Read Hatam LUKAS 4 Bible Online

LUKAS 4 - Hatam bible

LUKAS 4

¹Mpe dima lene Yesus ngkwei hanyen leu Minyei Yordan nyai ba, ningon mpung tut Ninnei Gi Kwes. Leu api Ninnei Gi Kwes bie tut Noni ug ei iggum ndigsi,

²leu api Bilis bingon kikep Noni kikau mem mmun-njap ningot bitai ei mpia dima. Tirigi ningat rin ei iggum ndigsi lene Noni yem njita bi ei njap ngot dima apino Noni nggum bibor.

³Bilis pai biNoni “Gino Nani Allah Nipmot rin lene ma abindei tig dini yok nok roti.”

⁴ Yesus buhup “Allah nihyet pai ‘Tungwatu nya igyaijo tug hon roti he bi.’ ”

⁵Lene Bilis buwak Noni ug ei nipieti anai bibor leu api haninyai ndo nibou ndig ide minu ninyeng tak kepti nya hagom bak.

⁶Bilis bingon Noni bipai “Midiyai minu ninyeng tak kepti dima yok bitut mun di tungwatu nya inyeng tut nya hagom biNa apino anyeng mitak kep hagom. Lewo dinyeng tak kep hagom tu bidikwas tut tungwatu nya bit leu dingon kanti hak ug.

⁷Hagom nok Ade bu gino akuk Na ei dimig him ba, anggei sut da.”

⁸ Yesus buhup “Allah nihyet pai ‘Ma jikuk je bak jide Allah ba, jibit Nongkom hak.’ ”

⁹Lene Bilis buwak Noni ug ei Yerusalem bikes Noni ei Tuhan De Ig biya ig bou ninjek anai bibor leu api pai bak “Gino Nani Allah Nipmot lene ma anjei Nanti leu naanaisi dini ug ei dihyeisi mu.

¹⁰ Lewo Allah Nihyet pai ‘Allah micuk malaikati nya leu binhyepo inyohou Na mungkun kei ba,

¹¹ isu inda biteu Na ba, angwes ngun leu gima amig ndei tigya.’ ”

¹² Yesus buhup “Allah Nihyet pai ‘Ma jibingon Tuhan di nok jide Allah au.’ ”

¹³Tirigi Bilis ba nisinati hagom bibingon Yesus bingwig leu lene noni kes Yesus ei lene bet ningon mem nikwesti di kei ei nidipti bu.

¹⁴Lene Yesus ngkwei hanyen ug ei hanjop Galilea biyai nisindemti leu Ninnei Gi Kwes. Ninghapti tibim bidem hanjop dima nisurti-nipekti.

¹⁵Noni ngginau tungwatu nya ei mben Yahudi ide ig mbusyameisi leu api yahagom inggei sut Noni.

¹⁶Lene Noni ngkwei hanyen ug ei nitimieisi ei minu ndig Nazaret leu api coi ug ei mben Yahudi ide ig mbusyameisi mem Njap Nigwam Kep Ninghuisi bit leu nok niyai kepti. Noni kiju leu binhyepo kwop leu Allah Nihyet.

¹⁷Tungwagom su srat nabi Yesaya di ikijum bak lene Noni mbrek nimeng hammi nipas kepti dini,

¹⁸ “Allah Ninnei ningat rin bit Da lewo Noni ta Da leu binhyepo ditri tut Nihyet Di Kei bak yo di yuhui mbum nya. Noni cuk Da kwei leu binhyepo dibon nituti mem yo di isima nya bigyati kwes hanyen kin yo di igyai tu nya bigyai da hanyen kin awak nya bingwes ngun leu yo di imbuk nya cem ba,

¹⁹dimbot kep tut tto bou tirigi Allah miteu Nide limwa nya biyai niyaijo nijep biyok.”

²⁰Yesus kijum srat dima bikes hanyen bak no di nyohou srat nya lene gwam jug[3] leu api yo di ingat rin ei ig mbusyameisi yahagom itou kep Noni nggilun,

²¹tirigi Noni sindi ngginau yok bipai “Njap di ammani ne ayat dima dem igbit leu nok gi tibim ei jitingou nsi.”

²²Yo dima yahagom ice nihyet bipai “Igbit ri” binggap leu tut nihyet di ba niji nghai bitri tut di kei bibor di tibim ei nuhui him. Ihig ser yam “Noni ne Yusuf nipmot rin bi e?”

²³Gima rino Yesus pai biyok “Dikan tut bipia mbigom mijiba nihyet nibiti nindati bipai ‘Na di anda kan e, suar asindei ser Nanti lene abindei ba, akei hanyen.’ Gima cem mijicuk Da bipia dibibon mindur ei ditimieisi dini bit leu nok mindur di dibibon ei minu ndig Kapernaum.”

²⁴ Noni binut bu bipai biyok “Nindigsi yahagom ikon no di nabi ninyeng noro gi mbun yo di ninttig-tta nya kin nide ig bei nsi nya ikon ninyeng kan bi.

²⁵ Ma jintu kep dihyet. Tirigi Nabi Elia niyaijo lene mpia ngei kikau mem ari bingwam ningai apino ninggum nindig bibor hwen tungwatu nya bidem minu dima hagom. Mpe dima ne sop kibom mben Israel wer imang bibor yo rinaha.

²⁶ Mbro nok gima lo, Allah cuk Nabi Elia buug ngat yok bimpu yok bi noro cuk noni buug ngat sop kibom gom ngat he ei minu ndig Sarfat ei hanjop Sidon.

²⁷ Nok gima cem bras yem[4] mben Israel imang bibor mem nijam di nabi Elisa ningat rin bit yok noro noni bindei ba, hi kei hanyen bi. Noro Naaman di timiei minu Siria gom nongkom kei hanyen.”

²⁸Yo di idem yam ei ig mbusyameisi yahagom imiap mun di tibim ei Yesus nuhui him leu api igga Noni nindig bibor.

²⁹Yahagom ikiju ba, ijji Yesus leu ide minu ndig bikri Noni ug ei pimbien bou di jo dideu ide minu ndig dima bipi binjei Noni tut niyaisi ug ei pimbien behei.

³⁰Noro Noni mbut sin yahagomti ba, ningwes ngun leu yok.

³¹Lene Yesus ug ei minu ndig Kapernaum ei hanjop Galilea bingginau tungwatu nya di idem yam mem Njap Nigwam Kep Ninghuisi.

³² Apino tungwatu nya inggap leu tut ningginau yokti nya lewo ba niji ngkiem bitri tut nihyet biyok.

³³Mpe dima lene no di ninnei rom ya ningonti no rima ei ig mbusyameisi. Noni ba nihyet nindig bahara,

³⁴“Na di Yesus timiei minu ndig Nazaret e, anggon ndei nye i? Akwei hwen nye e? Dikan tut anyeng tu. Nani ne No di kwes-kwau dino Allah cuk kwei ri!”

³⁵Yesus pai ser ninnei rom bipai “Akes ahyet ba, ahei leu ningonti hak ug!” Tirigi ninnei rom dahat kukwei noni binjei noni ug ei igjou dip bou yahagom igyai him leu lene ninnei rom dima hei leu ningonti bibindei ba, ninggwenti cut igkep noni bi.

³⁶Tungwatu dima yok yahagom inga leu tut leu api ipai biyam “Mbenjen! Mindei rini i? No dini nihyet sindem bibor. Noni ba niji ngkiem bijji ninnei rom nya bibit nihyet!”

³⁷Gima rino Yesus ninghapti tibim bidem hanjop dima hagom.

³⁸Yesus hei leu ig mbusyamei dima buug ei Simon de ig. Mpe dima lene Simon nignyot ningkek dut. Gima rino yo dima ipai sut bak Yesus.

³⁹Yesus ug ngat noni leu api bindei ba, ningkek di dut pren hak leu noni leu api noni kiju bingei njita tut Yesus nya.

⁴⁰Mmunti lene tungwatu nya ibuwak ide bat di inggwen nya yahagom kwei ei Yesus nidim leu api Noni kes ninda ei yok dip lene bindei ba, yahagom ikei hanyen.

⁴¹Noni jji ninnei rom nya leu imang bibor ingonti tirigi yahara bipia Noni ne Allah Nipmot ri. Noro Noni ggai ser ninnei rom nya yahagom lene bindei ba, iji nggicai ser bimbrap bi lewo ikan tut bipia Noni ne Nibou Ndig di teu tungwatu nya biyai niyaijo nijep biyok ri.

⁴²Njap di hyep bu lene Yesus hei leu ig bei buug ei ha ngunti gom. Tungwatu ningot ndig inggok ser bittau kep Noni lene ipi bipingok ningonti leu binhyema Noni kes yok ei bimbut leu yok au.

⁴³Noro Noni pai biyok “Suar Da duug ei minu ndig nindigsi di gahai dini kou leu binhyepo ditri tut Nihyet Di Kei tut Allah ninyeng tak kepti biyoni cem lewo Allah cuk Da kwei ei dihyeisi dini mem diyai igbit ningon kanti dima.”

⁴⁴Gima rino Yesus tri tut Nihyet Di Kei ei ig mbusyameisi nya bidem minu Yudea nisurti-nipekti.