Read Hatam LUKAS 17 Bible Online

LUKAS 17 - Hatam bible

LUKAS 17

¹Yesus pai bak yo di igya kui Noni “Mun di bindei dino tungwatu nya ibon sisar nonaha. Noro aye! Buhun bibor mem no di bindei dino hiter bon sisar!

²Nnaba tungwatu nya ikim tig mma nindig bibor ba, ibisrou no dima nikimam binjei sut ug ei muk jou leu gima noni bindei ba, munggwom mien dini hi bon sisar a.

³ Ma jingon sok kep jenti! Gino asut bon sisar tut na lene ma apingok ningonti tut hak ug. Gino noni ttin ser sisar dima lene ma akos ser sisar dima hak ug.

⁴Gino noni bon sisar tut na mbimuhwindacan mem njap gom noro kwei mbimuhwindacan bipai bina ‘Dijem ampon bina’ lene ma akos ser sisar dima hak ug.”

⁵Yo di igya kui Yesus yahara Noni “Na di Tuhan e, ayai nisindemti binye leu binhyepo niba ningon com Na mungkun kei.”

⁶Noni buhup “Gino jide niba ningon com Dati dem kep sawi ngan di bigbibor he lene bon jicuk biei murbei dini ‘Atiba nanti leu api ata nanti hanyen ei muk ngeisi!’ Lene midem igbit jicukti dima ri.”

⁷“Gino jide awak ug yai miai bihyen kep domba nya cem leu api ngkwei hanyen kwei ei ig bei lene mijihig noni ‘Abipbur ba, akwei yem njita.’ Jipai bak nok e?

⁸Nok bi! Noro jicuk noni ‘Akwen njita mem da lene ma ajuk sinsun di pwoi leu api abitin ei njita mem da. Agwam nyahan bibou diyem njita bididut ndia ngei nipou ug e. Gima ngwig leu api ayem ade njita abia.’

⁹Dem tut gima jipai sigyo bak jide awak drek dip midyai di yai bit leu nok jicuk noti e? E bi!

¹⁰Nok gima tut jeni cem. Tirigi jiyai midyai hagom bit leu nok jiceu nicuk jeti bingwig lene ma jipai biyam ‘Inok awak di ibon inyeng bi. Igyai midyai hagom bit leu nok iceu nicuk nyeti he.’ ”

¹¹Tirigi Yesus ug ndam Yerusalem lene ug mbut minu niya kwas yamti ei hanjop Samaria kin Galilea.

¹²Tirigi Noni coi ug ei minu mien gom di jo ei puig sinon ei nimbutti dima lene ibou simnai di bras yem yok igya minu ting um Noni,

¹³biba ighyet nindig hara “Yesus e, Andigpoi e, angondut nye o!”

¹⁴ Tirigi Yesus ngat yok lene cuk yok “Juug ndo jenti bak imam nya leu binhyepo ingig igyai kep jingkek dip.” Tirigi yuug ei puig sinon tu lene ingat lo, ikei hanyen tu.

¹⁵Tirigi igom leu yo dima ikieti ngat lo, noni kei hanyen tu lene ngkwei hanyen ba, ba nihyet nindig bibor binggei sut Allah.

¹⁶Lene ba ningwak bikik mpia ei Yesus nimig him bipai sigyo bak. No dini ne timiei minu ndig Samaria ri.

¹⁷Lene Yesus hig ser noni “Apo dibindei ba, ibou simnai ikei hanyen bi e? Nindigsi di ibou muhwindatai pima yo rigitou i?

¹⁸Nggon rino ngkiai dini nongkom ngkwei hanyen bipai sigyo bak Allah i?”

¹⁹Lene Yesus pai binoni “Akiju ba, aug hak ug. Akei hanyen tug hon ade niba ningon com Dati tu.”

²⁰Farisi nya ibou pwoi ihig ser Yesus “Allah ninyeng tak kepti mittau kep nye apig bu i?” Noni buhup “Allah ninyeng tak kepti mittau kep nye tug hon bindo ei tungwatu nya igyai him,

²¹di bindei ba, ipai sut ‘Jikwei ngat i! No rini’ e, he ‘no rima’ e? Nok bi! Lewo Allah ninyeng tak kep limwa nyati sindi srig jikieti tu.”

²²Ariman bu lene Noni pai bak yo di igya kui Noni “Ei nidipti bu mijiyok jingon mem gima jingat Munggwom Tungwatu Nipmot ningat bou jiyai him mem njap gom ngat he noro njap dima mittau kep je hanyen bi.

²³Mpe dima lene tungwatu nya mipai bije ‘Jingat i! No rima.’ He mipai ‘Jingat i! No rini.’ Noro ma jingon bit ighyet au.

²⁴Bit leu nok mpia kieng ei mpia-bbed him ba, ninjeng piga mpia-bbed him nisurti-nipekti lene Munggwom Tungwatu Nipmot nittau hanyenti cem nok gima.

²⁵Noro suar Noni yai ninghuisi wei nindig bibor bibie ug e ba, tungwatu nya ei nijam dini mikou sut Noni.

²⁶ Lewo Munggwom Tungwatu Nipmot nittau hanyenti midem kep nok nijam di Nuh gwam ei dihyeisi dini.

²⁷ Tungwatu nya igyem njita bidut ndia ngei cem ba, iwak yam kikau ug bipek njap dino Nuh coi ug ei kibar nsi kep leu api minyei ut kep yok ba, yahagom isar bingwig.

²⁸ Nok gima cem mem nijam di Lot gwam ei dihyeisi dini. Mpe dima lene tungwatu nya igyem njita bidut ndia ngei cem itri mun bibipek mitiei cem igyai miai cem ingot ig cem,

²⁹noro njap di Lot nang leu Sodom ne hum kin belerang cut kros leu gwamti biyem nindigsi nya yahagom bingwig.

³⁰Nok gima cem mem njap dino Munggwom Tungwatu Nipmot nittau hanyenti.

³¹ Mpe dima ne ma no di kui bigwam ig bou ninjek juk hanyen kwei noro coi ig bei biyai nide ndigban au. No di yai miai cem ma ngkwei hanyen ug ei ig bei au.

³² Ma jiyok ngon kep mun di cut igkep Lot nitnem!

³³ Bikwop no di ningon hek tut nonti bikan bipia niyaisi bon ninyeng mem nonti ne niyaisi sar. Noro no di kes niyaisi ei bikan bipia niyaisi bon ninyeng mem nonti bi nyohou niyaisi.

³⁴Ma jingon jo kep bipia ibou can ibong mai ei nghim nsi gom mem mmun leu api malaikati nya iteu gom lene ikes gom ei.

³⁵Sop cin di yoho gandum ngan ei hukti ne malaikati nya miteu gom lene ikes gom ei. [

³⁶Ibou can igyai miai leu api malaikati nya iteu gom lene ikes gom ei.]”

³⁷Yo di igya kui Yesus ihig ser Noni “Tuhan e, mun dini yok hagom pek kep mem nye ei siritou i?” Yesus buhup “Tirigi nimbiam nijoti ne hacam krubri nya ingwig kep ei sirima.”