Read Hatam LUKAS 20 Bible Online

LUKAS 20 - Hatam bible

LUKAS 20

¹Mpe di gom bu tirigi Yesus ngginau tungwatu nya bitri tut Allah de Nihyet Di Kei ei Tuhan De Ig lene imam nindig nya kin guru Puig Yahudi nicukti nya kin nibou mben Yahudi nya ittau kep Noni ba,

²ihig ser Noni “Mindur di abon nya ne abon tug hon tou ninyeng i? Tou risindem tut Na i?”

³Noni buhup “Dani cem dihig ser je tut mun nyeng gom.

⁴Tou riyai nisindemti bak Yohanes di tur tungwatu nya ei minyeiti i? Allah e, he tungwatu nya e?”

⁵Gima rino isimbot kep biyam tut ninyen bipai biyam “Ibuhup notou? Leu gino ibuhup nihyet bipia Allah sindem tut Yohanes lene Noni mihig nye ‘Nggon rino jingon jo kep noni bi i?’

⁶Ne gino ibuhup bipia tungwatu nya isindem tut noni lene tungwatu ningot ndig dini yok miba tig bihwen nye lewo ingon jo kep bipia noni ne nabi ri.”

⁷Gima rino ibuhup “Nikan tut bi.”

⁸Gima rino Yesus pai biyok “Gi nok lene Dani cem midipai igbit bije tut Ditde nisindemti nikwei leusi bi.”

⁹ Yesus ba nihyet nibiti nindati bingginau tungwatu nya bipai “Mpe di gom ne miai ceu gom ug yai midyai ei nide ba anggur kioisi. Noni ndo midyai dima bak yo di inyohou ba anggur kan nya leu api mbut ug ei minu ting leu lene gwam ninno ei sirima.

¹⁰Tirigi nijam nipuk ba anggur ningatti dem lene anggur niceu cuk nide awak gom bingkwei hanyen bikwei yai ba anggur ningat leu yo dima. Noro ikat noni bibui leu api ijji noni bingkwei hanyen kin gi hei he.

¹¹Gima rino anggur niceu cuk nide awak gom kin bu bingkwei hanyen ndam yok noro ibui noni bibok lene ibimangkrei noni cem ba, ijji noni bingkwei hanyen kin gi hei he.

¹²Leu api anggur niceu cuk nide awak gi niningai bikwei bu noro yo dima ibui noni bimai-mai nyen lene injei noni ug ei ngug sai.

¹³Gima yok bindei ba, anggur niceu kan ‘Sibon ndei notou bu i? Sicuk sipmot di singon ngakei buug leu api jo nibreisi bipia yo dima mikuk yok binoni.’

¹⁴Noro tirigi yo dima ingat igbit anggur niceu nipmot di kwei dima lene yuhum yam nsi bipai ‘No dini miba nokep mun nyeng hagom di jo bak nicig. Jikwei ba, ikimukep noni leu binhyepo iba nyekep ba anggur nghousi dini!’

¹⁵Gima rino injei noni ug ei ngug sai lene ikimukep.” Lene Yesus hig ser yok “Gino ba anggur niceu ngkwei hanyen lene noni minggon ndei yo dima i?

¹⁶Ningat ne noni mikwei kimukep yo dima yahagom leu api ndo midyai ba anggur nghousi dima bak yo di hiter bu.” Yo di imiap mun di Yesus pai dima ibuhup “Suar noni yai nok gima bi sren!”

¹⁷ Yesus tou kep yok nggilun bihig ser yok “Gi nok lene ma jipai mingat tut Allah Nihyet dini, ‘Tig mma di tukan nya ikou sut bon ninyeng jei dor njiriek nindigsi nya.’

¹⁸Bikwop no di ndrat tig dima minnirwap ba, gino tig dima tot noni lene mitam noni binem-nnai.”

¹⁹Guru Puig Yahudi nicukti nya kin imam nindig nya ipi bikat Yesus mem nituti dima lewo ikan tut bipia Noni ba nihyet nibiti nindati pima bipai singgre yok. Noro ittin tut tungwatu ningot ndig.

²⁰Gima rino inggok nituti di kei bibor. Iba mitiei bingot kep ibou poi di ibon yonti dem kep nok yo di ingon sren nya. Yo dima yuug hig simber Yesus leu binhyepo iba nibuhup biyokti bisrou Nonti hanyen leu api ibikes Noni ei nibou pemerinta nindati.

²¹Gima rino yo di nibou nya iba mitiei bingot kep yok pima ikwei pai bak Yesus bipai “Guru e, nikan tut bipia ahyet di atri tut kin ade ningginau tungwatu nyati hagom ne nijit-jau ri. Apai mingat tut Allah ningon kanti mem tungwatu nya cem ba, amig mbus bi.

²²Gino nigo belasten bak nibou Kaisar Roma gau nyenti lene niyaisi dima tunggwei sut Puig Yahudi nidimig sutti e?”

²³Noro Noni kan tut ide nicom biei mpup ris Noti tu. Gima rino pai biyok

²⁴“Jindo igbit mitiei di jibigo belasten dima biDa. Tou rininyeng kin ningwes jo ei mitiei ninjek dip dini i?” Ibuhup “Kaisar.”

²⁵Gima rino Noni pai biyok “Gi nok lene ma jikwas mun di Kaisar nyeng tut nya hanyen igbit bak noni lene ma jikwas mun di Allah nyeng tut nya hanyen bak Allah.”

²⁶Bit bon iba Yesus nihyet bisrou Nonti ei tungwatu ningot ndig di ingat rin ei mpia dima yoho bei bi. Ikimut yuhui binggap leu tut nibuhupti.

²⁷ Yo di inggre kin nimpung Saduki ibou poi ikwei ngat Yesus. (Yo dini itri tut bipia tungwatu nya mikiju hanyen leu imai eisi bi sren.) Ipai singgre Yesus,

²⁸ “Guru e, Musa pas kep nicukti dini mem nye. Gino tungwagom di pijet mai leu nitnem ne suar nikinjoi wak nisen di pijet dima bu leu binhyepo yai nimunggwom bat nya bigya luei nijjep ndig nohoti hanyen.

²⁹Mpe di gom pinai nya ibou muhwindacan di ikindig bat-ikinjoi bat yam ingat rin ba, gi hi di mighumbou wak nitnem noro mai nipilei hanyen tirigi nitnem yai imunggwom hi bigyo.

³⁰Lene nikinjoi wak nisen kibom hanyen noro noni cem mai nipilei hanyen tirigi nitnem yai imunggwom hi bigyo.

³¹Lene nikinjoi hi bu wak nisen kibom hanyen bu. Lene nok gima kikau ba, ibou muhwindacan yahagom imai ipilei hanyen leu.

³²Niabiati bu kibom di pijet pima cem mai.

³³Tirigi njap dem mem tungwatu nya ikiju hanyen leu imai eisi lene misop dima mijem gi tou rinok nijjep i? Lewo ibou muhwindacan iwak noni tu.”

³⁴Lene Yesus buhup “Tungwatu nya ei nijam dini iwak yam.

³⁵Noro dem tut gima yo di ikiju hanyen leu imai eisi bicoi bit nijam di jo ei nidipti bu iwak yam bi.

³⁶Yo dima noyam kin malaikati nya. Bit bon imai bi sren. Yoni ne Allah nimunggwom bat nya rin lewo ikiju hanyen leu imai eisi tu.

³⁷ Musa ndo brei binye bipia yo di imai nya mikiju hanyen leu imai eisi. Ei nipas kepti tut biei mon di njeng pima ne Musa pai sut Allah ‘Noni ne Abraham kin Ishak kin Yakub ide Allah ri.’

³⁸Noni ne Allah mem yo di imai su nya bi! Noro Noni ne Allah mem yo di igyaijo nya! Ningat ne Allah kan bipia tungwatu nya yahagom igyaijo.”

³⁹Guru Puig Yahudi nicukti nya ibou poi ipai bak Yesus “Guru e, Ade nibuhupti dima igbit ri.”

⁴⁰Hon kep njap dima bikui lene yo dima ibrim ingkek kep Noni bihig singgre Noni bu bi.

⁴¹Mpe dima lene Yesus hig singgre yok “Nggon rino ipai sut Nibou Ndig di teu tungwatu nya biyai niyaijo nijep biyok ntun Daud him i?

⁴² Bit leu nok Srat Mazmur nipas kepti ne Daud nonti pai, ‘Allah pai bak ditde Tuhan bipia agwam kui dinda com,

⁴³bibou doom Ade siceu nya ei amig him ug e.’

⁴⁴Gino Daud jem Nibou Ndig di teu tungwatu nya biyai niyaijo nijep biyok pima ninyeng Tuhan ne notou Nibou Ndig di teu tungwatu nya biyai niyaijo nijep biyok dima ntun Daud him i?”

⁴⁵Tirigi tungwatu nindigsi nya yahagom intu kep nihyet lene Noni pai bak yo di igya kui Noni,

⁴⁶“Jingon sok kep jenti tut guru Puig Yahudi nicukti nya lewo ijuk sinsun ndok di jei ba, ijoi sut tungwatu nya ipigo yok ei biyati. Igwam bilen dip kui nimbar ei jide ig mbusyameisi bigwam bibie mem pesta di tungwatu nya ibon cem.

⁴⁷Iris sop kibom bipos ide ig bitut mun di joti nya hagom leu yok. Lene yuhuk nadi jo ninno bijo kikau leu binhyepo ibiku ide nisibutti dima! Hukum di micut igkep yok dima buhun bibor!”