Read Hatam LUKAS 22 Bible Online

LUKAS 22 - Hatam bible

LUKAS 22

¹ Mpe dima lene tto bou mem Njap Ndig Roti Dwoi Bi dideu su. Ijem ninyeng Njap Ndig Paskah cem.

²Imam nindig nya kin guru Puig Yahudi nicukti nya inggok puig mem gima ikat Yesus bihwen Noni nyahan lewo ittin tut tungwatu imang bibor.

³Jei bi lene Bilis coi ei Yudas Iskariot di nggre kin yo di igya kui Yesus ibou simnaibrimigcan ningonti.

⁴Gima rino noni ug ngat imam nindig nya kin yo di igya ser Tuhan De Ig ide nibou nya leu binhyepo isimbot kep biyam tut puig di kei mem noni tri Yesus ei indati.

⁵Ingon llei sut mun di noni pai biyok leu api ipreu mem noni tut mitiei.

⁶Yudas ce tut mitiei dima nimangti leu api sindi nggok nituti mem gima ba niku bikes Yesus ei indati nding leu tungwatu igyai him.

⁷Njap Ndig Roti Dwoi Bi tau kep yok ba, tto bou dem mem ibui domba mien bibam bingei kep Njap Ndig Paskah.

⁸Gima rino Yesus cuk Petrus kin Yohanes bipai biyok “Juug tin ei njita mem nye leu binhyepo ibon pesta kep Njap Ndig Paskah.”

⁹Yoni ihig ser Noni “Nitin ei njita dima ei sirigitou i?”

¹⁰Noni buhup “Tirigi jicoi ug ei minu ndig dima lene mijuum tungwagom di ttei dibijig tut minyei. Ma jibit noni kikau ug ei ig gom,

¹¹leu api ma jipai bak ig dima niceu ‘Guru hara na tut ninsi hi mem gima Noni kin yo di igya kui Noni ibon pesta kep Njap Ndig Paskah eisi.’

¹²Ig niceu mindo ninsi nindig bibor di ibon di jo ei ninggre di jo-jo yam dip anai di itin ei su bije. Ma jitin ei mun nyeng hagom mem nye ei sirima.”

¹³Gima rino Petrus kin Yohanes imbut biyuug ngat mun dima yok hagom dem igbit Yesus nipaisi leu api itin ei mem ibon pesta kep Njap Ndig Paskah.

¹⁴Tirigi jam dem tu lene Yesus kin yo di igya kui Noni yahagom igwam kui meja.

¹⁵Lene Noni pai biyok “Dillei sut gima dibon pesta kep Njap Ndig Paskah bit je nipou tirigi diyai dinghuisi wei bigyo!

¹⁶Ma jiyok ngon kep bipia dibon pesta kep Njap Ndig Paskah bu bi bibou dibon pesta kep njap dima ningwigsi ei Allah De Dihyei Di Nijep Bu ug e.”

¹⁷Pai nok rino Yesus krau mok hi bipai sigyo kep bak Allah lene pai biyok “Jiyai gi mokti dini bijikwas tut yam.

¹⁸Lene ma jikan kep bipia hon kep ammani kui ne didut ba anggur ngei bu bi bibou Allah ninyeng tak kep tungwatu nya ug e.”

¹⁹Gima ne Yesus yai roti nindak gom bipai sigyo bak Allah kep lene ki bitri yok bipai “Jiyai roti dini bijiyem ug lewo gini ne dinghui di dikes ei mem je ri. Ma jiba midut dini biyok ngon kep Da.”

²⁰ Nok gima cem tirigi igyem roti bidem leu su lene Noni yai gi mokti bipai biyok “Gi mokti dini ne Allah de gi preu nijep di Noni ba dinggrom bitak buk ser kin dinggrom di kiber ei mem je ri.

²¹ Noro jingat i! No di mitri Da no rinaha bigwam bit Da!

²²Munggwom Tungwatu Nipmot miyai nimai bit leu Allah nikos tutti mem Noni. Noro aye! Buhun bibor mem no di tri Noni!”

²³Gima rino yo di igya kui Yesus ihig yam tut gi hi di srig ikieti dima di bon mun dima yok.

²⁴ Lene yo di igya kui Yesus iba ighyet bidahat yam tut gi hi di ninyeng jei dor njiriek nindigsi nya.

²⁵Yesus pai biyok “Jikan tut bipia nibou ndig ngkiai nya ico kep ide limwa nya ba, nibou ngkiai nya ijoi sut gino ide limwa nya ijem inyeng ‘Yo Di Inyohou Ide Limwa Nya.’

²⁶ Noro ma jiyai nok gima au. Suar no di ninyeng jei di srig jikieti om nonti binok no di bon ninyeng bi. Suar nibou om nonti binok awak.

²⁷ Jindo igbit gi tou rininyeng jei i? Gi hi di gwam kui meja e, he awak di ngei njita e? Jo nibreisi bipia no di gwam kui meja rima ninyeng jei. Noro dingat rin srig jikieti nok no di awak.

²⁸Jingkiem ser Da tut mun di buhun di tak kep Da ninno tu.

²⁹Dicig yai nisindemti biDa leu binhyepo dinyeng tak kep Ditde limwa nya. Gima rino Dani cem midiyai nisindemti dima bije bu.

³⁰ Jigwam kui Ditde meja bijiyem njita ba, jidut ndia ngei bit Da mpe dino diyai dinyeng Nibou Ndig. Mpe dima lene jigwam ei jide banggo ningat simnaibrimigcan dip leu binhyepo jinyeng tak kep mben Israel ide keret simnaibrimigcan.”

³¹“Simon Simon e, amiap e? Allah sindui sut Bilis mem gima bingon jahagom bidimig gi kei bijo ter leu gi kinei. Gima bit leu nok miai ceu di cig gandum nisina billet leu ningat.

³²Noro Simon e, dingat nadi tindei na leu binhyepo ade niba ningon com Dati cut hacan bi. Tirigi angkwei hanyen ba, aya kui Da lene ma abiwin kep asut bat nya ingonti.”

³³Petrus buhup “Tuhan e, ditin ei mem disima ei ig bui nsi bidimai cem bit Na!”

³⁴Noro Yesus pai binoni “Petrus e, ma ayok ngon kep bipia himmun di ariman tirigino hacig yau bigyo ne aom ser Da mbiningai bipia akan tut Da bi.”

³⁵ Niabiati bu ne Yesus hig ser yok “Tirigi po dicuk je ba, jintek gimahap tut Nihyet Di Kei pima ne dipai ser je bipia ma jittei bangdop kin minai kin srop au. Mpe dima lene jisuar mun nyeng hi e?” Lene ibuhup “Nisuar mun nyeng hi bi.”

³⁶Yesus pai biyok “Noro tini bu ne no di nyeng tut nide bangdop kin minai hi tu ne suar noni ttei. Gino simeda hi jo binoni bi ne suar tri nide sinsun ndok di jei ba, bipek mitiei leu binhyepo ug bipek simeda.

³⁷ Ma jingon jo kep bipia Allah Nihyet di pai ‘Ikwop Noni kin yo di ipigau hanjop nya’ midem igbit tug hon Da. Lewo ayat di ipas ei Allah Nihyetti di ndo igbit tut Da micut igkep Da mem nijam dini.”

³⁸Lene yo di igya kui Noni ibuhup “Tuhan e, angat i! Nipwoi simeda nipup can.” Yesus buhup “Cobi!”

³⁹Yesus jo leu minu ndig bimbut ug ei Nungug Zaitun bit leu nok niyai kepti lene yo di igya kui Noni ibram.

⁴⁰Tirigi Noni kwei krau mpia dima lene pai biyok “Ma jingat nadi ser nhyepo jingkwei hanyen tirigi jicut ei mun di srou jeti au.”

⁴¹Leu api Noni om No leu yok buug gwam pas poi bit leu nok nicom tig nicutti lene ba nibiau bicom mpia bingat nadi,

⁴²bipai “Arig e, gino ajoi sut lene ma ayai ninghuisi wei di suar cut igkep da dini ug ei minu ting leu Da. Noro dibit dingon kanti bi leu binhyepo dibit angon kanti.” [

⁴³Malaikati gom ttau kwei biyai nisindem biNoni.

⁴⁴Yesus ningon bei buhun bibor bita nibou ei naditi ba, nahanggwap di mbilen nok ninggrom bitinim ug ei dihyeisi.]

⁴⁵Tirigi Noni ngat nadi bingwig leu lene ngkwei hanyen ndam yo di igya kui Noni bingat lo, ibong mai leu su lewo ingon ngguk bibor.

⁴⁶Gima rino Noni pai biyok “Nggon rino jibong mai nok i? Jikiju bijingat nadi ser nhyepo jingkwei hanyen tirigi jicut ei mun di srou jeti bi.”

⁴⁷Tirigi Noni pai biyok nok rino Yudas di nggre kin ibou simnaibrimigcan pima ttau kep yok bibie tut yo di ningot ndig kwei. Leu api noni mbut biya ei Yesus Noho bei bimei ningyoi.

⁴⁸Noro Yesus hig ser noni “Yudas e, aba nimei dingyoisi bitri Munggwom Tungwatu Nipmot e?”

⁴⁹Tirigi yo di igya kui Yesus di ingat rin ei mpia dima ingat mun di micut igkep yok lene ihig ser Noni “Tuhan e, niba simeda bitot yok e?”

⁵⁰Lene tungwagom di ya kui Yesus ba simeda bitot Imam Nibou Ndig de awak hi bisriot nitingou meng nite bei ninda com bicut leu.

⁵¹Noro Yesus mbrua ser noni “Cobi!” Pai nok lene Noni ngget no dima nitingou bibindei ba, kei hanyen.

⁵²Leu api Yesus hig ser nibou imam nindig nya kin yo di igya ser Tuhan De Ig ide nibou nya kin nibou mben Yahudi nya di ikwei kat Noni “Jiba simeda kin biap tindak bikwei kat Da bit leu nok jibikat no di sibut e?

⁵³ Dingat rin bit je ei Tuhan De Ig bikwop njap-njap lo, jikat Da bi. Noro jam dini bon nituti mem jikinei sut Da lene jam dino no di ninyeng tak kep nidinditi krau kep nisindemti cem.”

⁵⁴Yo dima ikat Yesus bibuwak Noni ug ei Imam Nibou Ndig de ig lene Petrus abia kep bitumbeu sut yok.

⁵⁵Bihi indig hum ei nibou de biyati ninggimau lene Petrus gwam bit yok hek hum.

⁵⁶Tirigi awak sop hi ngat Petrus di gwam hek hum lene tou kep noni nggilun bipai bak nindigsi nya “No dini cem ya kui Yesus!”

⁵⁷Noro Petrus om ser nihyet nghwak him bipai “Dikan tut No dima bi!”

⁵⁸Jei bi lene hiter ngat noni bipai bak “Nani cem anggre kin yo dima!” Noro Petrus buhup “Dani ne bi!”

⁵⁹Jam nitindur gom kin bu lene tungwagom bu ba nihyet singga bipai bak nindigsi nya “Jo nibreisi bipia no dini ya kui Yesus lewo noni cem nitimieisi leu Galilea!”

⁶⁰Noro Petrus buhup “Dingon dorti tut mun di apai kep da tut dima bi!” Hammi tirigi noni mbrap nok rino hacig yau.

⁶¹Lene Yesus kiek Noho ndam Petrus bitou kep noni nggilun. Lene Petrus ningon huk niti tut Yesus nipaisi “Nipou tirigi hacig yau mem mmun di ariman bigyo ne aom ser Da mbiningai bipia akan tut Da bi.”

⁶²Gima rino Petrus om no leu biyati bipim biniyai nggwei kibor.

⁶³Yo di ikat Yesus iba Yesus bikek bibui Noni.

⁶⁴Iba sinsun ninghas binggai kep niyai leu api icuk “Ando igbit no di bui Na i!”

⁶⁵Iba nihyet di wer mpiahi tut Noni bibor bipai kep Noni.

⁶⁶Njap bigyoti lene nibou mben Yahudi nya kin imam nindig nya kin guru Puig Yahudi nicukti nya induk yam kwei leu api yo di igya ser Yesus bibuwak Noni kwei biya ei Nikei Puig Yahudi nya yoho bei.

⁶⁷Yo dima ihig ser Noni “Gino anyeng rino Nibou Ndig di teu tungwatu nya biyai niyaijo nijep biyok lene ma apai hak binye.” Yesus buhup “Nok gino dibuhup igbit lo, jingon jo kep dihyet bi.

⁶⁸Gino dihig ser je tut mun nyeng hi lene mijibuhup dihyet bi.

⁶⁹Hon kep ammani kui ne Munggwom Tungwatu Nipmot gwam kui Allah Di Sindem Bibor ninda com.”

⁷⁰Yahagom ihig ser Noni “Apo Nani ne Allah Nipmot rin e?” Yesus buhup “Bit leu nok jipaisi dima.”

⁷¹Gima rino ipai biyam “Isuar yo di ikkin kep ninghapti bu bi! Nyenti imiap mun di tibim ei Nonti nuhui him tu!”