Read Hatam NINDAT KEP TUHAN NICUKTI NYA 11 Bible Online

NINDAT KEP TUHAN NICUKTI NYA 11 - Hatam bible

NINDAT KEP TUHAN NICUKTI NYA 11

¹“Ma jingon ngakei jide TUHAN Allah ba, jice tut jibit nicuk jeti nya hagom.

²Njap di ammani ma jiyok ngon kep mun di jipikor tut leu TUHAN nisok kep jeti tug hon mun di pek kep mem je hagom. Mun di pek kep mem je dima pek kep mem jimunggwom bat nya bi. Lewo jeni rino jingat jide TUHAN Allah nikei-kau-keisi kin nisindemti kin ninyeng jeisi,

³ kin mindur di bibon nya. Jenti jingat mun di Noni bibon bak nibou ndig mben Mesir bitut nide minu titut yam bou jiyai him.

⁴ Lene jingat bipia TUHAN bindei sar tentara Mesir nya bitut kuda nya kin kroba pran di ide nya hagom. TUHAN bindei ba, yahagom isar ei Muk Lipig[6] jou tirigi po yuhuk bram jeni pima.

⁵Jikan tut mun di TUHAN bibon mem jeni ei iggum ndigsi nipou tirigi jikwei ei mpia dini bigyo.

⁶ Ma jiyok ngon kep mun di TUHAN bibon bak Eliab nipmot bat cin di Datan kin Abiram di intun keret Ruben him pima cem. Dihyei kimbo kros ba, pinde yok bitut itnem bat kin imunggwom bat nya kin ide prak meng nya kin ide awak nya yahagom kin ide mindhe-ndhe nihyen kep nya hagom hammi jahagom joho bei.

⁷Jit, jeni rino jingat mindur di TUHAN bibon nya hagom bou jiyai him tu.”

⁸“Ma jibit nicukti hagom di ditri tut bak jeni njap di ammani. Leu api dem mem gima jisigon minyei bijuug dihip ei nite dima ug ba, jicoi ug ei minu di jei bi mijibong niti.

⁹Lene mijibong ei minu di bon dihyei suti di nnum kei cem di TUHAN preu ei mem jidigup bat-jidigai bat nya kin yo di intun yoni him di bram yamti nya bijo ninno.

¹⁰Minu di mijibong niti noyam kin minu Mesir po mpia di jibong niti nipou pima bi. Ei minu Mesir lene jahanggwap mbilen tirigi jibindei biam minyei ug ei miai jide nyati leu binhyepo jibigimahap njita ngan eisi.

¹¹Noro minu di mijicoi eisi bon nungug him kin mbang briep nya ba, biget waisi dihyei a.

¹²Jide TUHAN Allah nyohou minu dima ba, ya ser kikau bikwop ari bingwam leu nimbie him kikau ug bipek ningwigsi kep.

¹³ Gima rino ma jibit nicukti nya di ditri tut bijeni njap di ammani. Ma jingon ngakei jide TUHAN Allah lene ma jiba jingon titut kin jinnei titut bikuk je bak Noni.

¹⁴Gino jibon nok gima lene Noni mibindei but biget ei jide dihyei dip son dideu bed di biang hou kin bed di biang mpia ngei cem. Leu binhyepo jide gandum ngan kin ba anggur ngei kin mini zaitun,

¹⁵kin minta midem mem jeni kin jide mindhe-ndhe nihyen kep nya cem. Njita ninyeng di jisuar nya hagom midem mem jeni.

¹⁶Ma jisindui sut ba, nung di jikuk je bak nya mimbres je ting leu TUHAN bibindei ba, jikuk je bak bijiyai jingon gom bak cem au.

¹⁷Leu gino jinjiriek TUHAN nicuk jeti dima lene Noni migga jeni bibindei but biget mem jide dihyei bi ba, jide dihyei mingak-cai apino njita di jindim eisi nya mingat ningat bi. Mbro nok gino dihyei di Noni yai bije dima nnum kei lo, jei bi lene mijimai hak eisi.

¹⁸ Ma jiyok ngon kep TUHAN nicukti nya ba, jinyohou hagom mungkun kei. Jiba nicukti dima bingot jinda pang lene jikri kin jingwak cem leu binhyepo jiyok ngon.

¹⁹Ma jiba nicukti dima bingginau jimunggwom bat nya. Jisimbot kep tut nicukti dima ei ig bei cem kak puig sinon cem tirigi jibong kep jinghuisi cem tirigi jiyai kep jide midyai cem.

²⁰Jipas kep nicukti dima ei jide ig hyei cin di jo ei dimbou hui kin jide dimbou pmem nyati.

²¹Leu api jeni kin jimunggwom bat nya jide njap mijei ei minu di jide TUHAN Allah preu ei mem jidigup bat-jidigai bat nya. Mijibong ei dihyei dima jei bibor bit leu nok nijam di mpia-bbed him jo anai dihyeisi dini.

²²Ma jiba jingon di gom bibit nicukti nya di ditri tut bijeni hagom kikau ba, jingon ngakei jide TUHAN Allah. Ma jibit nicuk jeti nya hagom ba, jiba jingon di gom bibit Noni kikau cem.

²³Leu api TUHAN muhuk mben dima yahagom sindam leu joho bei leu api mijibong ser mben di imang bibor ba, isindem bibor cem dor njiriek je ide minu a.

²⁴ Bikwop dihyei hanjop nsi di jico niti nya ne mijinyeng tak kep hagom. Jinyeng mitak kep minu nisurti-nipekti dima leu iggum ndigsi ei nite bei mpia nibiho kikau ug ei Nungug Libanon nya ei nite bei mpia nijjai cem leu Minyei Efrat ei nite bei mpia nipriti kikau ug ei Muk Hacan ei nite bei mpia nicutti.

²⁵Jide TUHAN Allah mibindei ba, timiei nya bidem minu dima hagom mittin tut jeni nindig bibor bit leu nok gi po Noni preu ei mem jeni nipou su pima. Apino bit bon tungwagom mibigen ser je kan bi.

²⁶Njap di ammani ma jimbus igbit mun di jijoi suti. Jijoi sut jiyai mun di kei e, he jijoi sut jitug ndei nisigionti e?

²⁷Mijiyai mun di kei gino jibit jide TUHAN Allah nicuk jeti nya di ditri tut bije njap di ammani.

²⁸Noro mijitug ndei nisigionti gino jibit jide TUHAN Allah nicuk jeti nya bi leu api jikiek joho ba, jikuk je bak nung di jikuk je bak nipou bigyo bi sren bu.

²⁹ Tirigi jide TUHAN Allah buwak je bijicoi ug ei minu di mijibong niti dima tu lene ma jibon midut nitri tut TUHAN de mun di kei pimati biyam ei mbigdip Nungug Gerizim lene ma jibon midut nitri tut Nide nisigion pimati biyam ei mbigdip Nungug Ebal. (

³⁰Nungug cin dima jo ei nite bei mpia nicutti leu Minyei Yordan nyai ei mben Kanaan di ibong ei Mbang Briep Yordan inyeng tak kepti. Hacem jo nite bei mpia nicutti dideu biei nghousi ei More di ipigig ser dideu minu ndig Gilgal.)

³¹Jei bu bi lene mijisigon Minyei Yordan ba, juug dihip ei nite hi ba, mijibrim minu di jide TUHAN Allah yai bije bijiyati ri. Tirigi jibrim minu dima bijibong ei sirima tu,

³²lene ma jibit nicukti nya hagom di ditri tut bije njap di ammani.”