Read Hatam NINDAT KEP TUHAN NICUKTI NYA 13 Bible Online

NINDAT KEP TUHAN NICUKTI NYA 13 - Hatam bible

NINDAT KEP TUHAN NICUKTI NYA 13

¹Gino nabi hi e, he no di mbot kep tut mumpriem nya[7] igom preu ei mem je tut mun di mindur kin bindo ba,

²ris je ndam gima jikuk je bak nung di jikan tut bi sren ba, jinok awak mem lene mbro nok gino mun di noni preu ei mem je dem igbit tu lo,

³ma jingig jitingou mem nihyet au. Lewo TUHAN di nok jide Allah ba no dima bibingon je leu binhyepo Noni mikan tut bipia jiba jingon titut bingon ngakei Noni e, he bi e.

⁴Ma jitti kin TUHAN di nok jide Allah bijiba jibou coi mem Noni ba, jibit nihyet cem jiyok ngon kep nicuk jeti nya cem jikuk je bak Noni cem jingon gom tut Noni cem.

⁵Noro suar jihwen no di mbot kep tut mumpriem kin nabi di ibindei ba, jaham jimbuk kep TUHAN di teu je bijingwes ngun leu gi jiwer awak ei minu Mesir dima. Yo dima ingon rom nindig bibor ba, iris je leu puig di TUHAN ndo bije tu. Suar jihwen yo dima leu binhyepo sisar nindig bibor dima srig jikieti bu bi.

⁶Mbro nok gino akindig bat-akinjoi bat nya kin apmot bat apmisop bat nya kin atnem di angon ngakei noni kin angon kieti yahagom iba niku ris na nyahan leu binhyepo akuk na bak nung nya di nani kin adigup bat-adigai bat nya jikan tut bigyo,

⁷kin nung di ikuk yok bak nya di ngkiai di ibong dideu na kin gi hi di ibong minu ting bibor ikuk yok bak lo,

⁸ma angig atingou mem nihyet ba, asindui sut noni bibrim ningkek kep nani au. Ma angon nggriu sut noni ba, angondut noni cem anyohou noni cem au.

⁹Noro suar aba tig bihwen noni bimai. Nangkom aba tig bihwen noni bibie leu api mben Israel nindigsi nya iba tig bihwen noni bram bu.

¹⁰Jiba tig bihwen noni bimai ug. Lewo noni ris na leu TUHAN di nok ade Allah di teu na ba, angwes ngun leu gi awer awak ei minu Mesir.

¹¹Nok gima lene tirigi mben Israel imiap nibimbiti tut hukum di cut igkep no dima lene yoni midigit tut nindig bibor apino hi miyai bram no dima niyaisi bibon sisar nok gima bu bi sren.

¹²Mpe dino jibong ei minu ndig nya di jide TUHAN Allah miyai bije ei nidipti bu lene nibimbiti mitibim,

¹³tut jide mben di yaham imbuk igkei ibou poi di ibindei srawir timiei minu ndig dima tug hon gi ikuk yok bak nung di nipou jikan tut bi nya.

¹⁴Gino jimiap tut hou ban bei di nok gima lene ma jinggok tut mungkun-kei. Gino ibon mun di kinei dima dem igbit nok hou ban bei dima tu,

¹⁵lene suar jiyai nimai bak limwa di ibong minu ndig dima yahagom bitut mindhe-ndhe nihyen kep di ide nya cem. Suar jicok tut minu ndig dima bingwig hak ug.

¹⁶Suar jimbus timiei minu ndig dima yok ide ndigban hagom keyam bijo-jo yam dip ei biyati gom leu api jindig minu ndig dima bitut ndigban di inyeng tut nya hagom kep hum nok nibon midut mem jide TUHAN Allah. Gima leu su lene suar jisindui sut mpia dima leu binhyepo nindung yem dihyei ei bijo ninno. Lene ma jiwin minu dima hanyen bu au.

¹⁷Ma jiyok ndigban nisigion nya dima mem jenti njem au. Noro suar jibindei sar mun dima yok hagom bingwig hak. Apino TUHAN nigga biborti mikes hon leu api Noni mindo nisingat tut jeti hanyen bije. Ningon nggriu sut jeti mibindei ba, jimang ndig bibor bit leu nok gi po Noni preu ei mem jidigup bat-jidigai bat nya pima.

¹⁸Gima hagom nok gino jibit TUHAN nicuk jeti nya di ditri tut bije njap di ammani hagom ba, jipwoi ningona.”