Read Hatam LUKAS 6 Bible Online

LUKAS 6 - Hatam bible

LUKAS 6

¹ Mpe di gom bu Yesus mbut kak puig di mbut ei miai gandum nghousi mem njap nigwam kep ninghuisi leu api yo di igya kui Noni ipuk gandum ngat gom-gom binggrei nicap leu lene igyem.

²Farisi nya ibou poi ihig ser yok “Nggon rino jibon mun tunggwei sut ide Puig Yahudi nicukti mem Njap Nigwam Kep Ninghuisi i?”

³ Yesus buhup “Jikwop Allah Nihyet tut mun po Daud bibon tirigi noni kin nide limwa nya inggum bibor pima bi e?

⁴ Mbro nok gino Puig Yahudi nicukti cuon ser yok lo, Daud coi ug ei Allah de prak meng nsi ba, noni kin nide limwa nya igyem roti di idis ei Allah Noho bei di imam nya yongkom he igyem kep.”

⁵Lene Yesus pai biyok “Munggwom Tungwatu Nipmot ninyeng tak kep Njap Nigwam Nep Ninghuisi!”

⁶Mpe hi bu ei Njap Nigwam Kep Ninghuisi lene Yesus coi ug ei mben Yahudi ide ig mbusyameisi ba, ngginau tungwatu nya. No di ninda nite hi mai no rima.

⁷Guru Puig Yahudi nicukti kin Farisi nya cem inggok biken tirigi ipai kep Yesus drek dip niyai mun tunggweisi bigyok igyai kep gino Noni bindei ba, tungwatu nya ikei hanyen mem Njap Nigwam Kep Ninghuisi.

⁸Noro Yesus kan tut ingon kanti nya leu api pai bak no di ninda mai “Akiju kwei ba, aya ei yahagom yoho bei!” No dima kiju biya ei yahagom yoho bei.

⁹Lene Yesus hig singgre yo di idem yam ei dima “Puig Yahudi nicukti sindui sut mem gima igyai mindei mem Njap Nigwam Kep Ninghuisi i? Impu yam e, he imbuk tut yam e? Inyohou yam e, he ihwen yam e?”

¹⁰Noni ngig niyai kep yok bipai bak no dima “Atit anda.” Hammi tirigi noni tit ninda rino ninda kei hanyen hak.

¹¹Noro guru Puig Yahudi nicukti kin Farisi nya ingon sibui sut Yesus nindig bibor leu api yuhum yam nsi tut notou isrou Noni.

¹²Mpe dima lene Yesus kui bigwam ei mbigdip gom leu binhyepo huk nadi bak Allah kikau binjap kep.

¹³Njapti kui lene Noni nduk yo di ibit Noni kwei leu api ndo ibou simnaibrimigcan leu binhyepo igya kui Noni.

¹⁴Inyeng rino Simon (Yesus jem ninyeng hi Petrus) kin Simon nikinjoi di Andreas. Yakobus kin Yohanes. Filipus kin Bartolomeus.

¹⁵Matius kin Tomas. Yakobus di nicig ninyeng Alfeus kin Simon (di nggre kin nimpung Nasionalisasi).

¹⁶Yudas di Yakobus nipmot kin Yudas Iskariot di mitri Yesus.

¹⁷Leu api Yesus ya tut yo di igya kui Noni bijuk leu mbigdip kwei bigya ei nipieti gom. Yo di nindigsi kin tungwatu ningot ndig di imbut imig kwei leu hanjop Yudea nisurti-nipekti kin timiei minu ndig Yerusalem nya kin yo di ikwei leu minu ndig Tirus kin Sidon di jo ei muk nintig dip yahagom ikwei ngat Noni.

¹⁸Yo dini induk yam kwei leu binhyepo intu kep Yesus nihyet. Noni bindei yo di inggwen cem ba, ikei hanyen lene jji ninnei rom nya leu yo di ikwei sut ninnei rom di ya ingonti nya.

¹⁹Tungwatu nya yahagom ingwig kep Yesus leu binhyepo ingget Noni lewo nisindemti di biam kwei leu ningat bindei ba, yahagom ikei hanyen.

²⁰Lene Yesus tou kep yo di ibit Noni bipai biyok, “Bikwop yo di yuhui mbum ingon nggei-hi-nggei lewo inggre kin Allah ninyeng tak kepti tu!

²¹Bikwop yo di inggum mem nijam dini ingon nggei-hi-nggei lewo jei bi ne inghop mimpung tut njita! Bikwop yo di ipim mem nijam dini ingon nggei-hi-nggei lewo jei bi ne igyai nillei!

²² Mpe dino tungwatu nya ingon sibui sut je cem ingon mpo tut je cem ikucang je cem ikkin kep jinghapti cem drek dip Da di Munggwom Tungwatu Nipmot lene ma jingon nggei-hi-nggei!

²³ Lewo tungwatu nya ihwen bit nabi gi nipou nya cem tu. Gima rino ma jingon llei bibor bijipri-pri nyen cem lewo Allah mitin ei jimuhup di kei bibor ei gwamti mem je yo.

²⁴Noro aye! Buhun bibor mem je di jinyeng tut ndigban nindig bibor mem nijam dini! Jitug ndei jimuhup hagom ei dihyeisi dini tu!

²⁵Aye! Buhun bibor mem je di jinghop mpung tut njita mem nijam dini! Jei bi lene mijinggum bibor! Aye! Buhun bibor mem je di jiyai nillei mem nijam dini! Leu jei bi ne jingon ngguk bijipim!

²⁶Aye! Buhun bibor mem jeni gino yo di yahagom inggei sut je! Lewo yo dima idigup bat-idigai bat nya inggei sut nabi nitrowai nya mimbrek ngan tu.”

²⁷“Dipai bije di jintu kep dihyet bipia suar jingon ngakei jide siceu nya. Harin dima jiba jimbuk bibuhup hanyen bak yo di imbuk tut je nya.

²⁸Ma jingondut yo di isigion je bijingat nadi tindei yo di ihwen bit je.

²⁹Gino hi ttem jingyoi nite hi lene ma jikiek jingyoi nite hi bak bittem bu. Gino hi pos jide sinsun ndok di jei leu je lene ma jiyai jide sinsun ninda cem bak.

³⁰Gino hi hara je tut mun nyeng hi lene ma jiyai binoni hak ug. Gino hi pos mun di jinyeng tut leu je lene ma jahara bipia tug hanyen bije au.

³¹ Ma jibibon yo di hiter bit leu nok gi jijoi sut ibibon hanyen bije.

³²Leu gino jingon ngakei yo di ingon ngakei jeni he lene notou mijitug ndei nibiropti leu Allah i? Lewo yo di ibon kep sisar nya ingon ngakei yo di ingon ngakei yok hanyen!

³³Gino jibon mun di kei bak yo di ibon mun di kei bije he lene notou mijitug ndei nibiropti leu Allah i? Lewo yo di ibon kep sisar nya ibon nok gima cem!

³⁴Gino jikwas mitiei ngwam tut tungwatu di mitug jide mitiei hanyen bije he lene notou mijitug ndei nibiropti leu Allah i? Lewo yo di ibon kep sisar nya ikwas mitiei hi nok ningwam tut yo di ibon kep sisar nya leu api iwit huk yok leu binhyepo ingkwei mitiei dima hanyen!

³⁵Harin dima jiyai nok gima a! Noro suar jingon ngakei jide siceu nya cem jibibon yok nok gi kei cem jikwas mitiei ngwam tut yok cem lene ma jingon tindei ser gima itug hanyen bije au. Tug hon nisinati dima lene mijitug ndei jibuhupti nindig bibor ba, jinok Allah Di Ninyeng Jei Bibor nipmot bat nya. Lewo Allah singat tut yo di ijem sigyo bi sren kin yo di isibut nya cem.

³⁶Ma jingondut yam bit leu nok Jicig ngondut tungwatu nya!”

³⁷“Ma jibon jenti dem kep nok nikei mem nindigsi nya au. Leu binhyepo Allah di nok nikei mipai kep je bi. Ma jipai kep nindigsi nya au. Leu binhyepo Allah mipai kep je bi. Ma jikos ser yo di ibon mun tunggwei sut je. Leu binhyepo Allah cem mikos ser jide nitunggweisi nya.

³⁸Ma jikwas mun di nindigsi nya isuar tut yok. Leu binhyepo Allah cem mipwoi mun di jisuar nya bimpung pias hagau ei jide minaiti hanyen. Lewo mok nsi di Noni kwas eisi bije dima noyam kin mok nsi di jikwas eisi bak nindigsi nya.”

³⁹ Lene Yesus pai nihyet nibiti nindati gom biyok “Gino no di niyai tu cen hiter di niyai tu lene yahacem micut ug ei jui nsi.

⁴⁰ Munggwom pikor hi ninyeng jei dor njiriek nide guru ninyeng bi. Noro munggwom di pikor tut mun nyeng hagom nok gi dem tu mporo yai ninyeng guru noyam kin nide guru cem.

⁴¹Nggon rino jingon pri tut biei mpup di sigi ser jisut niyaisi he lene jiba jiyai hwen kep biei ttou di sigi ser jenti jiyaisi bi i?

⁴²Nggon rino jihig jisut bipia ‘Diser biei mpup di sigi ser ayaisi leu ayai e?’ Noro biei ttou gom no sigi ser jenti cem jiyaisi yo? Jingon can! Ma jikon biei ttou leu jenti jiyaisi bibie ug e leu binhyepo jiyai kwes mem gima jiser biei mpup di jo jisut niyaisi leu niyaisi.”

⁴³“Bit bon biei di kinei ningat ntun biei di kei him kan bi. Bit bon biei di ningat kei ningat ntun biei di kinei him kan bi.

⁴⁴ Jikan tut bikwop biei hagom tug hon ningat di ntun him. Biei ara ningat ntun ndia nggwen di tigot-tigau him bi. Ba anggur ningat ntun ndia nggwen di tigot bibor him bi.

⁴⁵Ningat di kei ntun no di ningon kwes him lewo ningon kanti hagom kei. Lo, ningat di kinei ntun no di ningon rom him lewo ningon kanti hagom kinei. Mun di tibim ei tungwatu nya yuhui him hagom kwei leu mun di ingon mpung tut.”

⁴⁶“Nggon rino jindat kep dinyeng ‘Tuhan! Tuhan!’ Noro jibit dihyet bi i?

⁴⁷Midiba tou bidibinai sut no di kwei tti kin Da bimiap dihyet leu api bit hagom i? Dindo no dima brei bije.

⁴⁸No dima dem kep no di ngot nide ig di tig juig bijut leu api ngot ig ei cou nipmem di huk bipek hak dip. Mpe dino minyei su bibiam sindem lene nide ig nddong kei bitti bi lewo noni tig cou kikau ug ei dihyei jou tu.

⁴⁹Noro no di miap dihyet bibit bi noyam kin no di ngot nide ig noro tig cou hi mem bi. Mpe dino minyei su bibiam sindem lene nide ig lus binggek bingwig!”