Read Hatam LUKAS 21 Bible Online

LUKAS 21 - Hatam bible

LUKAS 21

¹Mpe dima lene Yesus gwam ei Tuhan De Ig bitou kep yo di inyeng nya tirigi icom ide mitiei ei brua nsi.

²Noni ngat kibom gom di nuhui mbum di kwei bicom sen mmun can he ei brua nsi.

³Lene Noni pai “Ma jimiap kep dihyet dini! Kibom di nuhui mbum dima com mitiei nindig dor njiriek nindigsi nya yahagom.

⁴Lewo nindigsi nya icom ide mitiei niken he noro kibom dima com nide mitiei hagom ba, njita cem ngwig leu noni.”

⁵Mpe dima lene ibou poi isimbot kep biyam tut Tuhan De Ig bipai biyam “Mbenjen! Jingat tig di nibok kak dima yok kin nimbumbati nya di tungwatu nya ikwas tut Allah!” Noro Yesus pai biyok,

⁶“Ma jicap ser Ig dima bou jiyai him mem nijam dini lewo jei bi ne siceu nya minggek hagom bibindei ba, tig di jo-jo yam dip mijo nijoti bu bi.”

⁷Yo dima ihig ser Yesus “Guru e, apai igbit binye tut nituti mem mun dima yok hagom nicut igkep nyeti ba, mindei rino bindo tut nipek kepti i?”

⁸Noni buhup “Ma jitindei ser tungwatu nya leu binhyepo hi ris bije bijisrawir au. Lewo tungwatu nya imang bibor iba dinyeng bipai sut yonti bipia yoni ne Da rin cem tto bou dem tu cem. Noro ma jibit ighyet au.

⁹Tirigi jimiap tut yo di ikon pran bit yam kin yo di isrep tut nibou ndig nya lene ma jittin tut au. Lewo mun dima yok hagom midem igbit nipou ug e noro njap ningwig honti ttau bigyo.”

¹⁰Lene Noni binut nihyet bipai biyok “Mben gom miyeheu imbuk mem mben hiter. Nibou hanjop hi mikon pran bit nibou hanjop hiter bu.

¹¹Dihyei mun brim bidem dihyeisi nisurti-nipekti ba, ninggum nindig bibor kin nsuwer ajar di buhun bibor mihwen tungwatu nya imang bibor. Mindur nya kin mun di biyai tungwatu nya ingon digit micut kwei leu mpia-bbed him.

¹²Noro nipou tirigi mun dini yok hagom cut igkep je bigyo ne siceu nya mikat je ba, ihwen bit je bibuwak je ug ei nikei mben Yahudi yoho bei ei ide ig mbusyameisi leu api jisima. Yoni mibuwak je ug ei yo di inyeng jei nya kin nibou ndig nya yoho bei drek dip dinyeng.

¹³Mpe dima lene bon nituti mem gima jitri tut Allah de Nihyet Di Kei biyok.

¹⁴ Ma jingon ngkiem bipia mporo jingon ku jenti tut mun di jibirop hanyen biyok bi.

¹⁵Lewo dibindei ba, jiji cem nggan jingon cem ki leu api bit bon jide siceu nya yahagom ibigen ser jihyet kan bi.

¹⁶Mpe dima lene jicig bat-jipmem bat nya kin jikindig bat-jikinjoi bat nya kin jide bat nya kin jide yo di jinttig-tta nya yahagom mibakilak je apino jibihi mijiyai nimai.

¹⁷Ba, tungwatu nya yahagom mingon mpo tut je drek dip dinyeng.

¹⁸Noro jibou nta gom mipror leu je bi.

¹⁹Gino jiya ngkiem bijibet jingon ne jingwes ngun.”

²⁰“Tirigi jingat tentara nya imang bibor igyon ttai Yerusalem lene mijikan tut bipia tto bou dem mem inggek minu dima hagom bingwig ri.

²¹Mpe dima lene suar yo di ibong ei hanjop Yudea yahagom inang ug ei cet him. Suar yo di igwam ei minu ndig yahagom inang bihigom. Suar yo di igya minu ndig dima nisai cem ingkwei hanyen ug ei minu ndig dima bu au.

²² Lewo nijam dima ne Nijam Di Allah Kes Hukum Ei Tungwatu Nya Dip rin leu binhyepo mun di ipas ei Allah nihyetti micut igkep tungwatu nya tug hon nisinati dima.

²³Aye! Mpe dima lene notou mem sop di itta buhun nya kin sop di igyai ido bak munggwom ngwoi nya i? Mpe dima lene mun di buhun bibor micut igkep minu dini ba, tungwatu nya mitug ndei hukum nindig bibor leu Allah.

²⁴Lewo siceu nya iba simeda bitot bihi bikri bihi ug ei ingkiaisi cem leu api ngkiai nya mico kep minu ndig Yerusalem binnir-wap kikau bibou nijam di Allah kos tut mem yok ngwig ug e.”

²⁵ “Mpe dima ne tungwatu nya mingat bindo brei ei mpia njap kin bed mmun kin ham nya him. Mben dihyeisi dini hagom inghuisi mimpig bibor tut muk di tti bibor bidwoi bibor cem.

²⁶Tungwatu nya mimai tirimpoi drek dip gi inghuisi mpig sut mun di cut igkep yok ei dihyeisi dini. Lewo nisindemti nya ei mpia-bbed him ugwa-kwei.

²⁷ Mpe dima lene Munggwom Tungwatu Nipmot mittau kwei sut Nide nisindemti kin Nide nikei-kau-keisi ei bumbuhuiti kwei ri.

²⁸Tirigi jingat mun dini yok hagom sindi cut igkep je lene ma jikiju ba, jikon jibou bijitou kep ginyo kug lewo tto bou dem mem Allah niteu jeti dideu su.”

²⁹Lene Yesus ba nihyet nibiti nindati bingginau yok bipia “Ma jiyok ngon kep biei ara kin biei nindigsi nya cem.

³⁰Tirigi dideu gi mitu lene nitom millet leu nimbrinap kikau ug ei ninggrupti apino jikan tut bipia bed di biang mpia ngei dideu kwei su.

³¹Nok gima cem tirigi jingat mun dini yok hagom pek kep mem je lene mijikan tut bipia jei bi ne Allah ninyeng mitak kep dihyeisi dini nok Nibou Ndig ri.

³²Ma jiyok ngon kep! Tungwatu nya ei nijam dini mimai bi bibou mun dini yok hagom midem igbit ug e.

³³Mpia-bbed him kin dihyeisi dini misar noro Da dihyet misar bi sren.”

³⁴“Ma jingon sok kep jenti. Leu gino jibou sibui ei nibon pestati kin nidut mun di pu jeti kin niyai munti nya di mipror yon lene njap ningwig honti mittau kros kep je,

³⁵dem kep bon di srou je. Lewo njap dima mittau kros kep tungwatu dihyeisi dini hagom.

³⁶Gima rino ma jiyai ngkiem bijingat nadi bidem nituti kin nikwesti hagom leu binhyepo jiyai nisindemti. Leu binhyepo mbro nok gino mun di cut igkep je buhun bibor lo, jiba ningwes ngun biya ei Munggwom Tungwatu Nipmot Noho bei.”

³⁷ Yesus ngginau tungwatu nya ei Tuhan De Ig bikwop njap-njap leu api ngkwei hanyen ug ei Nungug Zaitun bibong ei mpia dima mem mmun.

³⁸Ba, njap bigyoti lene tungwatu nya yahagom induk yam kwei ei Tuhan De Ig hanyen leu binhyepo ingig itingou mem Yesus ningginau yoti.