Read Hatam NINDAT KEP TUHAN NICUKTI NYA 2 Bible Online

NINDAT KEP TUHAN NICUKTI NYA 2 - Hatam bible

NINDAT KEP TUHAN NICUKTI NYA 2

¹ Apino ingkwei hanyen ug ei iggum ndigsi ba, ikak puig di ug ndam Akaba ninging bit leu nok TUHAN nicuk nyeti lene imbut-mbut wai bijo ninno ei nungug him ei minu Edom.

²Leu api TUHAN pai bida bipia,

³nyeni imbut-mbut wai ei minu dima bijo ninno ba, wer dem tu. Gima rino suar yuug nite bei mpia nijjai.

⁴ Leu api TUHAN sok nihyet ei da dip bak jeni bidiyai nipingokti nya dini bije bidipai ‘Jei bi lene mijicoi ug ei minu Edom ri. Gima ne jide adig-ajoi di intun Esau him nya ide minu ri. Yoni mittin tut jeni,

⁵noro ma jinjei siceu ba, jihwen yok au. Lewo midipek ide dihyei hanjop nsi hi poi mien bije cem bi. Diyai minu Edom bak Esau de nintun him yamti di bram yam nya bijo ninno bijo kikau tu.

⁶Disindui sut ba, jipek njita kin mun nidut nya leu yoni.’

⁷Ma jiyok ngon kep bipia jide TUHAN Allah njei mun di kei bak jeni tut mun di jiyai nya ninyeng hagom tu. Tirigi jimbut-mbut wai ei iggum ndigsi di nyan bibor dini lene TUHAN nyohou jeni kikau. TUHAN ngkiem ser je kikau ei nijam ari bingwam ningot bitai dini ba, yai mun di jisuar nya hagom bije tu.

⁸Mpe dima ne nyeni imbut kikau ba, ibikes puig di timiei Elat kin Ezion-Geber nya ikak tirigi imbut ug ei Igpong Nsim. Leu api nyeni ikriek nite bei mpia nipriti wer nyahan ba, imbut ndam Ngoisi Moab.

⁹ Mpe dima ne TUHAN pai bida ‘Ma jiwaisi mben Moab nya au lewo yoni ne Lot de di intun noni him di bram yam nya ri. Ma jihwen yok cem au. Diyai minu Ar bak yoni tu lene midipek ide dihyei hanjop nsi hi poi mien bak jeni cem bi.’ ” (

¹⁰Nipou yo lene mben Emim ibong ei Ar. Yoni intig bou anjan ndig ngat noyam kin mben Enak di intig bou anjan ndig ngat ba,

¹¹tungwatu nya cem ijem yok mben Refaim lo, mben Moab ijem yok “mben Emim”.

¹²Nipou yo lene mben Hori ibong ei minu Edom noro yo di intun Esau him yuhuk yok ba, ihwen yahagom bisar leu api ibrim minu di ide dima bigyati. Nok gima cem tut mben Israel ba, ei nidipti bu ne mporo yuhuk ide siceu nya leu dihyei di TUHAN yai biyok.)

¹³“Mpe dima ne nyeni isigon Minyei Zered bit leu TUHAN nicuk nyeti.

¹⁴ Gima pek kep mem nye ei nijam ari bingwam ningot ningai ba, muhwindaningai niabiati ikiju bimbut leu Kades-Barnea pima tu. Yo di ikui sur yam di ikon pran kan nya ei nijam di jei dima yahagom imai bit leu TUHAN nipaisi tu.

¹⁵TUHAN kes mun di buhun ei yok dip kikau bibou yahagom isar bingwig ug e.

¹⁶Tirigi yahagom imai leu su,

¹⁷lene TUHAN pai binyeni,

¹⁸‘Njap di ammani ne jikes je kak puig di bikwam tunggwei ug ei minu Moab ba, jinjiriek Ar.

¹⁹ Tirigi jikes je kikau kak puig ei minu Moab lene mijidideu minu Amon. Yoni ne yo di intun Lot him ri. Ma jiwaisi yok bijihwen yok cem au. Lewo midipek dihyei hanjop nsi di diyai biyok tu dima hi poi mien leu yok bak jeni cem bi.’ ” (

²⁰Nipou tirigi mben Amon icut igkep minu di TUHAN yai biyok bibrim mem yonti dima bigyo lene tungwatu nya ijem minu dima ninyeng Refaim drek dip timiei nya di ibong ei sirima. Noro mben Amon ijem yo dima inyeng mben Zamzumim.

²¹Mben Zamzumim cem intig bou anjan ndig ngat nok mben Enak pima. Yoni isindem bibor ba, imang bibor cem. Noro TUHAN bindei sar yok tug hon mben Amon di ihwen yok leu bibrim minu dima bigyati.

²²TUHAN yai nok gima cem mem mben Edom di intun Esau him ba, yoni rino ibong ei nungug him ei minu Edom. TUHAN bindei sar mben Hori leu api mben Edom ibrim minu dima bigyati. Leu api ibong ei sirima kikau kwei bipek ammani kep.

²³Lene timiei Mios Kreta cem ikwei brim minu di jo sir Muk Hacan nintig dip hagom. Yoni ibindei sar mben Awi di ibong timiei ei minu dima yahagom. Leu api igyai minu ndig dima ba, igyati kikau bipek kin minu ndig Gaza nite bei mpia nibiho.)

²⁴“Gima leu lene nyeni imbut kak puig ug ei minu Moab leu api TUHAN pai binye ‘Nogindini juug sigon Minyei Arnon ba, juug dihip ei nite dima ug. Midikes Sihon di nok nibou ndig mben Amori di ninyeng tak kep ei Hesybon kin nide minu ei jinda nsi. Ma jinjei siceu ba, jihwen noni leu api jibrim nide minu bijiyati.

²⁵Hon njap di ammani kui lene midibindei ba, mben nya bidem dihyei nisurti-nipekti hagom mittin tut jeni. Bikwop yo di imiap tut jinghapti midigit tut ba, mittin tut jeni cem.’ ”

²⁶“Leu api tirigi nyeni ingat rin ei iggum ndigsi Kedemot lene disok dihyet bak Nibou Ndig Sihon ei Hesybon bidahara noni,

²⁷‘Ma asindui sut nye ba, nibikwam ug ei na di Andigpoi ade minu. Nimig mijo kep nimbut kikau ba, minikriek leu puig ndig dima bi.

²⁸Nyeni minigo njita di niyem kin minyei di nidut. Nyeni nisuar nimbut kak pui di bikwam ade minu hacan dima he.

²⁹Nok gima kikau ba, nibisigon Minyei Yordan binuug dihip ei nite dima ug leu binhyepo nibicoi ug ei minu di TUHAN yai bak nyeni. Esau de nintun him di bram yam nya ei minu Edom kin mben Moab di ibong ei minu ndig Ar cem igyai nituti binye ba, nibikwam tunggwei ug ei ide minu pima tu.’

³⁰Noro Nibou Ndig Sihon ce tut mem imbut kak pui di bikwam nide minu hacan dima bi. Gima nok lewo jide TUHAN Allah bindei ba, Sihon ningkek ndok. Ningon tindak cem leu binhyepo bon nituti mem nyeni ibindei timek noni. Lene nyeni ibrim nide minu bigyati kwei bipek ammani kep.

³¹Leu api TUHAN pai bida ‘Dikes Nibou Ndig Sihon kin nide limwa nya ei jinda nsi ug ri. Gima rino ma jibrim minu dima bijiyati.’

³²Lene Sihon ya tut nide tentara nya yahagom ba, ikon pran bit nye dideu minu ndig Yahas.

³³Noro ide TUHAN Allah kes noni ei nyeni indati leu api ibindei timek noni bitut nipmot bat nya kin nide tentara nya yahagom.

³⁴Mpe dima ne nyeni igyai ide minu ndig nya hagom bigyati leu api inggek ide minu ndig dima gom-gom sindam bitimek lene igyai nimai bak yo di ibong ei minu dima yahagom ba, igyai nimai bak pinai nya kin sop nya kin munggwom nya cem yahagom. Hi ningwes ngun bi.

³⁵Nyeni ipos ide mindhe-ndhe di ighyen kep nya ba, ipos ide mun di inyeng tut nya bicat ndigban di ide nya hagom.

³⁶Nyeni igyai yo dima ide minu ndig nya hagom bigyati tug hon ide TUHAN Allah di sindem tut nye. Ikinyon ei niyai minu ndig Aroer ei Mbang Briep Arnon ninghas him kin minu ndig di jo hacan ei briep dima kikau ug bipek kin minu ndig Gilead bigyati. Minu ndig hi bon ngug tig ngkiem bibor di bikrop ttai ser nyeni bi.

³⁷Noro nyeni idideu mben Amon ide minu ndig nya kin Minyei Yabok nyai kin minu ndig nya ei nungug him bitut mpia ttou nsi hiter hagom di ide TUHAN Allah ggai ser bi.”