ningwam dini leu api haninyai agwam jug mbigom ba, apas kep nimangti ug ei ningot muhwi he eisi.’

⁷Lene noni hig ser tungwagom bu ‘Andigpoi de ningwam pig jo bina i?’ No dima buhup ‘Kron sribu gom di mpung tut gandum.’ Leu api mindor pai binoni ‘Gini ne ade daptar ningwam rin ba, apas kep nimangti ug ei kron sratus muhwindaningai he eisi.’

⁸Gima rino mindor di ningon sren bi dima niceu nggei sut noni drek dip niba ningon tekti bidimig munti dima. Lewo tungwatu dihyeisi dini iba ingon di tek binyohou dimig ide midyai kan dor njiriek yo di imbut mem nipigati nya.”

⁹Lene Yesus binut nihyet bipai “Jimiap e? Suar jiba mun di pror yon bibrim tungwatu nya ba, ihig isut bit je leu binhyepo tirigi ndigban dihyeisi dini bon ninyeng bu bi lene Allah micigit je kui ig di jo ninno bijo kikau.

¹⁰No di ningon gom tut mun di nimien ningon gom tut mun di nindig cem. Noro no di ningon gom tut mun di nimien bi lene ningon gom tut mun di nindig cem bi.

¹¹Gino jingon gom tut mun di mipror yon ei dihyeisi dini bi lene tou riba ningon com je tut mun di bon ninyeng di bit bon pror yon hanyen bi sren i?

¹²Gino jingon gom tut mun di hiter ba ningon com je tut bi lene tou riyai mun di jinyeng tut bije i?

¹³ Bit bon tungwagom bon nonti nok awak mem niceu bat nya ibou can kan bi. Leu mporo ningon mpo tut hi lo, ningon gom tut hi. Noni miba nijoi biyai midyai mem hi lo, ba ninghen biyai midyai mem hi. Bit bon jinok awak mem Allah kin ndigban di mipror yon cem kan bi.”

¹⁴Tirigi Farisi nya imiap Yesus ningginausi lene ipa ndip Noni lewo iba yoho rok mitiei nindig bibor.

¹⁵Noro Yesus pai biyok “Jindo jenti dem kep nok yo di ingon sren nya ei tungwatu nya igyai him noro Allah kan tut mun di jo ei jingonti. Lewo mun di tungwatu nya ikan bipia bon ninyeng rino bon ninyeng ei Allah niyai him bi.

¹⁶Allah niggai serti di tug hon Musa kin nabi nya ipas kepti mbut kikau kwei bipek nijam di Yohanes di tur tungwatu nya ei minyeiti ningat ri. Hon kep nijam dima kwei lene tungwatu nya itri tut Nihyet Di Kei tut Allah ninyeng tak kepti. Lene yo di ibungwam mem gima icoi nya yahagom itug hon.

¹⁷ Noro krop kei mem mpia-bbed him kin dihyeisi dini pror hak leu gima nipas kepti gom ei Allah Nicukti pror a.

¹⁸ No di kou sut nitnem buug wak sop gom bu bididei nitnem ndig bon sisar nicut tut yamti. No di wak sop di nijjep kou ei lene no dima cem bon sisar nicut tut yamti.”

¹⁹“Mpe di gom ne tungwagom di nyeng bibor no rinaha ba, noni juk kep sinsun di nibok kak bibor nya lene yem njita ninyeng hagom bikwop njap-njap.

²⁰Mpe dima cem no di nuhui mbum di ninyeng Lazarus no rinaha ba, nibok jo bidem ningkek dip bibong ser dimbou hui ei no di nyeng bibor pima nide biyati bikwop njap-njap.

²¹Lazarus ningon ya mem njita ninnir di cut leu no di nyeng bibor de meja leu binhyepo yem kep ninggum. Nsien nya cem ikwei piei nibok di mang bibor dima.

²²Mpe di gom ne no di nuhui mbum nide njap ngwig hon bimai leu api malaikati nya ibuwak noni buug gwam kui Abraham ninda com ei gwamti. No di nyeng bibor cem nide njap ngwi hon bimai ba, itig.

²³Noni tug ndei ninghuisi wei nindig bibor ei yo di imai nya ikieti leu api kon nibou bicap ser bingat lo, Abraham gwam minu ting bibor ba, Lazarus gwam simiak noni.

²⁴Gima rino noni hara ‘Arig Abraham e, ma angondut da ba, acuk Lazarus leu binhyepo su ninda pijum ei minyeiti ba, kwei bingget didweb lewo hum di cig-cai dini sror da o!’

²⁵Noro Abraham buhup ‘Dipmot na e, ma ayok ngon kep bipia tirigi ayaisi jo yo ne ade mun di amati nya hagom kei bibor kei noro Lazarus ma mun nyeng di kinei nya he. Nogindini noni ningon kei bibor kei ei mpia dini noro atug ndei anghuisi wei nindig bibor.

²⁶Ter leu gima lene pimbien nindig di jut bibor bikkin ser nyeni kin nani. Bit bon hi pri gau leu nite dini hwou ndam na kan bi. Nok gima cem bit bon hi pri gau leu nite dima kwei ndam nyeni kan bi!’

²⁷No di nyeng bibor pai ‘Arig Abraham e, dijoi sut ma acuk Lazarus ba, ug ei dicig nide ig,

²⁸ndam dikinjoi bat nya ibou muhwi ei sirima leu binhyepo sok kep yok ser nhyema icut bisar ei mpia di ditug ndei ninghuisi wei eisi dini bi.’

²⁹Abraham buhup ‘Allah niggai serti di tug hon Musa kin nipas kepti di tug hon nabi nya hagom jo bak akinjoi bat nya tu. Nnaba igyai igbit leu nok srat dima yok nicuk yoti!’

³⁰Noro no di nyeng bibor buhup ‘Arig Abraham e, gima dem bi! Gino tungwagom kiju hanyen leu nimai eisi buug ngat yok lene yoni ittin ser ide sisar ba, ikiek ndam Allah hak ug.’

³¹Noro Abraham buhup ‘Gino ibit Musa kin nabi nya ide nicukti nya bi lene mice tut bibit no di kiju hanyen leu nimai eisi nihyet cem bi.’ ”