Read Hatam NINDAT KEP TUHAN NICUKTI NYA 12 Bible Online

NINDAT KEP TUHAN NICUKTI NYA 12 - Hatam bible

NINDAT KEP TUHAN NICUKTI NYA 12

¹“Ma jingig jitingou mem TUHAN niggai serti di ditri tut bije nogindini lene ma jibit hagom kikau ug bipek jiyaijo ningwig honti ei minu di TUHAN di nok jidigup bat-jidigai bat nya ide Allah yai bije tu.

²Tirigi jikieng kep minu jep dima lene suar jicok tut mpia ttou nsi di ngkiai dima yok ikuk yok bak ide nung nya eisi bitut gi hi di jo ei mbigdip nya kin nungug tou nya kin biei di nimeng nggrou ninghousi hagom.

³ Suar jinggek ide nimbar hum dok nya ba, jiki ide cou tig di ipigig sut nya kukiau cem jindig ide nung mien nya di bindo tut kwar nisop Asyera kep hum cem jidram ide nung nindigsi di ikuk yok bak nya cem bingwig. Gima hagom nok leu binhyepo bit bon ikuk yok bak nung dima yok ei mpia ttou nsi nya dima hanyen bu kan bi.

⁴Lene ma jikuk je bak TUHAN di nok jide Allah bit leu nok ngkiai nya ikuk yok bak ide nungti nya au.

⁵Lewo TUHAN di nok jide Allah mindo minu ttou nsi gom ngat ei jide mben nya ide hanjop nsi nikieti nya leu binhyepo Nide limwa nya minduk yam bikuk yok biNoni eisi.

⁶Ma jibui mindhe-ndhe nya bijindig kep hum ei nimbar hum dokti. Ma jibui mindhe-ndhe nya tug hon nibon midut nindigsi nya leu api ma jikwas gom leu ningot gom, gom leu ningot gom lene nok. Ma jikwas mitiei nindigsi kin mun di jipreu ei mem TUHAN nipou su kin jide mun di jihyen kep nya nipmot bou nya tut TUHAN ei minu ttou nsi gom ngat dima he.

⁷Ma jeni kin jimunggwom bat nya jiyem pesta kep ba, jillei ngwig sut jide midyai di jinda jo kep nya ei TUHAN di nok jide Allah Noho bei ei minu ttou nsi gom dima. Lewo Noni singat tut je nindig bibor.

⁸Tirigi nicunti dima dem tu lene ma jiyai bit leu nok jiyai kepti nogindini au. Nipou kwei bipek ammani kep ne jikuk je bak TUHAN bit leu jingon kanti.

⁹Lewo jikieng kep minu di Noni yai bije ba, jibong kei jigwam kei eisi bigyo.

¹⁰Tirigi jisigon Minyei Yordan lene TUHAN di nok jide Allah misindui sut gima jikieng kep minu dima ba, jibong eisi. Noni minyohou je ser nhyema jide siceu nya yahagom mihwen je bu bi apino mijibong kei mijigwam kei eisi.

¹¹TUHAN di nok jide Allah mindo minu ttou nsi gom ngat lene ma jikuk je biNoni ei sirima. Lene ma jittei mun di dicuk je tut hagom ei sirima. Nok mindhe-ndhe di jindig kep hum ei nimbar hum dokti kin mindhe-ndhe mem nibon midut nindigsi nya kin mun di jikwas gom leu ningot gom lene nok kin mun nindigsi di jikwas tut Noni kin mun di jipreu ei mem Noni nipou su nya hagom.

¹²Ma jeni kin jimunggwom bat nya kin jide awak nya kin yo di intun Lewi him di ibong ei jide minu nya jahagom jingon llei sut yam ei minu ttou nsi gom dima ei TUHAN di nok jide Allah Noho bei. Lene ma jiyok ngon kep bipia yo di intun Lewi him nya ima ide dihyei hanjop nsi hi mem yonti bi.

¹³Gima rino ma jibui mindhe-ndhe bijindig kep hum ugwai-gwai bit leu nok jingon kanti au.

¹⁴Suar jibui mindhe-ndhe dima ei minu ttou nsi gom ngat di TUHAN mindo bije ei jide mben nya ikieti. Ma jibui mindhe-ndhe di jindig kep hum ei nimbar hum dokti ba, jiyai igbit dicuk jeti nindigsi nya hagom ei minu ttou nsi gom ngat dima he.

¹⁵Noro tut jide mindhe-ndhe nindigsi nya lene ma jibui mikwau dima mem jenti igbit jide biyati. TUHAN di nok jide Allah sindui sut gima jiyem mikwau dima dem igbit nimangti di Noni yai bije tu. Noni sindui sut gima yo di ingon kwes nya kin yo di map kui yok yahagom igyem mikwau dima bit leu nok jiyem rusa kin mindhe kijang ninghuigya.

¹⁶ Noro ma jiyem mindhe-ndhe dima ninggrom au. Suar jisiber ninggrom hagom ug ei dihyeiti nok minyei.

¹⁷Ma jiyem mun di jipigig sut ei mem TUHAN ei jide biyati kin jide minu au. Nok jide gandum kin ba anggur ningei kin mini zaitun di jikwas gom leu ningot gom lene nok kin mun di jihyen kep nipmot bou nya cem mun di jipreu ei mem TUHAN nipou su kin mindhe-ndhe di jikwas tut Noni mikuisi kin mun nyeng hiter di jikwas.

¹⁸Ma jeni kin jimunggwom bat nya kin jide awak nya kin yo di intun Lewi him di ibong ei jide minu nya jahagom jiyem kep mun di jipigig sut ei mem TUHAN di nok jide Allah ei Nonti Noho bei ei minu ttou nsi gom ngat di Noni ndo ei mem jikuk je biNoni eisi. Lene ma jillei ngwig sut mun di jiyai nya hagom.

¹⁹Lene ma jingon sok kep jenti ser nhyema tirigi jibong kei jigwam kei ei minu dima lene jingkek ndok tut yo di intun Lewi him au.

²⁰Tirigi TUHAN di nok jide Allah binut jide hanjop ba, nindig bibor bu ei minu di Noni preu ei mem je lene Noni sindui sut gima jiyem mikwau bit leu jingon kanti.

²¹Gino minu ttou nsi gom ngat di Noni ndo ei su jo minu ting bibor lene Noni misindui sut gima jibui mindhe-ndhe di jihyen kep nya di Noni yai bije tu ba, jiyem mikwau dima ei jide ig bei bit leu jingon kanti nok gi po dipai bije tu pima.

²²Yo di ingon kwes nya kin yo di map kui yok yahagom igyem mikwau dima bit leu nok jiyem rusa kin kijang ninghuigya.

²³ Noro ma jiyem mikwau di ninggrom huisi au. Lewo niyaisi no jo ninggromti. Gima rino ma jiyem niyaisi kin mikwau dima bibit yam au.

²⁴Lene ma jiyem ninggrom dima nok jiyem njita au. Noro ma jisiber hagom ug ei dihyeiti nok minyei.

²⁵Gino jibit TUHAN nicuk jeti dini lene Noni mijoi sut je leu api jeni kin jide nintun him yamti di bram yam nya mijibong kei mijigwam kei.

²⁶Ma jittei mun di jipigig sut ei kin mun di jikwas tut TUHAN di jipreu ei mem Noni ba, juug sut ug ei minu ttou nsi gom ngat di Noni ndo ei su.

²⁷Lene ma jibon midut nindig mindhe-ndhe titut kep hum ei sirima. Lene ma jibon midut gi jiyem mindhe-ndhe ninghui lo, jisiber ninggrom ug ei nimbar hum dokti ei sirima cem.

²⁸Ma jiba jingon gom bibit dicuk jeti nya hagom leu binhyepo jibon mun di igbit ba, TUHAN di nok jide Allah mijoi sut je cem. Apino jeni kin jide nintun him yamti di bram yam nya mijibong kei mijigwam kei bijo ninno bijo kikau.”

²⁹“TUHAN di nok jide Allah micok tut ngkiai nya bingwig hammi tirigi jicoi ug ei ide minu leu api mijikieng kep bijibong kei jigwam kei eisi.

³⁰Niabiati Noni cok tut yok bingwig lene ma jingon sok kep jenti ser nhyema jiyai bram yo dima ide nibon midutti nya au. Leu gi nok lene mijimai bijingwig. Ma jinggok tut notou ikuk yonti bak ide nung nyati ba, jiyai bram igyaisi dima au.

³¹Ma jikuk je bak TUHAN di nok jide Allah bit leu nok yoni ikuk yok bak ide nung nyati au. Lewo tirigi ikuk yok bak ide nung nya lene igyai munti nya kinei bibor bibindei ba, TUHAN ningon mpo tut yok. Mbenjen! Indig imunggwom bat nya tut igyai noha kep hum ei ide nimbar hum dokti!

³² Suar jibit dicuk jeti nya hagom. Ma jiba jide nicukti bijikum eisi ba, jikus hi bijicom leu cem au.